ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ວັນທີ 30 ສິງຫາ 2021 ສະຫາຍ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຄະນະ ໄດ້ນໍາກະຕ່າດອກໄມ້ ເຂົ້າອວຍພອນ ຢູ່ສະຖານກົງສູນໃຫຍ່ ສສ. ຫວຽດນາມ ປະຈໍາພາກເໜືອ ແຂວງຫຼວງພະບາງ ເນື່ອງໃນໂອກາດວັນປະກາດເອກະລາດ ຂອງສາທາລະນະລັດ ສັງຄົມນິຍົມ ຫວຽດນາມ ຄົບຮອບ 76 ປີ(2/9/1945-2/9/2021).ໂດຍໃຫ້ການຕ້ອນຮັບຂອງສະຫາຍ ຫງວຽນ ດັງຮຸ່ງ ຫົວໜ້າກົງສູນໃຫຍ່ ສສ. ຫວຽດນາມ ປະຈໍາພາກເໜືອ ແຂວງຫຼວງພະບາງ ແລະຄະນະ.

ໂອກາດດັ່ງກ່າວນີ້ສະຫາຍ ຄໍາຂັນ ຈັນທະວີສຸກ ໄດ້ກ່າວສະແດງຄວາມຊົມເຊີຍ ຕໍ່ບັນດາຜົນສໍາເລັດ ທີ່ ສາທາລະນະລັດ ສັງຄົມນິຍົມ ຫວຽດນາມ( ສສ. ຫວຽດນາມ ) ຍາດມາໄດ້ໃນໄລຍະຜ່ານມາ ເປັນຕົ້ນແມ່ນການ: ສ້າງສາພັດທະນາປະເທດຊາດ, ການພັດທະນາ ເສດຖະກິດ-ສັງຄົມ,ການເຊີດຊູຖານະບົດບາດ ແລະ ຊື່ສຽງຂອງ ສສ.ຫວຽດນາມ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ ຢ່າງບໍ່ຢຸດຢັ້ງ.ພ້ອມດຽວກັນນີ້ ຍັງຍົກໃຫ້ເຫັນສາຍພົວພັນຮ່ວມມືຮອບດ້ານ ລະຫວ່າງ ສອງພັກ ແລະສອງລັດ ແລະປະຊາຊົນ ສອງຊາດລາວ-ຫວຽດນາມ ໄດ້ຮັດແໜ້ນສາຍພົວພັນ ມິດຕະພາບ, ຄວາມສາມັກຄີແບບພິເສດ ໃນຖານະເພື່ອນມິດສະຫາຍ ແລະເຄີຍເປັນຄູ່ຮ່ວມສະຕາກໍາອັນດຽວກັນໃນການຕໍ່ສູ້ກອບກູ້ປະເທດຊາດຂອງຕົນອອກຈາກພວກຈັກກະພັດທີ່ມາຮຸກຮານ ໃຫ້ຍິ່ງນັບມື້ນັບເຂັ້ມແຂງ,ໜັກແໜ້ນ ແລະເລິກເຊິ່ງກວ່າເກົ່າ, ຈາກນັ້ນ ກໍຄຽງບ່າຄຽງໄລ່ກັນ ສ້າງສາພັດທະນາປະເທດຊາດຂອງຕົນ ໃຫ້ມີສະຖຽນລະພາບ,ຄວາມໜັ້ນຄົງ ແລະຍືນຍົງ.

ພ້ອມດຽວກັນນີ້, ສະຫາຍ ຄໍາຂັນ ຈັນທະວີສຸກ ກໍໄດ້ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫລືອ ສປປ ລາວ ເວົ້າສະເພາະແຂວງຫຼວງພະບາງ ຕະຫລອດໄລຍະຜ່ານມາ ນັບທັງໃນໄລຍະຕໍ່ສູ້ກູ້ຊາດ , ໄລຍະການປົກປັກຮັກສາ ແລະ ພັດທະນາປະເທດຊາດໃນປັດຈຸບັນ. ພ້ອມທັງຝາກຄໍາອວຍພອນໂດຍຜ່ານ ກົງສູງ ສສ. ຫວຽດນາມ ໄປຍັງບັນດາການນໍາພັກ-ລັດຂັ້ນສູງ ແລະປະຊາຊົນຊາວຫວຽດນາມ ຈົ່ງຍາດໄດ້ໄຊຊະນະຍິ່ງໃຫຍ່ກວ່າເກົ່າ ແລະອວຍພອນໃຫ້ສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ຈົ່ງໝັ້ນຄົງທະນົງແກ່ນ ຕະຫລອດກາລະນານ.