ພິທີປະກາດແຕ່ງຕັ້ງຮອງຜູ້ອຳນວຍການໂຮງໝໍແຂວງ ແລະ ຊັບຊ້ອນ ດຸ່ນດ່ຽງ ຮອງຫົວໜ້າບາງຂະແໜງການອ້ອມຂ້າງ ພະແນກສາທາລະນະສຸກ ແຂວງອຸດົມໄຊ ໄດ້ຈັດຂຶ້ນໃນຕອນເຊົ້າຂອງວັນທີ 2 ກັນຍານີ້ ທີ່ຫ້ອງປະຊຸມພະແນກສາທາລະນະສຸກ ໂດຍການເປັນປະທານຂອງ ທ່ານ ດຣ ຫຸມພັນ ອິນທະມຸງຄຸນ ກຳມະການພັກແຂວງ, ຫົວໜ້າພະແນກສາທາລະນະສຸກ, ມີ ທ່ານ ດຣ ລັດຕາ ວັນນະຈິດ ຜູ້ອຳນວຍການໂຮງໝໍແຂວງ, ມີ ພາກສ່ວນທີ່ກ່ຽວຂ້ອງ ແລະ ພະນັກງານຂົງເຂດສາທາລະນະສຸກ ເຂົ້າຮ່ວມ.

ພິທີໄດ້ຜ່ານຂໍ້ຕົກລົງຂອງທ່ານເຈົ້າແຂວງອຸດົມໄຊ ວ່າດ້ວຍການແຕ່ງຕັ້ງຮອງຜູ້ອຳນວຍການໂຮງໝໍແຂວງ ແຕ່ງຕັ້ງ ທ່ານ ດຣ ນາງ ແສງເຄືອ ພົງສະຫວັດ ເປັນຮອງຜູ້ອຳນວຍການໂຮງໝໍແຂວງ ແລະ ຊັບຊ້ອນ ດຸ່ນດ່ຽງພະນັກງານທີ່ມີຕຳແໜ່ງບໍລິຫານຮັບໝ້າທີ່ໃໝ່. ພະແນກສາທາລະນະສຸກ ອອກຂໍ້ຕົກລົງ ແຕ່ງຕັ້ງ ທ່ານ ດຣ ຄຳຫຼ້າ ອານຸສອນ ຮອງຫົວໜ້າອະນາໄມ ແລະ ສົ່ງເສີມສຸຂະພາບ ໄປເປັນຮອງຫົວໜ້າຂະແໜງແຜນການ ແລະ ການຮ່ວມມື, ແຕ່ງຕັ້ງ ທ່ານ ນາງ ສຸພາພອນ ສາຍມິກຍາ ຮອງຫົວໜ້າຂະແໜງກວດກາ ໄປເປັນຮອງຫົວໜ້າຂະແໜງ ອະນາໄມ ແລະ ສົ່ງເສີມສຸຂະພາບ, ທ່ານ ເສີມຂະຫຍາຍ ສີວົງສາ ຮອງຫົວໜ້າຫ້ອງການປະກັນສຸຂະພາບ ໄປເປັນຮອງຫົວໜ້າຂະແໜງອະນາໄມ ແລະ ສົ່ງເສີມສຸຂະພາບ ແລະ ແຕ່ງຕັ້ງ ທ່ານ ຄຳຫຼ້າ ມະນີ ຮອງຫົວໜ້າຂະແໜງອະນາໄມ ແລະ ສົ່ງເສີມສຸຂະພາບ ໄປເປັນຮອງຫົວໜ້າຂະແໜງກວດກາ.


ທ່ານ ດຣ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກ ໄດ້ມີຄຳເຫັນໂອ້ລົມ ໂດຍສະເພາະ ແມ່ນວຽກງານທີ່ກ່ຽວຂ້ອງກັບຂົງເຂດສາທາລະນະສຸກ, ທີ່ທຸກຄົນຈະຕ້ອງໄດ້ເອົາໃຈໃສ່ ເປັນຕົ້ນການສ້າງແຜນກຳນົດພະນັກງານນຳພາ-ຄຸ້ມຄອງ, ການນຳເອົາພະນັກງານຫັນລົງຮາກຖານ, ການນຳໃຊ້ພາຫະນະ, ອຸປະກອນ, ການປະຕິບັດຕາມການມອບໝາຍຂອງຂັ້ນເທິງ ພ້ອມນີ້ ທ່ານຍັງໄດ້ຮຽກຮ້ອງພາກສ່ວນທີ່ໄດ້ຮັບການແຕ່ງຕັ້ງ ຊັບຊ້ອນໜ້າທີ່ໃຫມ່ ຕໍ່ກັບການຊັບຊ້ອນ ໂຍກຍ້າຍ ແມ່ນເຫດການປົກກະຕິທີ່ພັກ-ລັດ ຂັ້ນຕ່າງໆຕ້ອງໄດ້ຈັດຕັ້ງປະຕິບັດ, ຈັດແບ່ງພະນັກງານໃຫ້ແທດເໝາະກັບໜ້າວຽກປະຈຸບັນ ພ້ອມທັງເນັ້ນໃຫ້ເອົາໃຈໃສ່ຮຽນຮູ້ພາລະບົດບາດ, ສິດ ແລະ ໜ້າທີ່ວຽກງານໃຫມ່ທີ່ໄດ້ຮັບມອບໜາຍໃຫ້ເຂົ້າໃຈ ເພື່ອຈະໄດ້ປະຕິບັດໜ້າທີ່ໄດ້ຢ່າງສອດຄ່ອງ.

ພາບ-ຂ່າວ: ແສງອາທິດ