ມີເດຍລາວແຂວງອຸດົມໄຊ ແສງອາທິດ ກວດແກ້: ອ່ຽງຄຳ ວິລະສັກ
ເພື່ອເປັນການສະຫຼຸບວຽກງານ ແລະ ແລກປ່ຽນບົດຮຽນ ກ່ຽວກັບການແກ້ໄຂຄະດີ ແລະ ຄຳຮ້ອງທຸກ ຂອງປະຊາຊົນບັນດາເຜົ່າທີ່ສະເໜີເຖີງສະພາປະຊາຊົນ ແຂວງອຸດົມໄຊ ກັບພາກສ່ວນທີ່ກ່ຽວຂ້ອງ ໂດຍສະເພາະແມ່ນອົງການຕຸລາການ, ປກຊ-ປກສ ແລະ ພະແນກການທີ່ກ່ຽວຂ້ອງຈຳນວນໜຶ່ງ.

ພິທີມີການຜ່ານບົດສະຫຼຸບຕີລາຄາການເຄື່ອນໄຫວວຽກງານ ໄລຍະ 9 ເດືອນ ປີ 2021 ຂອງຄະນະກຳມະການຍຸຕິທຳ, ປກຊ-ປກສ ແລະ ສະພາປະຊາຊົນແຂວງອຸດົມໄຊ, ເຊິ່ງໄລຍະ 9 ເດືອນຜ່ານມາ ຄະນະພັກ, ຄະນະນຳອົງການປົກຄອງແຂວງ, ອົງການປົກຄອງກົດໝາຍ, ແນວລາວສ້າງຊາດ ແລະ ອົງການຈັດຕັ້ງມະຫາຊົນແຕ່ລະຂັ້ນ ກໍ່ໄດ້ເອົາໃຈໃສ່ເປັນເຈົ້າການໃນການຊີ້ນຳ-ນຳພາ ແລະຊຸກຍູ້ ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ທີ່ຢູ່ໃນຂົງເຂດທີ່ຕົນຮັບຜິດຊອບໄດ້ເປັນຢ່າງດີ, ຕີລາຄາການເຄື່ອນໄຫວວຽກງານໃນໄລຍະຜ່ານມາ ເຊັ່ນ: ການປະຕິບັດ ພາລະ, ບົດບາດ, ພິຈາລະນາ ແລະ ຮັບຮອງເອົານິຕິກຳທີ່ສຳຄັນຂອງແຂວງ ທັງໝົດ 29 ສະບັບ ໃນນັ້ນ ມີນິຕິກຳສ້າງໃໝ່ 27 ສະບັບ ແລະ ນິຕິກໍາ ປັບປຸງໃຫມ່ 2 ສະບັບ, ໄດ້ຮັບຄໍາຮ້ອງທຸກເຂົ້າມາສະພາ ທັງໝົດ 54 ເລື່ອງ, ໃນນັ້ນ ອາຍາ 10 ເລື່ອງ ແລະ ແພ່ງ 22 ເລື່ອງ, ເຮັດໜັງສືສະເໜີເຖິງພາກສ່ວນທີ່ກ່ຽວຂ້ອງ ລາຍງານຜົນການດໍາເນີນ ແລະ ແກ້ໄຂຄະດີຕ່າງໆ ທີ່ຕິດພັນກັບຄຳຮ້ອງທຸກ ຈໍານວນ 3 ສະບັບ ໄດ້ຮັບແຈ້ງຕອບ ຈາກພາກສ່ວນທີ່ກ່ຽວຂ້ອງ ຈຳນວນ 7 ສະບັບ (7 ເລື່ອງ) ນອກນີ້ ຍັງມີຂົງເຂດວຽກງານປ້ອງກັນຄວາມສະຫງົບ, ຂົງເຂດໄອຍະການປະຊາຊົນ, ສານປະຊາຊົນ, ຍຸຕິທຳ (ຫ້ອງຈັດຕັ້ງປະຕິບັດຄຳຕັດສີນຂອງສານ) ຂົງເຂດກວດກາລັດ ແລະ ອື່ນໆ.

ພິທີດັ່ງກ່າວໄດ້ຈັດຂື້ນໃນວັນທີ 10 ກັນຍານີ້ ທີ່ຫ້ອງປະຊຸມອົງການໄອຍະການປະຊາຊົນແຂວງ ໂດຍການເປັນປະທານຂອງ ທ່ານ ຄຳດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງອຸດົມໄຊ, ມີຄະນະປະຈຳສະພາປະຊາຊົນ, ປກຊ-ປກສ, ຕາງໜ້າພະແນກການ ແລະອົງການປົກປ້ອງກົດໝາຍ ເຂົ້າຮ່ວມ.