ມີເດຍລາວແຂວງວຽງຈັນ ຕາມການລາຍງານ ຂອງທ່ານ ເຊັງເຮີ ຊົວຊ່າ ຮອງຫົວໜ້າຫ້ອງການສາທາລະນະສຸກເມືອງ, ຮອງຫົວໜ້າກອງເລຂາຄະນະສະເພາະກິດປ້ອງກັນ ແລະຄວບຄຸມພະຍາດໂຄວິດ-19 ເມືອງໝື່ນ ແຂວງວຽງຈັນ ໃນຄັ້ງວັນທີ 8 ກັນຍາ 2021 ນີ້ວ່າໝົດປີ 2021 ຕ້ອງສັກວັກຊິນປ້ອງກັນພະຍາດໂຄວິດ-19 ໃຫ້ໄດ້ 100% ຂອງກຸ່ມເປົ້າໝາຍ 18 ປີ ຂື້ນໄປ ແລະກວມ 50% ຂອງພົນລະເມືອງທົ່ວເມືອງໝື່ນ.

ການສັກວັກຊີນຢູ່ເມືອງໝື່ນ ໄດ້ເລີ່ມປະຕິບັດ ນັບແຕ່ວັນທີ 10 ມີນາ 2021 ເປັນຕົ້ນມາ ຮອດປະຈຸບັນນີ້ໄດ້ຮັບວັກຊີນ 2 ຊະນິດຄື ວັກຊີນຊີໂນຟາມທັງໝົດ 8.850 ໂດສ ປະຕິບັດເຂັມທີ 1 ໄດ້ 3.453 ໂດສ, ປະຕິບັດເຂັມທີ 2 ໄດ້ 2.348 ໂດສ໌; ວັກຊີນຈອນສັນແອນຈອນສັນ ທັງໝົດ 9.014 ໂດສ໌ ປະຕິບັດໄດ້ 9.014 ໂດສ໌ ລວມສັກວັກຊີນທັງໝົດ 2 ຊະນິດໄດ້ທັງໝົດ 12.467 ໂດສ໌. ສະເລ່ຍອັດຕາປົກຄຸມກຸ່ມເປົ້າໝາຍ 18 ປີ ເທົ່າກັບ 56% ຂອງພົນລະເມືອງທົ່ວເມືອງໝື່ນ ແລະ ສະເລ່ຍອັດຕາປົກຄຸມປະຊາຊົນທັງໝົດຢູ່ເມືອງໝື່ນໄດ້ 28%.

ທ່ານ ເຊັງເຮີ ຊົວຊ່າ ຍັງໄດ້ກ່າວຕື່ມວ່າ ປະຈຸບັນນີ້ເຮົາຍັງມີວັກຊີນຊະນິດ ຊີໂນຟາມ ຈໍານວນ 3.049ໂດສ. ບໍລິການປະຊາຊົນທຸກມື້ນັບແຕ່ວັນຈັນຫາວັນສຸກຢູ່ 3 ຈຸດຄື ໂຮງໝໍເມືອງໝື່ນ, ໂຮງໝໍນ້ອຍບ້ານເມືອງໝື່ນ ແລະ ໂຮງໝໍນ້ອຍບ້ານວັງ. ວັກຊີນດັ່ງກ່າວນີ້ຕ້ອງໄດ້ສັກ 2 ເຂັມຫ່າງກັນ 1 ເດືອນ.
ພາບ-ຂ່າວ:ນັກຂ່າວເມືອງໝື່ນ.