ມີເດຍລາວແຂວງວຽງຈັນ ພາບ-ຂ່າວ:ນັກຂ່າວເມືອງວັງວຽງ. ໃນວັນທີ 30 ສິງຫາ 2021 ຜ່ານມານີ້, ຢູ່ທີ່ສະໂມສອນເມືອງວັງວຽງ ແຂວງວຽງຈັນ. ໄດ້ເປີດກອງປະຊຸມຊຸກຍູ້ຕິດຕາມການເກັບກໍາຂໍ້ມູນເຊົ່າ-ສຳປະທານທີ່ດິນຂອງລັດຢູ່ເມືອງວັງວຽງ. ໂດຍການເປັນກຽດເຂົ້າຮ່ວມຂອງທ່ານ ດາວເຮືອງ ນັນທະວົງ ຄະນະປະຈໍາພັກແຂວງ ຮອງເຈົ້າແຂວງວຽງຈັນ, ມີທ່ານ ບຸນຈັນ ມາລາວົງ ກໍາມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາຄະນະກຳມະການຊີ້ນຳ ແລະ ກອງເລຂາຂັ້ນແຂວງ-ຂັ້ນເມືອງພ້ອມດ້ວຍນັກທຸລະກິດຜູ້ປະກອບການທີ່ເຊົ່າສໍາປະທານທີ່ດິນຂອງລັດເຂົ້າຮ່ວມ.

ໃນປະຈຸບັນເມືອງວັງວຽງມີຜູ້ປະກອບການເຊົ່າ-ສຳປະທານທີ່ດິນຂອງລັດຢູ່ເມືອງວັງວຽງມີຈໍານວນ 120 ໂຄງການໃນນັ້ນມີຄື: ຂັ້ນສູນກາງອະນຸຍາດ 13 ໂຄງການມີເນື້ອທີ່ 1.195 ກວ່າເຮັກຕາ ແລະ 98.63 ກິໂລຕາແມັດ, ຂັ້ນແຂວງຂັ້ນສູນກາງອອກອະນຸຍາດມີ 66 ໂຄງການມີເນື້ອທີ່ 5.892 ກວ່າເຮັກຕາ ແລະ ຂັ້ນເມືອງອະນຸຍາດມີ 41 ໂຄງການ ມີເນື້ອທີ່ 25 ກວ່າເຮັກຕາ ແລະ 312.726 ຕາແມັດ. ໃນກອງປະຊຸມໄດ້ມີການປຶກສາຫາລືປະກອບຄຳຄິດຄໍາເຫັນ ເພື່ອເຮັດໃຫ້ວຽກງານການເຊົ່າ-ສຳປະທານທີ່ດິນຂອງລັດຫັນເຂົ້າສູ່ລະບຽບຫຼັກການ ແລະ ທັນສະໄຫມຂຶ້ນເປັນກ້າວໆ.

ໃນໂອກາດນີ້ທ່ານຮອງເຈົ້າແຂວງຍັງໄດ້ໃຫ້ກຽດມີຄຳເຫັນເຊີ່ງທ່ານໄດ້ກ່າວວ່າ: ຈຸດປະສົງການລົງເຮັດວຽກໃນຄັ້ງນີ້ແມ່ນມີ 2 ຈຸດປະສົງຄື: 1). ກວດກາຄືນຖ້າຫາກບໍລິສັດ ຫຼື ຜູ້ປະກອບການທີ່ເຊົ່າ-ສໍາປະທານແລ້ວບໍ່ມີການພັດທະນາແມ່ນຈະໄດ້ ເອົາທີ່ດິນຄືນເປັນຂອງລັດດັ່ງເດີມ. 2). ເສຍພັນທະອາກອນຄືນກ່ຽວກັບການເຊົ່າ-ສໍາປະທານທີ່ດິນຂອງລັດ. ພ້ອມນັ້ນທ່ານກໍ່ຍັງໄດ້ຮຽກຮ້ອງໃຫ້ຜູ້ປະກອບການ, ນັກທຸລະກິດທີ່ເຊົ່າ-ສໍາປະທານທີ່ດິນຂອງລັດຈົ່ງໄດ້ພ້ອມກັນຈິງໃຈໃຫ້ຂໍ້ມູນຕໍ່ຄະນະກຳມະການຂັ້ນແຂວງ-ຂັ້ນເມືອງໃຫ້ຖືກຕ້ອງຄົບຖ້ວນ, ຮຽກຮ້ອງໃຫ້ຄະນະກຳມະການຕ້ອງໄດ້ເອົາໃຈໃສ່ເກັບກຳຂໍ້ມູນລະອຽດຊັດເຈນ ແລະ ຄົບຖ້ວນເພື່ອໃຫ້ສະດວກໃນການຕິດຕາມກວດກາການດຳເນີນກິດຈະການຕ່າງໆທີ່ບັນດານັກທຸລະກິດກໍ່ຄືຜູ້ປະກອບການທີ່ໄດ້ເຊົ່າດິນລັດ ໃຫ້ປະຕິບັດພັນທະຕໍ່ລັດຖືກຕ້ອງຕາມລະບຽບກົດຫມາຍ. ສຳລັບການເກັບກຳຂໍ້ມູນຂອງຄະນະກຳມະການຮັບຜິດຊອບຂັ້ນແຂວງ-ຂັ້ນເມືອງແມ່ນຈະໄດ້ເລີ່ມແຕ່ວັນທີ 31 ສີງຫາ 2021 ເປັນຕົ້ນໄປຈົນກ່ວາຈະສຳເລັດ.