ມີເດຍລາວແຂວງອຸດົມໄຊ ກວດແກ້: ອ່ຽງຄຳ ວິລະສັກ
ໄລຍະ 8 ເດືອນຜ່ານມາ ສະຫະພັນກໍາມະບານ ແຂວງອຸດົມໄຊ ໄດ້ເຄື່ອນໄຫວຈັດຕັ້ງປະຕິບັດວຽກງານຕາມພາລະ, ບົດບາດ, ສິດ ແລະຫນ້າທີ່ຂອງຕົນຢ່າງຕັ້ງຫນ້າ ໂດຍສະເພາະແມ່ນ ການຈັດຕັ້ງປະຕິບັດວຽກງານຂໍ້ແຂ່ງຂັນ 5 ເປັນເຈົ້າ ຕິດພັນກັບການປະຕິບັດວຽກງານວິຊາສະເພາະ ເຊິ່ງສາມາດຍາດໄດ້ຜົນສໍາເລັດໃນຫລາຍດ້ານ ແລະ ມີຫລາຍຫນ້າວຽກທີ່ພົ້ນເດັ່ນ.

ສະຫາຍ ໄຊພອນ ຖົມປະດິດ ປະທານສະຫະພັນກໍາມະບານແຂວງ ໃຫ້ສໍາພາດວ່າ: ຜົນງານອັນພົ້ນເດັ່ນ ຂອງສະຫະພັນກໍາມະບານ ແຂວງອຸດົມໄຊ ທີ່ຍາດມາໄດ້ ໃນໄລຍະຜ່ານມາ ຂອງປີ 2021 ນີ້ ມີ: ດ້ານການສຶກສາອົບຮົມການເມືອງ-ແນວຄິດ, ການຂະຫຍາຍການຈັດຕັ້ງກຳມະບານເຂົ້າສູ່ຫົວຫນ່ວຍແຮງງານເອກະຊົນ, ການປົກປ້ອງແຮງງານ, ການແຂ່ງຂັນ ແລະຍ້ອງຍໍ ແລະ ກອງທຶນຊ່ວຍເຫຼືອເຊິ່ງກັນແລະກັນ. ໃນນັ້ນ ການສຶກສາອົບຮົມການເມືອງ-ແນວຄິດ ແມ່ນໄດ້ນຳເອົາແນວທາງນະໂຍບາຍຂອງພັກ, ລະບຽບກົດຫມາຍຂອງລັດ, ມະຕິ, ຄຳສັ່ງຕ່າງຂອງຂັ້ນເທິງ, ຂອງສະຫະພັນກຳມະບານລາວ ມາເຜີຍແຜ່, ເຊື່ອມຊຶມໃຫ້ແກ່ສະມາຊິກກຳມະບານ, ກຳມະກອນ ແລະຜູ້ອອກແຮງງານ ຢູ່ບັນດາສຳນັກງານ, ອົງການ, ລັດວິສາຫະກິດ,ຫົວຫນ່ວຍແຮງງານ ແລະ ສະຫະພັນກຳມະບານ 7 ເມືອງ, ການຂະຫຍາຍການຈັດຕັ້ງກຳມະບານ ເຂົ້າສູ່ຫົວຫນ່ວຍແຮງງານ ແມ່ນສາມາດແຕ່ງຕັ້ງຕາງຫນ້າຜູ້ອອກແຮງງານໄດ້ທັງຫມົດ 19 ແຫ່ງ, ຂັ້ນແຂວງ 11 ແຫ່ງ, ວຽກງານປົກປ້ອງແຮງງານ ໄດ້ມີການຈັດຝຶກອົບຮົມບົດບາດ ຍິງ-ຊາຍ ໃຫ້ແກ່ຜູ້ອອກແຮງງານຢູ່ບັນດາເມືອງ, ຕິດຕາມ, ຊຸກຍູ້ ແຮງງານຢູ່ບັນດາບໍລິສັດທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ວຽກງານຂະບວນການແຂ່ງຂັນ ແລະ ຍ້ອງຍໍ ໄດ້ເຕົ້າໂຮມສະມາຊິກກຳມະບານ ສ້າງຂະບວນການ ເພື່ອຂ່ຳນັບຮັບຕ້ອນວັນສຳຄັນຕ່າງໆ ແລະວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ແລະ ວຽກງານກອງທຶນ ຊ່ວຍເຫຼືອເຊິ່ງກັນແລະກັນ ໃນທົ່ວແຂວງ ມີສະມາຊິກກອງທຶນທັງຫມົດ 7 ພັນກວ່າສະຫາຍ ແລະ ມີເງິນກອງທຶນ ທັງຫມົດ 1 ຕື້ກວ່າກີບ ສາມາດປະຕິບັດນະໂຍບາຍໃຫ້ແກ່ສະມາຊິກເປັນປົກກະຕິ.

ສະຫາຍ ໄຊພອນ ຖົມປະດິດ ເວົ້າອີກວ່າ: ເພື່ອສືບຕໍ່ຮັກສາຜົນງານອັນພົ້ນເດັ່ນ ຕໍ່ຫນ້າທາງສະຫະພັນກຳມະບານແຂວງ ໄດ້ກຳນົດແຜນວຽກໂດຍລວມດັ່ງນີ້: ໜຶ່ງ: ສືບຕໍ່ສຶກສາອົບຮົມດ້ານການເມືອງ-ແນວຄິດ ໃຫ້ແກ່ສະມາຊິກກຳມະບານ. ສອງ: ສືບຕໍ່ລົງສົມທົບຫົວຫນ່ວຍແຮງງານໃນການແຕ່ງຕັ້ງຜູ້ຕາງຫນ້າຫົວຫນ່ວຍແຮງງານ,ການຈັດຕັ້ງກໍາມະບານ, ຂະຫຍາຍສະມາຊິກຳມະບານ. ສາມ: ສືບຕໍ່ຕິດຕາມ, ຊຸກຍູ້ ກໍາມະກອນ, ຜູ້ອອກແຮງງານຢູ່ບັນດາຫົວຫນ່ວຍແຮງງານໃນການຈ່າຍຄ່າແຮງງານໃຫ້ຖືກຕ້ອງຕາມກົດຫມາຍແຮງງານ, ປຸກລະດົມໃຫ້ສະມາຊິກກຳມະບານ ຮ່ວມໃຈກັນບໍລິຈາກເລືອດເພື່ອຊ່ວຍເຫຼືອສັງຄົມ. ສີ່. ສືບຕໍ່ປະຕິບັດວຽກງານກອງທຶນໃຫ້ມີປະສິດທິພາບ ແລະມີການເຕີບໃຫຍ່ຂະຫຍາຍຕົວ.

ໂອກາດນີ້ ສະຫາຍ ໄຊພອນ ຖົມປະດິດ ປະທານສະຫະພັນກໍາມະບານແຂວງ ຍັງໄດ້ຮຽກຮ້ອງໃຫ້ ສະຫະພັນກຳມະບານແຂວງ, ເມືອງ ທຸກພາກສ່ວນ ຈົ່ງພ້ອມກັນເປັນເຈົ້າການໃນການຈັດຕັ້ງປະຕິບັດວຽກງານກຳມະບານໃຫ້ມີຜົນສຳເລັດຕາມລະດັບຄາດຫມາຍ.