ມີເດຍາວແຂວງຫຼວງພະບາງ ຂ່າວເມືອງນ້ຳບາກ: ພອນສັກ ສິງດາລັກ ວັນທີ 27 ສິງຫາ 2021 ໄດ້ຈັດພິທີປະກາດຮັບຮອງ ເອົາໂຮງຮຽນ ເທບປັນຍາ ເປັນໂຮງຮຽນຕົວແບບຂັ້ນເມືອງ ເຂົ້າຮວ່ມຂອງທ່ານ ບຸນທັນ ຈັນທະສັກ ຮອງເຈົ້າເມືອງນ້ຳບາກ, ທ່ານ ບຸນຄົງ ລັດຕະນະຈິດ ຫົວໜ້າຫ້ອງການສຶກສາທິການ ແລະ ກິລາເມືອງ, ທ່ານ ບົວພັນ ດວງພິຈິດ ຜູ້ປະກອບການໂຮງຮຽນເທບປັນຍາ, ມີແຂກຖືກເຊີນຈາກໂຮງຮຽນທົ່ວເມືອງ, ຫ້ອງການທີ່ກຽ່ວຂ້ອງ ພ້ອມດວ້ຍຄູ-ອາຈານ ແລະ ນ້ອງນັກຮຽນເຂົ້າຮ່ວມ.

ໂຮງຮຽນ ລ້ຽງເດັກ, ອານຸບານ, ປະຖົມສຶກສາ ເທບປັນຍາ ສາຂາ 1 ສ້າງຕັ້ງຂື້ນ ໃນປີ 2014 ຕັ້ງຢູ່ບ້ານໂພນສະຫວັນ, ກຸ່ມບ້ານນໍ້າຖວ້ມ, ເມືອງນ້ຳບາກ, ແຂວງຫຼວງພະບາງ ເບື້ອງຕົ້ນມີພະນັກງານ ບໍລິຫານ 11 ທ່ານ, ຍິງ 7 ທ່ານ, ພະນັກງານຄູສອນ 22 ທ່ານ, ຍິງ 17 ທ່ານ, ມີອາຄານ 9 ຫຼັງ, ໃນນີ້ອາຄານຖາວອນ 5 ຫຼັງ, ອາຄານຊົ່ວຄາວ 4 ຫຼັງ, ມີຫ້ອງການ 2 ຫ້ອງ, ອາຄານຮຽນ 4 ຫ້ອງ, ຫໍພັກຄູ 3 ຫຼັງ; ມີຫ້ອງຮຽນທັງໝົດ 21 ຫ້ອງ ໃນນັ້ນມີຫ້ອງລຽ້ງເດັກ 1 ຫ້ອງ, ຫ້ອງອານຸບານ 8 ຫ້ອງ, ປະຖົມສືກສາ 8 ຫ້ອງ, ມັດທະຍົມຕົ້ນ 3 ຫ້ອງ, ຫ້ອງຄອມພີວເຕີ 1 ຫ້ອງ; ທາງຫ້ອງການສຶກສາທິການ ແລະ ກິລາເມືອງໄດ້ສົມທົບກັບໂຮງຮຽນ ສ້າງຕົວແບບຂອງກະຊວງສຶກສາທິການວາງອອກ ຕາມ 6 ດ້ານ ແລະ 42 ຕົວຊີ້ວັດ ເພື່ອປະເມີນໃນແຕ່ລະຂັ້ນ ຕັ້ງແຕ່ປີ 2017 ຈົນມາຮອດ ປີ 2021 ໃນຕົວແບບດ້ານຜູ້ຮຽນ, ດ້ານການຮຽນ-ການສອນ, ດ້ານສະພາບແວດລ້ອມ, ດ້ານອຸປະກອນການຮຽນ-ການສອນ, ດ້ານຄຸ້ມຄອງບໍລິຫານ, ດ້ານການມີສວ່ນຮວ່ມຂອງຊຸມຊົນ ເຫັນໄດ້ວ່າໄດ້ຄົບຕາມມາດຖານ ແລະ ເງື່ອນໄຂ.

ພິທີດັ່ງກ່າວ ໄດ້ຜ່ານຂໍ້ຕົກລົງຂອງທ່ານເຈົ້າເມືອງນ້ຳບາກ ວ່າດ້ວຍການຮັບຮອງເອົາໂຮງຮຽນເທບປັນຍາ ສາຂາ 1 ເປັນໂຮງຮຽນຕົວແບບຂັ້ນເມືອງ, ຂໍ້ຕົກລົງຍ້ອງຍໍ ໄດ້ເປັນໂຮງຮຽນຕົວແບບ ແຫ່ງທຳອິດຂອງເມືອງ ໃຫ້ກຽດມອບຂອງທ່ານ ບຸນທັນ ຈັນທະສັກ ຮອງເຈົ້າເມືອງ ແລະທ່ານ ບົວພັນ ດວງພິຈິດ ຜູ້ປະກອບການໂຮງຮຽນຂຶ້ນຮັບ ແລະ ຍັງໄດ້ມອບຂອງຂວັນໃຫ້ອາຈານສອນດີ-ສອນເກັ່ງ, ນັກຮຽນເກັ່ງຂັ້ນເມືອງ, ຂັ້ນແຂວງ.
ຈາກນັ້ນປະທານ ພ້ອມດວ້ຍແຂກຖືກເຊີນ ໄດ້ເຂົ້າຮວ່ມຕັດແຖບຜ້າ, ເປີດປ້າຍ ແລະ ຕີຄ້ອງ 9ບາດ. ມາຮອດປັດຈຸບັນ ໂຮງຮຽນເທບປັນຍາ ໄດ້ຂະຫຍາຍອອກເປັນ 2 ສາຂາ ຢູ່ກຸ່ມເທດສະບານເມືອງ ແຜນຕໍ່ໜ້າຈະຂະຫຍາຍໂຮງຮຽນອອກໄປຕື່ມ ທັງອາຄານ ແລະ ຊັ້ນຮຽນ ເພື່ອຮອງຮັບການສຶກສາພາຍໃນເມືອງ.