ມີເດຍລາວແຂວງສາລະວັນ ຂ່າວ-ພາບ: ວິໄລວອນ ສິດທິໄຊ ເນື່ອງໃນໂອກາດທີ່ ທ່ານ ທອງຈັນ ພູມີພັນ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ເຄື່ອນໄຫວເຮັດວຽກຢູ່ແຂວງສາລະວັນ ໃນຄັ້ງວັນທີ 30 ສິງຫາ 2021 ກໍ່ໄດ້ນຳເອົາອຸປະກອນການແພດ ຈຳນວນ 5 ລາຍການ ເຊັ່ນ: ຜ້າອັດປາກ-ອັດດັງ, ເຈວລ້າງມື, ຖົງມື, ເຄື່ອງວັດແທກອຸນຫະພູມ, ເຄື່ອງຊູຊີບ ແລະ ເງິນສົດ 8 ລ້ານກີບ ລວມມູນຄ່າ 17 ລ້ານກວ່າກີບ ມາມອບໃຫ້ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງສາລະວັນ.

ເພື່ອປະກອບສ່ວນເຂົ້າໃນການຈັດຕັ້ງປະຕິບັດວຽກງານຂອງອົງການຊາວໜຸ່ມແຂວງສາລະວັນ ນໍາໃຊ້ເຂົ້າໃນວຽກງານການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ໂດຍສະເພາະກໍາລັງຊາວໜຸ່ມ ທີ່ເປັນກຳລັງຫຼັກປະຕິບັດໜ້າທີ່ວິຊາສະເພາະຂອງຕົນ ເປັນຕົ້ນ: ແມ່ນບັນດາຊາວໜຸ່ມ ຢູ່ຕາມຮາກຖານ, ໜ່ວຍຊາວໜຸ່ມສຳນັກງານຫ້ອງການຕ່າງໆຂອງແຂວງ, ເມືອງ ແລະ ຮາກຖານບ້ານ ທີ່ປະກອບສ່ວນເປັນກຳລັງແຮງທີ່ສຳຄັນ ປະຕິບັດໜ້າທີ່. ເຊີ່ງມອບໂດຍ: ທ່ານ ທອງຈັນ ພູມີພັນ ຮອງເລຂາຄະນະບໍລິຫານງານສູນກາງຊາວໜຸ່ມ, ຮັບໂດຍ: ທ່ານ ຈັນທະວອນ ສີຫາຈັກ ເລຂາຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ແຂວງສາລະວັນ ພ້ອມດ້ວຍຄະນະ.