ມີເດຍລາວແຂວງໄຊສົມບູນ ສາຍພິນ ນອງສະຫວັນ
ພິທີ ປະເມີນພະນັກງານລັດ-ລັດຖະກອນ ທີ່ຈະສະເໜີແຕ່ງຕັ້ງດຳລົງຕຳແໜ່ງບໍລິຫານ ຂອງຄະນະໂຄສະນາອົບຮົມ ແຂວງໄຊສົມບູນ ໄດ້ຈັດຂຶ້ນໃນວັນທີ 1 ກັນຍາ 2021 ນີ້ ທີ່ຫ້ອງປະຊຸມຂອງຕົນ ໂດຍການເປັນປະທານຂອງ ທ່ານ ປທ ຄົວຈັ້ງ ດຣາເຊັ້ງ, ຫົວໜ້າຄະນະໂຄສະນາອົບຮົມ ແຂວງ ພ້ອມດ້ວຍຫົວໜ້າ-ຮອງຫົວໜ້າຂະແໜງ ຕະຫຼອດຮອດພະນັກງານວິຊາການ ພາຍໃນຄະນະໂຄສະນາອົບຮົມ ແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີ ທ່ານ ຢີລໍ່ ເກຍສື, ຫົວໜ້າຂະແໜງໂຄສະນາອົບຮົມ ແຂວງ ໄດ້ຂຶ້ນຜ່ານຂໍ້ຕົກລົງ ວ່າດ້ວຍມາດຖານຕຳແໜ່ງບໍລິຫານ ຂອງລັດຖະກອນ ແຫ່ງ ສປປ ລາວ ໝວດທີ II ມາດຕາ 6, ມາດຕະຖານຕຳແໜ່ງບໍລິຫານ ຊຶ່ງຄະນະໂຄສະນາອົບຮົມ ແຂວງ ໄດ້ສະເໜີປະເມີນການແຕ່ງຕັ້ງຕຳແໜ່ງບໍລິຫານປະເພດ 6, ສອງທ່ານ ຄື: ທ່ານ ນາງ ຈັນທາ ສີໄພວັນ ແລະ ທ່ານ ໃຈຢ່າງ ໃນນັ້ນ ເລືອກເອົາ 1 ທ່ານ ມາເປັນຮອງຂະແໜງ.

ໂອກາດດັ່ງກ່າວ ທ່ານ ປທ ຄົວຈັ້ງ ດຣາເຊັ້ງ ໄດ້ມີຄໍາເຫັນໂອລົມຕໍ່ພິທີ ຊຶ່ງທ່ານໄດ້ເນັ້ນໜັກໃຫ້ຜູ້ທີ່ຈະໄດ້ຮັບການແຕ່ງຕັ້ງ ຄັ້ງນີ້ ຈົ່ງເອົາໃຈໃສ່ຝຶກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງທີ່ໜັກແໜ້ນ, ມີທັດສະນະການເປັນຜູ້ນໍາສູງ ພ້ອມທັງເຕົ້າໂຮມຄວາມສາມັກຄີພາຍໃນ ໃຫ້ເປັນປຶກແຜ່ນ, ສ້າງແຜນກົນໄກການນໍາພາເປັນໝູ່ຄະນະ, ມີຄວາມຊື່ສັດ ແລະ ອົດທົນ ຕໍ່ຄວາມຫຍຸ້ງຍາກຕ່າງໆ ຕິດພັນກັບການຮຽນຮູ້ ແລະ ຄົ້ນຄວ້າ-ຊອກຫາວິທິທາງແກ້ໄຂຂໍ້ຂາດຕົກບົກພ່ອງ ຂອງຕົນ ໂດຍຖືເອົາການລົງກໍ່ສ້າງຮາກຖານການເມືອງ ເປັນການຮັບຟັງຫາງສຽງຈາກສັງຄົມ. ພ້ອມນັ້ນ ຕ້ອງເອົາໃຈໃສ່ຈັດຕັ້ງເຄື່ອນໄຫວວຽກງານ ຕາມພາລະບົດບາດ, ສິດ ແລະ ໜ້າທີ່ ຂອງຕົນ ດ້ວຍຄວາມຮັບຜິດຊອບສູງ ເພື່ອເຮັດໃຫ້ວຽກງານທີ່ຂັ້ນເທິງມອບໝາຍ ໄດ້ຮັບການພັດທະນາຢ່າງຕໍ່ເນື່ອງ ທັງປະສົບຜົນສໍາເລັດໃນທຸກດ້ານ ແລະ ໃຫ້ສົມກັບຄວາມໄວ້ເນື້ອເຊື່ອໃຈ ຂອງຂັ້ນເທິງ.