ມີເດຍລາວແຂວງໂດຍ: ວິໄລວອນ ສິດທິໄຊ ສະພາບບັນຫາການແຜ່ລະບາດຂອງພະຍາດໂຄວິດ-19 ໄດ້ສ້າງຜົນກະທົບຢ່າງໃຫຍ່ຫຼວງຕໍ່ກັບການພັດທະນາເສດຖະກິດສັງຄົມຂອງຊາດ ເວົ້າສະເພາະກໍ່ຄືແຂວງສາລະວັນ ອັນໄດ້ສ້າງຄວາມຫຍຸ້ງຍາກ, ຂັດສົນຕໍ່ກັບການດຳລົງຊີວິດຂອງທຸກຄົນໃນສັງຄົມ ໂດຍສະເພາະບັນດາຜູ້ປະກອບການໃນດ້ານຕ່າງໆ ບໍ່ໜ້ອຍກໍ່ຫຼາຍ ຕາມສະພາບເງື່ອນໄຂຕົວຈິງ ຢ່າງເປັນວົງກວ້າງ ເປັນເວລາແກ່ຍາວ ແລະ ບາງກິດຈະການກໍ່ໄດ້ປິດຊົ່ວຄາວ ເພື່ອປະຕິບັດຕາມມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ແຂວງສາລະວັນ ໃຫ້ເຂັ້ມງວດ.

ທ່ານ ວຽງ ເຈົ້າຂອງກິດຈະການບໍລິການກາເຟສົດ, ໂຮມສະເຕ(Homestay), ແຜເຜົ່າກະຕູ, ຖົ່ວດີນ ເມືອງເລົ່າງາມ ແຂວງສາລະວັນ ໃຫ້ການບໍລິການແບບຫົວໜ່ວຍທຸລະກິດຄອບຄົວ ເລົ່າວ່າ: ການດຳເນີນກິດຈະການຂອງຕົນ ແມ່ນໄດ້ເຮັດແບບພໍພຽງ, ລຽບງ່າຍ ຕາມຮູບແບບຊົນເຜົ່າກະຕູ ເຊັ່ນ: ຮູບແບບໂຄງສ້າງຮ້ານ, ເຮືອນພັກແຮມ, ວິຖີຊີວິດ, ການປະດັບປະດາ ຕິດພັນກັບການບໍລິການກາເຟສົດ, ເຊີ່ງໄດ້ລີ່ເລີ່ມມາແຕ່ປີ 2021 ຈົນເຖີງປັດຈຸບັນ ແລະ ສາມາດໃຫ້ການບໍລິການ ເປັນເວລາ 9 ປີ. ຍ້ອນມີແນວຄວາມຄິດ ນຳເອົາເອກະລັກ, ວັດທະນະທຳຊົນເຜົ່າ ເຊັ່ນ: ການນຸ່ງຖື, ອາຊີບ ທີ່ຕິດພັນກັບວິຖີຊີວິດ ເຜີຍແຜ່ໃຫ້ສັງຄົມໄດ້ຮັບຮູ້ ເພື່ອໃຫ້ມີຄວາມຍຶນຍົງ ແລະ ນຳເອົາມາເປັນສິ່ງດຶງດູດນັກທ່ອງທ່ຽວ, ພ້ອມໃຫ້ບໍລິການ, ຊື່ງໄດ້ຮັບຄວາມນິຍົມຊົມຊອບຈາກນັກທ່ອງທ່ຽວຕ່າງປະເທດ ແລະ ພາຍໃນ ເປັນຈຳນວນຫຼວງຫຼາຍ, ໃນແຕ່ລະມື້ ມີນັກທ່ອງທ່ຽວ ມາໃຊ້ບໍລິການ ບໍ່ຕ່ຳກວ່າ 50 ຄົນ, ກິດຈະກຳທີ່ນັກທ່ອງທ່ຽວນິຍົມ ແມ່ນຍ່າງປ່າ, ຊົມວິຖີຊີວິດຊາວບ້ານ ແລະ ພັກແຮມ ຈຳນວນໜຶ່ງ. ຮູບແບບໃຫ້ການບໍລິການ ມີຄື: ໂຮມສະເຕ, ຍ່າງປ່າສວນກາເຟ, ບໍລິການຜະລິດຫັດຖະກໍາວັດທະນະທຳ ເຊັ່ນ: ສິ້ນເຜົ່າກະຕູ, ຜ້າບ່ຽງ, ສາຍແສນ, ສາຍຄໍ, ແຜມັດຫົວ ແລະ ອື່ນໆ, ພ້ອມທັງບໍລິການກາເຟສົດ ໂດຍແມ່ນອາໄສແຮງງານໃນຄອບຄົວ 4 ຄົນ ເທົ່ານັ້ນ ເປັນຫຼັກ. ໃນປີໜື່ງສາມາດສ້າງລາຍຮັບໄດ້ 60 ລ້ານກວ່າກີບ.

ພາຍຫຼັງການແຜ່ລະບາດຂອງພະຍາດໂຄວິດ-19 ແລະ ນັບແຕ່ໄດ້ປະຕິບັດມາດຕະການຕ່າງໆ ເປັນຕົ້ນ: ປິດການເຂົ້າ-ອອກປະເທດ ກໍ່ຄືແຂວງສາລະວັນ ເຮັດໃຫ້ການບໍລິການຢຸດສະຫງັກລົງ ເປັນເວລາເກືອບ 2 ປີ, ໂດຍສະເພາະບໍ່ມີນັກທ່ອງທ່ຽວເຂົ້າມາໃຊ້ບໍລິການ ໂດຍສ່ວນໃຫຍ່ແມ່ນອາໄສນັກທ່ອງທ່ຽວຈາກຕ່າງໆປະເທດ. ຊື່ງປັດຈຸບັນ, ມີຄວາມຫຍຸ້ງຍາກ ຫຼາຍດ້ານ ເປັນຕົ້ນ: ຄ່າໃຊ້ຈ່າຍຕ່າງໆ, ບໍ່ມີທຶນໜູນວຽນ ແລະ ຫ້ອງນອນພັກແຮມ, ອຸປະກອນສິ່ງຂອງຕ່າງໆ ທີ່ເຄີຍໃຫ້ບໍລິການ ເກົ່າແກ່, ຊຸດໂຊມ ຫຼັງຈາກບໍ່ມີການບໍລິການ. ແຕ່ກໍ່ຍັງສືບຕໍ່ດຳເນີນກິດຈະກຳອື່ນໆ ທີ່ສາມາດປະຕິບັດໄດ້ ເປັນຕົ້ນ: ບໍລິການກາເຟສົດ ແລະ ຜະລິດຫັດຖະກຳວັດທະນະທຳ ເພື່ອຮອງຮັບການບໍລິການແບບ ລາວທ່ຽວລາວ.

ຜູ້ປະກອບການດັ່ງກ່າວ ຍັງໄດ້ສະແດງຄວາມຂອບໃຈ ມາຍັງການນຳພັກ-ລັດ, ຂະແໜງການທີ່ກ່ຽວຂ້ອງ ທີ່ໄດ້ເອົາໃຈໃສ່ໃກ້ຊິດຕິດແທດ ແລະ ໃຫ້ທິດຊີ້ນຳ, ຊ່ອງທາງໃນການແກ້ໄຂບັນຫາຕ່າງໆ ເພື່ອບໍ່ໃຫ້ກິດຈະການດັ່ງກ່າວ ຖືກຢຸດສະຫງັກໄປ ແລະ ໄດ້ໃຫ້ສ່ອງທາງໃນການເຂົ້າເຖີງທຶນ SME ເປັນການສະໜອງທຶນໃຫ້ກັບຜູ້ປະກອບການດ້ານການທ່ອງທ່ຽວ ທີ່ຕິດພັນກັບການຜະລິດກະສິກຳ, ຫັດຖະກຳ ເພື່ອນຳໃຊ້ທຶນດັ່ງກ່າວປັບປຸງກິດຈະການ, ຂອດບໍລິການຕ່າງໆຂອງຕົນ ໃຫ້ດີຂຶ້ນ ໂດຍແມ່ນການສົ່ງເສີມຈາກລັດຖະບານ ແນໃສ່ຮອງຮັບການທ່ອງທ່ຽວ ລາວທ່ຽວລາວ