ມີເດຍລາວແຂວງບໍ່ແກ້ວ ເພື່ອປະຕິບັດຕາມມະຕິຕົກລົງ ຂອງກົມການເມືອງສູນກາງພັກ ສະບັັບເລກທີ 06/ກມສພ ລົງວັນທີ 25 ກຸມ ພາ 2021 ວ່າດ້ວຍການຍຸບເລີກກະຊວງວິທະຍາສາດ ແລະ ເຕັກໂນໂລຊີ. ໃນຕອນເຊົ້າ ຂອງວັນທີ 10 ກັນຍາ 2021 ນີ້ ຢູ່ທີ່ສະຫ້ອງປະຊຸມກອງບັນຊາການ ປກສ ເມືອງເມິງ, ແຂວງບໍ່ແກ້ວ ໄດ້ຈັດພິທີມອບ-ໂອນຫ້ອງການວິທະຍາສາດ ແລະ ເຕັກໂນໂລຊີເມືອງ ໃຫ້ຫ້ອງການທີ່ກ່ຽວຂ້ອງຂອງເມືອງ ໂດຍພາຍໃຕ້ການເປັນປະທານ ຂອງທ່ານ ສົມສັກ ປິ່ນແກ້ວ, ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆເມິງ; ເຊິ່ງເປັນກຽດເຂົ້າຮ່ວມໃນພິທີດັ່ງກ່າວ ໂດຍທ່ານ ເພັງສອນ ແກ້ວວິໄລ, ຮອງເລຂາພັກແຂວງ, ຜູ້ຊີ້ນໍາວຽກງານແນວຄິດ – ການເມືອງ ແລະ ວຽກງານຂົງເຂດພັກ – ພະນັກງານ, ມີດັນດາທ່ານ ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ – ຮອງຫົວໜ້າການພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ຫຸ່ມແກ້ວ ອ້ອຍແຂມທອງ, ຄະນະປະຈໍາພັກເມືອງ, ໄດ້ຜ່ານຂໍ້ຕົກ ຂອງທ່ານເຈົ້າເມືອງ ສະບັບເລກທີ 234/ຈມ ວ່າດ້ວຍການຍຸບເລີກຫ້ອງການວິທະຍາສາດ ແລະ ເຕັກໂນໂລຊີ ແລະ ຜ່ານຂໍ້ຕົກລົງ ຂອງທ່ານເຈົ້າເມືອງ ວ່າດ້ວຍການສັບຊ້ອນບ່ອນປະຈໍາການໃໝ່ຂອງພະນັກງານລັດຖະກອນ ເຊິ່ງເຫັນດີເປັນເອກະພາບຕົກລົງຍົກຍ້າຍ ທ່ານ ນາງ ສີອໍາພອນ ອິນທະພອນ, ຫົວໜ້າຫ້ອງການວິທະຍາສາດ ແລະ ເຕັກໂນໂລຊີເມືອງ ໄປປະຈໍາການຢູ່ຫ້ອງການໂຄສະນາ – ອົບຮົມເມືອງ ດໍາລົງຕໍາແໜ່ງເປັນຮອງຫົວໜ້າຫ້ອງການໂຄສະນາ – ອົບຮົມເມືອງ, ຍົກຍ້າຍ ນາງ ຄໍາຫຼ້າ ອຸດົມສຸກ, ຮອງຫົວໜ້າຫ້ອງການວິທະຍາສາດ ແລະ ເນັກໂນໂລຊີເມືອງ ໄປປະຈໍາການ ຢູ່ຫ້ອງການອຸດສາຫະກໍາ ແລະ ການຄ້າເມືອງ, ດໍາລົງຕໍາແໜ່ງເປັນຮອງຫົວໜ້າຫ້ອງການອຸດສາຫະກໍາ ແລະ ການຄ້າເມືອງ ແລະ ຍົກຍ້າຍ ທ່ານ ສົມທອງ ແຊລີ, ຕໍ່າແໜ່ງຫົວໜ້າໜ່ວຍງານ ໄປປະຈໍາການຢູ່ຫ້ອງການແນວລາວສ້າງຊາດເມືອງ; ຈາກນັ້ນໃນພິທີຍັງໄດ້ເຊັນບົດບັນທຶກການມອບ – ຮັບຢ່າງເປັນທາງການ ໂດຍຊ່ອງໜ້າການນໍາຂອງແຂວງ – ຂອງເມືອງເຂົ້າຮ່ວມເປັນສັກຂີພິຍານ.

ໃນໂອກາດທີ່ເຂົ້າຮ່ວມໃນພິທີດັ່ງກ່າວ ທ່ານ ເພັງສອນ ແກ້ວວິໄລ, ຮອງເລຂາພັກແຂວງ ໄດ້ມີຄໍາເຫັນໂອ້ລົມ ແລະ ເນັ້ນໜັກໃຫ້ບັນດາທ່ານທີ່ຖືກສັບຊ້ອນໄປຮັບໜ້າທີ່ໃໝ່ ໃຫ້ມີແນວຄິດອຸ່ນອ່ຽນທຸ່ນທ່ຽງ, ສຶບຕໍ່ປະຕິບັດໜ້າທີ່ວຽກງານວິຊາສະເພາະຂອງຕົນ ໃນຂົງເຂດໃໝ່ດ້ວຍຄວາມຮັບຜິດຊອບສູງ, ໃຫ້ເອົາໃຈໃສ່ສຶກສາຄົ້ນຄວ້າຮໍ່າຮຽນບັນດານິຕິກໍາຕ່າງໆ ໃນຂົງເຂດທີ່ຍົກຍ້າຍໄປຮັບຜິດຊອບບ່ອນໃໝ່ໃຫ້ເລິກເຊິ່ງກວ້າງຂວາງ ເພື່ອນໍາມາໝູນໃຊ້ເຂົ້າໃນໜ້າທີ່ວຽກງານໃຫ້ມີປະສິດທິຜົນ ແລະ ທ່ານຍັງໄດ້ເນັ້ນໜັກວ່າ ການປັບປຸງ, ຍົກຍ້າຍ, ສັບຊ້ອນໜ້າທີ່ຂອງພະນັກງານ ແມ່ນວຽກງານທີ່ຈະຕ້ອງໄດ້ດໍາເນີນໄປເປັນປົກກະຕິ ເພື່ອເຮັດໃຫ້ກົງຈັກລັດມີຄວາມເຂັ້ມແຂງ, ສອດຄ່ອງກັບຄວາມຮູ້, ຄວາມສາມາດ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ – ລັດ ໃນແຕ່ລະໄລຍະ. ຂ່າວ: ອຸ່ນຄໍາ ຂັນວາລິດ