ມີເດຍລາວແຂວງສາລະວັນ ທ່ານ ໜູຄໍາ ສີສະຫວັດ ຮອງເຈົ້າເມືອງສາລະວັນ ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະແກ້ການແຜ່ລະບາດພະຍາດໂຄວິດ-19 ເມືອສາລະວັນ ໄດ້ລາຍງານສາຍດ່ວນໃຫ້ສື່ມວນຊົນແຂວງສາລະວັນ ໃນຕອນ ເຊົ້າຂອງວັນ 10 ກັນຍາ 2021 ຊາບວ່າ: ສະພາບລວມການຈັດຕັ້ງປະຕິບັດຄຳສັ່ງ ເລກທີ 14/ຈມ.ສວ ລົງວັນ 09/09/2021 ທຸກຄົນໃຫ້ການຮ່ວມມືຢ່າງເປັນເຈົ້າການ ດ້ວຍຄວາມຮັບຜິດຊອບສູງ, ໃນນັ້ນໄດ້ປິດກິດຈະການຮ້ານຂາຍອາຫານ, ຂາຍເຄື່ອງຍ່ອຍ, ລວມໄປເຖິງຮ້ານຂາຍເສື້ອຜ້າອື່ນໆ ແລະຕະຫຼາດເມືອງສາລະວັນ,

ເຊິ່ງໄດ້ມີການຕັ້ງດ່ານປິດກັ້ນຕາມເສັ້ນທາງລະຫ່ວາງບ້ານ ຫາ ບ້ານ ຕາມຈຸດເຂດບ້ານຕ່າງໆ, ເຂັ້ມງວດບ້ານເຂດແດງເຊັ່ນ:ບ້ານ ນາເຫຼັກ, ບ້ານ ຫຼັກສອງ, ບ້ານນຄັ້ນທະລາດ, ບ້ານ ນາກົກໂພ, ບ້ານວັດກາງ, ບ້ານໂພນແກ້ວ, ບ້ານເຕົ້າປູນ, ບ້ານ ນາໂດນ ແລະເຂດຕະຫຼາດເມືອງສາລະວັນ, ບ້ານເຂດເຫຼືອງມີບ້ານ ນາໄຊ, ບ້ານ ບຶງໄຊ, ບ້ານທ່າເມືອງເຊ, ບ້ານໂພນໃຜ ແລະບ້ານ ນາຄູ, ສ່ວນບ້ານອື່ນທີ່ບໍ່ຢູ່ໃນເຂດແດງ ແລະເຂດເຫຼືອງແມ່ນໄດ້ໃຫ້ສືບຕໍ່ປະຕິບັດແຈ້ງການຂອງທ່ານເຈົ້າແຂວງສາລະວັນ ເລກທີ 19/ຈຂ.ສວ ວັນທີ 01 ກັນຍາ 2021 ແລະຄຳສັ່ງດ່ວນ ເລກທີ 13/ຈມ.ສວ ວັນທີ 04 ກັນຍາ 2021. ໂດຍ:ສິດຕາ ເພັດວົງສາ