ມີເດຍາວແຂວງໄຊສົມບູນ
ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດກອງປະຊຸມເຊື່ອມຊຶມ 3 ເອກະສານ ຂອງວາລະແຫ່ງຊາດ ໂດຍສະເພາະມະຕິວ່າດ້ວຍການຍົກສູງຄຸນນະພາບວຽກງານ, ວັດທະນະທຳ ໃນໄລຍະໃໝ່ ແລະ ຄຳສັ່ງວ່າດ້ວຍເພີ່ມທະວີການນຳພາຊີ້ນຳ ຂອງຄະນະພັກແຕ່ລະຂັ້ນໃນການຈັດຕັ້ງປະຕິບັດມາດຕະການແກ້ໄຂຄວາມຫຍຸ້ງ ຍາກ ດ້ານເສດຖະກິດ-ການເງິນ, ຄຳສັ່ງວ່າດວ້ຍເພີ້ມທະວີ ການນຳພາຊີ້ນຳຂອງຄະນະພັກແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ແກພະນັກງານ-ລັດຖະກອນຂອງພະແນກ ຖວທ ແຂວງໄຊສົມບູນ ໃນຕອນເຊົ້າ ຂອງວັນທີ 9 ກັນຍາ 2021 ທີ່ຫ້ອງປະຊຸມພະແນກ ໂດຍການເປັນປະທານ ຂອງທ່ານຕົ່ງມົວ ຊົວໂກ້, ຄະນະປະຈຳພັກແຂວງ ຮອງເຈົ້າແຂວງໄຊສົມບູນ, ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີຄະນະພັກ, ຄະນະພະແນກ, ຫົວໜ້າຂະແໜງ ຕະຫລອດຮອດພະນັກງານ-ລັດຖະກອນພາຍໃນພະແນກເຂົ້າຮ່ວມ.

ໃນກອງປະຊຸມ ທ່ານ ທົງສະຫວັນ ໂພສະລາດ ຮອງຫົວໜ້າພະແນກ ໄດ້ຜ່ານມະຕິເລກທີ 25/ກມສພ ວ່າດ້ວຍການເພີ່ມທະວີການນຳພາຂອງພັກ ຕໍ່ວຽກງານວັດທະນຳທຳໃນໄລຍະໄໝ່ ວັດທະນະທຳ ແມ່ນບັນດາຄຸນຄ່າທາງດ້ານວັດຖຸ ແລະ ຈິດໃຈ ທີ່ມວນມະນຸດປະດິດສ້າງຂຶ້ນ ຊຶ່ງພັກປະຊາຊົນປະຕິວັດລາວ ຍາມໃດກໍໃຫ້ຄວາມສຳຄັນ ແລະ ຄວາມເອົາໃຈໃສ່ຕໍ່ວຽກງານວັດທະນະທຳ ໂດຍຖືວ່າວັດທະນະທຳ ແມ່ນຄຸນລັກສະນະ ແລະ ປັດໄຈພື້ນຖານຂອງການດຳລົງຄົງຕົວຂອງຊາດ. ໂອກາດດຽວກັນນີ້ ທ່ານ ຕົ່ງມົວ ຊົວໂກ້ ປະທານກອງປະຊຸມ ໄດ້ຜ່ານຄຳສັ່ງ ເລກທີ 01/ກມສພ ວ່າດ້ວຍເພີ່ມທະວີການນຳພາຊີ້ນຳ ຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດມາດຕະການແກ້ໄຂຄວາມຫຍຸ້ງ ຍາກດ້ານເສດຖະກິດ-ການເງິນ ຊຶ່ງການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແມ່ນການແກ້ໄຂບັນຫາສຳ ຄັນ, ຈຳເປັນ ແລະ ຮີບດ່ວນ ຂອງຊາດ ທີ່ໄດ້ສະສົມມາຫລາຍປີ ໃຫ້ຜ່ອນຄາຍລົງ

ໂດຍໃຫ້ຖືເອົາການແກ້ໄຂບັນຫາດັ່ງກ່າວ ເປັນໜ້າທີ່, ພັນທະ ແລະ ຄວາມຮັບຜິດຊອບ ຂອງໝົດທຸກພາກສ່ວນໃນສັງຄົມ. ໃນກອງປະຊຸມຍັງເຊື່ອມຊຶມ ຄຳສັ່ງເລກທີ 02/ກມສພ ວ່າດ້ວຍເພີ້ມທະວີການນຳພາ ຊີ້ນຳຂອງຄະນະພັກແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍ ທ່ານ ສົມດາວີ ຄຳເມືອງຄູນ ຮອງຫົວໜ້າພະແນກ ຊຶ່ງບັນຫາຢາເສບຕິດ ໄດ້ກາຍເປັນໜຶ່ງໃນບັນດາປະກົດການຫຍໍ້ທໍ້ທາງສັງຄົມ, ການລະບາດ ຂອງຢາເສບຕິດໄດ້ເປັນໜໍ່ແໜງ ແລະ ເປັນສາຍເຫດຕົ້ນຕໍ ຂອງການເກີດຄວາມຮຸນແຮງ ແລະ ສິ່ງຫຍໍ້ທໍ້ຕ່າງໆໃນສັງຄົມ. ທັງນີ້ກໍ່ເພື່ອເປັນການເຜີຍແຜ່ເນື້ອໃນຈິດໃຈ ຂອງກົມການເມືອງສູນການພັກຊຶ່ງເປັນເອກະສານທີ່ມີຄວາມໝາຍຄວາມສຳຄັນ ໂດຍສະເພາະແມ່ນ 3 ເອກະສານດັ່ງກ່າວ ເພື່ອເຮັດໃຫ້ພະນັກງານລັດຖະກອນພາຍໃນພະແນກ ກຳໄດ້ແນວທາງນະໂຍບາຍຂອງພັກລັດ, ຮັບຮູ້ ແລະ ເຂົ້າໃຈຢ່າງເລິກເຊິ່ງ ເພື່ອພ້ອມກັນນຳເອົາເນື້ອໃນດັ່ງກ່າວ ໄປຈັດຕັ້ງປະຕິບັດໃຫ້ເກີດປະສິດທິພາບ ແລະ ປະສິດທີຜົນຕາມຄາດໝາຍທີ່ວາງໄວ້. ໂອກາດດຽວກັນນີ້ຜູ້ເຂົ້າຮ່ວມ ຍັງໄດ້ປະກອບຄຳຄິດຄຳເຫັນໃສ່ເອກະສານດັ່ງກ່າວດ້ວຍຄວາມຮັບຜິດຊອບສູງ ເພື່ອໃຫ້ການນຳເອົານິຕິກຳດັ່ງກ່າວໄປປັບໃຊ້ກັບວຽກງານຕົວຈິງ ໂດຍສະເພາະແມ່ນໃນຂົງເຂດຖະແຫລງຂ່າວ, ວັດທະນະທຳ ແລະ ທ່ອງທ່ຽວ ປະກົດຜົນເປັນຈິງ.