ມີເດຍລາວແຂວງຈຳປາສັກ ຂ່າວ-ພາບ: ທັດຊະນະ ໃນວັນທີ 1 ກັນຍາ 2021 ນີ້, ຄະນະນຳແຂວງຈຳປາສັກ ເຊິ່ງນຳໂດຍ ສະຫາຍ ວິໄລວົງ ບຸດດາຄຳ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຈຳປາສັກ ໄດ້ມອບກະຕ່າດອກໄມ້ ອວຍພອນ ສະຫາຍ ບຸ່ຍ ເຖ ຢຸ໋ງ ກົງສຸນໃຫຍ່ ແຫ່ງ ສສ ຫວຽດນາມ ປະ ຈຳພາກໃຕ້ ລາວ ທີ່ນະຄອນປາກເຊ ພ້ອມຄະນະ ໃນໂອກາດ ວັນຊາດ ສສ ຫວຽດນາມ ຄົບຮອບ 76 ປີ (2/9/1945-2/9/2021).

ໂອກາດນີ້, ສະຫາຍ ວິໄລວົງ ບຸດດາຄຳ ໄດ້ສະແດງຄວາມ ຮູ້ບຸນຄຸນ ຜູ້ນຳສອງຊາດ ລາວ-ຫວຽດນາມ ທີ່ໄດ້ຮ່ວມໃຈກັນຕໍ່ສູ້ຍາດເອົາໄຊຊະນະ ຈາກຈັກກະພັດຜູ້ຮຸກຮານໃຫ້ ປະລາໄຊລົງ, ຊົມເຊີຍຕໍ່ການນຳພາອັນສະຫລາດສ່ອງໃສຂອງ ພັກຄອມມູນິດຫວຽດນາມ ຕະຫລອດໄລຍະ 76 ປີ ທີ່ສາມາດ ນຳພາປະຊາຊົນຫວຽດນາມ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ. ພ້ອມນີ້ ກໍໄດ້ຊົມເຊີຍຕໍ່ ສະຫາຍ ບຸ່ຍ ເຖ ຢຸ໋ງ ກົງສຸນໃຫຍ່ ພ້ອມດ້ວຍຄະນະ ທີ່ມີບົດບາດ ໃນການປະສານງານການພົວພັນຮ່ວມມື, ຄວາມສາມັກຄີພິເສດ ແລະ ການມືຮອບດ້ານ ລະຫວ່າງ ລາວ-ຫວຽດນາມ ໂດຍສະເພາະ ແຂວງຈໍາປາສັກ ກັບ 16 ແຂວງ ແລະ 3 ນະຄອນ ຂອງ ສສ ຫວຽດນາມ ທີ່ໄດ້ມີການຮ່ວມມື ຊ່ວຍເຫລືອ ເຊິ່ງກັນ ແລະ ກັນ ໃນໄລຍະຜ່ານມາ.

ເຊິ່ງເປັນການປະກອບສ່ວນເຂົ້າໃນການເສີມຂະຫຍາຍມູນເຊື້ອ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງຊາດ ລາວ-ຫວຽດນາມ ໃຫ້ນັບມື້ກ້າວເຂົ້າສູ່ລວງເລິກ, ອວຍພອນໃຫ້ສາຍພົວພັນແບບພິເສດ ແລະ ການຮ່ວມມືຮອບດ້ານລະຫວ່າງສອງຊາດ ລາວ-ຫວຽດນາມ ຈົ່ງໝັ້ນຄົງແຕກດອກອອກຜົນ ດີຂຶ້ນໄປເລື້ອຍໆ.