ມີເດຍລາວແຂວງໄຊສົມບູນ ຂ່າວ: ພາພອນ ນະວົງໄຊ ພິທີ ມອບໝາຍໜ້າທີ່ ຈັດຕັ້ງປະຕິບັດ 2 ວາລະແຫ່ງຊາດ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າຂອງວັນທີ 3 ກັນຍາ 2021 ນີ້ ທີ່ສະໂມສອນເມືອງອະນຸວົງ. ໂດຍການເປັນປະທານຂອງ ສະຫາຍ ພົຕ ຄໍາລຽງ ອຸທະໄກສອນ, ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ, ຄະນະປະຈໍາພັກແຂວງ, ເລຂາພັກເມືອງ 5 ເມືອງ ຕະຫຼອດຮອດເລຂາ-ຮອງເລຂາໜ່ວຍພັກ ອ້ອມຂ້າງແຂວງ ເຂົ້າຮ່ວມ.

ໃນພິທີ ໄດ້ຮັບຟັງການເຜີຍແຜ່ຄໍາສັ່ງຂອງກົມການເມືອງສູນກາງພັກ ເລກທີ 01 ວ່າດ້ວຍການເພີ່ມທະວີການ ນໍາພາຊີ້ນໍາຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດມາດຕະການ ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ຄໍາສັ່ງເລກທີ 02 ວ່າດ້ວຍການເພີ່ມທະວີການນໍາພາຊີ້ນໍາຂອງຄະນະພັກແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂ ບັນຫາຢາເສບຕິດ. ຊຶ່ງໄລຍະຜ່ານມາ ພັກ-ລັດເຮົາ ໄດ້ມີຄວາມພະຍາຍາມ ແລະ ຍົກສູງຄວາມຮັບຜິດຊອບ ຕໍ່ການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ແລະ ເອົາໃຈໃສ່ຮ່ວມມືກັນ ຕ້ານ, ສະກັດກັ້ນ, ຄວບຄຸມ ແລະ ແກ້ໄຂບັນຫາ ຢາເສບຕິດ ຢ່າງເປັນລະບົບຕໍ່ເນື່ອງ.

ແຕ່ໃນປັດຈຸບັນ ເສດຖະກິດຂອງປະເທດເຮົາຍັງຢູ່ໃນສະພາບທີ່ບອບບາງ, ງົບປະມານປົກກະຕິຂອງລັດ ຍັງບໍ່ສາມາດຊໍາລະສະສາງໜີ້ໂຄງການລົງທຶນຂອງລັດ ໄດ້ຕາມກຳນົດ. ນອກນີ້ ບັນຫຢາເສບຕິດ ກໍຍັງເປັນໜຶ່ງໃນບັນດາປະກົດການຫຍໍ້ທໍ້ທາງສັງຄົມ ຍັງເປັນໜໍ່ແໜງ ແລະ ເປັນສາຍເຫດຕົ້ນຕໍຂອງການເກີດຄວາມຮຸນແຮງ ແລະ ສິ່ງຫຍໍ້ທໍ້ຕ່າງໆໃນສັງຄົມ ເຊິ່ງ 2 ບັນຫາດັ່ງກ່າວອາດສົ່ງຜົນກະທົບໂດຍກົງ ຕໍ່ການພັດທະນາເສດຖະກິດ-ສັງຄົມ ຂອງປະເທດ ສະນັ້ນ, ພັກ-ລັດເຮົາ ຈຶ່ງໄດ້ກຳນົດເອົາ 2 ບັນຫາດັ່ງກ່າວ ເປັນວາລະແຫ່ງຊາດ ເພື່ອພ້ອມກັນ ຈັດຕັ້ງປະຕິບັດແກ້ໄຂໃນຕໍ່ໜ້າ ໃຫ້ມີຄວາມຮັດກຸມ ແລະ ໃຫ້ຫຼຸດໜ້ອຍຖອຍລົງ.

ຕໍ່ກັບ 2 ວາລະແຫ່ງຊາດດັ່ງກ່າວນັ້ນ ຄະນະບໍລິຫານງານພັກ ແຂວງໄຊສົມບູນ ຈຶ່ງໄດ້ອອກມະຕິຕົກລົງ ວ່າດ້ວຍການແຕ່ງຕັ້ງ ຄະນະກຳມະການຮັບຜິດຊອບຜັນຂະຫຍາຍ ແລະ ຈັດຕັ້ງປະຕິບັດ 2 ວາລະແຫ່ງຊາດ ເພື່ອກຳນົດ ສິດ ແລະ ໜ້າທີ່ ໃນການຈັດຕັ້ງປະຕິບັດວຽກງານດັ່ງກ່າວ ຢູ່ໃນຂອບເຂດທົ່ວແຂວງໄຊສົມບູນ ໃຫ້ໄດ້ຮັບການແກ້ໄຂ ຢ່າງທັນການ. ໂອກາດດັ່ງກ່າວ ສະຫາຍ ພົຕ ຄໍາລຽງ ອຸທະໄກສອນ ໄດ້ມີຄໍາເຫັນຊີ້ນໍາຕໍ່ພິທີ ຊຶ່ງທ່ານໄດ້ເນັ້ນໜັກໃຫ້ບັນດາພະແນກການ, ກົມກອງ ແລະ 5 ເມືອງ ທົ່ວແຂວງ ຈົ່ງຖືເອົາການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ເປັນວຽກງານສໍາຄັນຂອງປະເທດ ກໍຄືຂອງແຂວງ ໂດຍເປັນເຈົ້າການເຊື່ອມຊຶມເນື້ອໃນຄໍາສັ່ງ 2 ສະບັບດັ່ງກ່າວ ໃຫ້ສະມາຊິກພັກ, ພະນັກງານ-ລັດຖະກອນ ຂອງຂະແໜງການຕົນ ໃຫ້ເລິກເຊິ່ງທົ່ວເຖິງ, ມີການປະສານສົມທົບ ປຶກສາຫາລື ເພື່ອວາງແຜນງານ ຢ່າງລະອຽດ ພ້ອມທັງຊີ້ນໍາ-ນໍາພາຈັດຕັ້ງປະຕິບັດຕົວຈີງ ໃຫ້ບັນລຸຄາດໝາຍ ທີ່ວາງໄວ້.