ມີເດຍລາວແຂວງຈຳປາສັກ ຂ່າວ: ເມືອງປາກຊ່ອງ ໂດຍ: ນ. ຈອມເພັດ ດີດຝຶກຝົນ ໃນວັນທີ 9 ກັນຍາ 2021 ນີ້, ຄະນະພັກຮາກຖານ ກຸ່ມບ້ານທີ 1 ເມືອງປາກຊ່ອງ ແຂວງຈໍາປາສັກ ໄດ້ຈັດກອງປະຊຸມເຜີຍແຜ່ ເຊື່ອມຊຶມກົດລະບຽບພັກປະຊາຊົນປະຕິວັດລາວ ສະໄໝທີ XI ແລະ ຄໍາແນະນໍາເລກທີ 102 / ຄຈສພ ກ່ຽວກັບການຈັດຕັ້ງປະຕິບັດ ເນື້ອໃນຂອງກົດລະບຽບພັກສະໄໝທີ XI ແລະ ແຈ້ງການຂອງຄະນະປະຈັກພັກແຂວງ ສະບັບເລທີ 363 / ຄຈສຂ ວ່າດ້ວຍການເພີ່ມທະວີສະຫຼູບຕີລາຄາ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021 ຂື້ນຢູ່ທີ່ສະໂມສອນຂອງເມືອງ ໂດຍການເປັນປະທານ ແລະ ໃຫ້ກຽດເຜີຍແຜ່ຂອງ ທ່ານ ພິມພອນ ພັນດານຸວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆປາກຊ່ອງ, ມີທ່ານ ສຸລິສັກ ບຸບຜາວົງ ຮອງຫົວໜ້າຄະນະຈັດຕັ້ງເມືອງ, ທ່ານ ວົງໄຊ ແກ້ວມະນີວົງສາ ເລຂາຄະນະພັກຮາກຖານກຸ່ມບ້ານທີ 1 ພ້ອມບັນດາທ່ານໃນຄະນະພັກຮາກຖານທົ່ວກຸ່ມ 1 ເຂົ້າຮ່ວມຢ່າງພ້ອມພຽງ.

ໃນກອງປະຊຸມ ທ່ານ ພິມພອນ ພັນດານຸວົງ ກໍາມະການພັກແຂວງ ເລຂາພັກເມືອງ ເຈົ້າເມືອງໆປາກຊ່ອງ ກ່າວວ່າ: ກົດລະບຽບພັກແມ່ນແນວທາງການຈັດຕັ້ງພື້ນຖານຂອງພັກ ເພື່ອຊີ້ນຳວຽກງານກໍ່ສ້າງພັກ ໃຫ້ມີຄວາມເປັນເອກະພາບ ທັງສອດຄ່ອງກັບຈຸດພິເສດ ແລະ ລັກສະນະຂອງການປະຕິວັດຢູ່ປະເທດເຮົາໃນແຕ່ລະໄລຍະ ພ້ອມກັນນັ້ນ ກົດລະບຽບພັກ ຍັງສະແດງໃຫ້ເຫັນເຖິງ ການຍຶດໝັັ້ນ, ໝູນໃຊ້ ແລະ ເສີມຂະຫຍາຍ ລັດທິມາກ-ເລນິນ ກ່ຽວກັບການກໍ່ສ້າງພັກ ຊົນຊັ້ນກຳມະກອນ ເຂົ້າໃນເງື່ອນໄຂຕົວຈິງຂອງການປະຕິວັດ. ກອງປະຊຸມໃຫຍ່ຜູ້ແທນທົ່ວປະເທດຂອງພັກເຮົາໃນແຕ່ລະຄັ້ງ ໄດ້ຮັບຮອງເອົາກົດລະບຽບພັກ ແລະ ໄດ້ມີການປັບປຸງດັດແປງກົດລະບຽບພັກ ໃຫ້ສອງຄ່ອງກັບໜ້າທີ່ການເມືອງຂອງພັກໃນແຕ່ລະໄລຍະ

ມາໄລຍະນີ້ ເພື່ອຍົກສູງຄວາມສາມາດນຳພາຂອງພັກ ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ສຶບຕໍ່ບູລະນະປະຊາທິປະໄຕປະຊາຊົນ ໃຫ້ສົມບູນຍິ່ງຂື້ນ ເພື່ອກ້າວຂື້ນສູ່ຈຸດໝາຍສັງຄົມນິຍົມນັ້ນ ຈຶ່ງມີຄວາມຈຳເປັນຕ້ອງໄດ້ປັບປຸງດັດແປງກົດລະບຽບພັກ ໃຫ້ສອດຄ່ອງ, ຈະແຈ້ງ, ຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດຕົວຈິງໄດ້, ແນໃສ່ປັບປຸງກໍ່ສ້າງພັກ ຮັບປະກັນເຮັດໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນໃນທຸກດ້ານ. ເຊິ່ງກົດລະບຽບຂອງພັກປະຊາຊົນປິຕິວັດລາວສະໄໝທີ XI ປະກອບດ້ວຍ 15 ໝວດ 64 ມາດຕາ ໃນນີ້ ເພີ່ມຂື້ນ I ມາດຕາ ແລະ 7 ໝວດ ຄື: ໝວດທີ VII ພັກນຳພາວຽກງານພະນັກງານ,ມາດຕາທີ 3 ຄຳປະຕິຍານຂອງສະມາຊິກພັກ, ມາດຕາ 14 ສະໄໝດຳລົງຕຳແໜ່ງເລຂາໜ່ວຍພັກແຕ່ລະຂັ້ນ, ມາດຕາ 34 ພັກຄຸ້ມຄອງພະນັກງານ, ສະມາຊິກພັກ, ມາດຕາ 35 ມາດຕະຖານພະນັກງານນຳພາ-ຄຸ້ມຄອງ, ມາດຕາ 36 ຕຳແໜ່ງພະນັກງານນຳພາ-ຄຸ້ມຄອງ, ມາດຕາ 39 ຄະນະຊາວໜຸ່ມປະຊາຊົນປະຕິວັດລາວ ແລະ ມາດຕາ 52 ລະບຽບວິໄນຂອງພັກແຕ່ລະຂັ້ນ.ຈາກນັ້ນກອງປະຊຸມກໍ່ໄດ້ຮັບຟັງແນະນຳເລກທີ 102 / ຄຈສພ ກ່ຽວກັບການຈັດຕັ້ງປະຕິບັດ ເນື້ອໃນຂອງກົດລະບຽບພັກສະໄໝທີ XI ແລະແຈ້ງການຂອງຄະນະປະຈັກພັກແຂວງ ສະບັບເລທີ 363 / ຄຈສຂ ວ່າດ້ວຍການເພີ່ມທະວີສະຫຼູບຕີລາຄາ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021 ໂດຍຈຸດປະສົງ ກໍ່ເພື່ອເຮັດໃຫ້ບັນດາທ່ານໃນຄະນະພັກຮາກຖານກຸ່ມບ້ານທີ 1 ໄດ້ເຊື່ອມຊຶມກຳແໜ້ນ ເນື້ອໃນຂອງກົດລະບຽບພັກສະໄໝທີ XI, ຄຳແນະນຳ ແລະ ແຈ້ງການ ເພື່ອນຳໄປຈັດຕັ້ງປະຕິບັດເຂົ້າໃນວຽກງານຂອງກຸ່ມບ້ານ ໃຫ້ມີຜົນສຳເລັດເທື່ອລະກ້າວ.