ມີເດຍລາວແຂວງເຊກອງ ໃນໂອກາດທີ່ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ເຂົ້າຮ່ວມເປັນປະທານກອງປະຊຸມສະຫຼຸບວຽກງານອົງການປົກຄອງແຂວງປະຈໍາເດືອນ ສິງຫາ ທີ່ສໍາເລັດລົງໃນວັນທີ 10 ກັນຍາ ນີ້ ທ່ານໄດ້ເນັ້ນໃຫ້ອົງການປົກຄອງແຂວງເປັນເຈົ້າການປະຕິບັດບາງວຽກງານຈຸດສຸມ ໃນເດືອນກັນຍາ (9) 2021 ຄື: 1. ໃຫ້ສືບຕໍ່ສຶກສາອົບຮົມວຽກງານການເມືອງແນວຄິດ ແລະສ້າງຄວາມເຂົ້າໃຈຢ່າງເລິກເຊິ່ງ ຕໍ່ສະພາບການ ແລະເງື່ອນໄຂໃໝ່ ທີ່ເລັ່ງທວງໃຫ້ກຳລັງປະກອບອາວຸດພວກເຮົາ ສ້າງການຫັນປ່ຽນຢ່າງແຂງແຮງເລິກເຊິ່ງ ແລະຮອບດ້ານ, ປະກອບສ່ວນການຫັນລົງກໍ່ສ້າງຮາກຖານການເມືອງ, ສ້າງ ແລະຂະຫຍາຍຕາໜ່າງກຳລັງປະກອບອາວຸດຢູ່ຮາກຖານໃຫ້ເຂັ້ມແຂງ-ໜັກແໜ້ນ, ເປັນເຈົ້າການປະຕິບັດວາລະແຫ່ງຊາດ ກ່ຽວກັບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ຕິດພັນກັບການປະຢັດ-ຕ້ານການຟຸມເຟືອຍ ທັງຮັບປະກັນໃຫ້ສອງກຳລັງປະກອບອາວຸດ ເປັນກຳລັງທີ່ປອດຢາເສບຕິດ (ໂດຍປະຕິບັດຕາມການແບ່ງງານ-ແບ່ງຄວາມຮັບຜິດຊອບ) ຢ່າງເປັນເຈົ້າການ ແລະ ມີຄວາມຮັບຜິດຊອບສູງ.

2. ສືບຕໍ່ເອົາໃຈໃສ່ປ້ອງກັນ, ສະກັດກັ້ນການແຜ່ລະບາດຂອງພະຍາດ ໂຄວິດ 19 ໃນຂອບເຂດທົ່ວແຂວງ ຕິດພັນກັບການໂຄສະນາໃຫ້ປະຊາຊົນເປັນເຈົ້າປ້ອງກັນຕົນເອງ, ພ້ອມທັງເລັ່ງການສັກຢາວັກຊິນປ້ອງກັນໂຄວິດ ໃຫ້ໄດ້ຫລາຍຂຶ້ນ; 3. ການບໍລິຫານດ້ານເສດຖະກິດ ອັນສະເພາະໜ້າທີ່ຮີບດ່ວນ ແມ່ນສຸມໃສ່ການຈັດຕັ້ງປະຕິບັດວາລະແຫ່ງຊາວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນຂອງແຂວງເຊກອງ; 4. ກະກຽມຄວາມພ້ອມຮອບດ້ານ ເພື່ອປ້ອງກັນ, ເຝົ້າລະວັງ ແລະ ມີມາດຕະການຕອບໂຕ້ ສະພາບໄພພິບັດທາງທໍາມະຊາດ ທີ່ອາດຈະເກີດຂຶ້ນໃນລະດູຝົນປີນີ້ ໃຫ້ທັນກັບສະພາບການ.

5.ກ່ຽວບກັບການສ້າງນິຕິກຳຕ່າງໆ ໃຫ້ຄະນະຮັບຜິດຊອບ ກໍ່ຄືພະແນກການ-ຂະແໜງການກ່ຽວຂ້ອງ ສືບຕໍ່ປັບປຸງເນື້ອໃນບັນດານິຕິກຳດັ່ງກ່າວນັ້ນ ທີ່ໄດ້ມາຜ່ານໃນກອງປະຊຸມອົງການປົກຄອງ ຕາມການປະກອບຄຳຄິດຄຳເຫັນຂອງບັນດາຜູ້ແທນກອງປະຊຸມໃຫ້ທັນຕາມເວລາທີ່ກຳນົດໄວ້ ທັງຮັບປະກັນຄວາມຖືກຕ້ອງ-ສອດຄ່ອງ ເພື່ອນຳເຂົ້າຜ່ານກອງປະຊຸມສະພາປະຊາຊົນແຂວງ ຮັບຮອງຢ່າງເປັນທາງການໃນມໍ່ໆນີ້; ທັງໝົດນີ້ ຂໍຮຽກຮ້ອງໃຫ້ທຸກຄົນເອົາໃຈໃສ່ຊີ້ນຳ, ຈັດຕັ້ງປະຕິບັດໃຫ້ເກີດຜົນສູງສຸດ, ສ້າງບາດລ້ຽວໃໝ່ໃນການພັດທະນາຂະແໜງການ ກໍຄືແຂວງເຊກອງ ໃຫ້ກ້າວຂຶ້ນຕາມຈຸດໝາຍສັງຄົມນິຍົມ.
ຂ່າວ : ພຸດທະສອນ