ມີເດຍລາວແຂວງຈຳປາສັກ
ວຽກງານການປູກຝັງ ແລະ ລ້ຽງສັດ ແມ່ນໄດ້ຕິດພັນໂດຍກົງໃນການດຳລົງຊີວິດຂອງພໍ່ແມ່ຊາຊົນລາວບັນດາເຜົ່າມາແຕ່ດົນນານ ບໍ່ວ່າໃນອາດີດກໍ່ຄືປັດຈຸບັນການລ້ຽງສັດກໍ່ຖືວ່າມີຄວາມສຳຄັນຫຼາຍ ນອກຈາກຈະເປັນການຜະລິດສະບຽງອາຫານເກັບເພື່ອໄວ້ບໍລິໂພກພາຍໃນຄອບຄອບຄົວແລ້ວ ຍັງລ້ຽງເພື່ອຂາຍສ້າງລາຍຮັບໃຫ້ກັບຄອບຄົວໄດ້ມີຊີວິດການເປັນຢູ່ທີ່ດີຂື້ນ.ດັ່ງນັ້ນໃນວັນທີ 10 ກັນຍາ 2021 ນີ້: ທ່ານ ສອນສະຫວັນ ສີວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆຊະນະສົມບູນ ແລະ ທ່ານ ບຸນເກິດ ຄຳພິທັກ ຮອງຫົວໜ້າຂະແໜງລ້ຽງສັດ ແລະ ການປະມົງ ພະແນກກະສິກຳ ແລະ ປ່າໄມ້ແຂວງຈຳປາສັກ ພ້ອມດ້ວຍ ຫ້ອງການທີ່ກ່ຽວຂ້ອງຂອງເມືອງ.ໄດ້ເຄື່ອນໄຫວລົງຢ້ຽມຢາມ ແລະ ຊຸກຍູ້ ຄອບຄົວ ຄອບຄົວພໍ່ ທອງດໍາ ບຸນໄຊຍະລັດ ຕົວແບບດີເດັ່ນໃນການສ້າງເສດຖະກິດຜະລິດລູກປາຂາຍ ແລະ ລ້ຽງປາຊີ້ນຂາຍ ເປັນສິນຄ້າຈົນສາມາດຈົນສ້າງລາຍຮັບໃຫ້ກັບຄອບຄົວຂອງຕົນ ປີໜຶ່ງບໍ່ຕໍ່າກວ່າ 600 ລ້ານກີບ.

ໃນໂອກາດທີ່ ທ່ານ ສອນສະຫວັນ ສີວິໄລ ເຈົ້າເມືອງໆຊະນະສົມບູນ ກໍ່ໄດ້ໃຫ້ສຳພາດເຖີງຈຸດປະສົງໃນການເຄື່ອນໄຫວຄັ້ງນີ້ວ່າ : ກໍ່ເພື່ອເປັນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍຄວາມຫຍຸ້ງຍາກທາງດ້ານເສດຖະກິດການເງີນ ແລະ ຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫ່ຍຄັ້ງທີ VIII ຂອງອົງຄະນະບໍລິຫານງານພັກເມືອງຊະນະສົມບູນ ກໍ່ຄືແຜນພັດທະນາເສດຖະກິດ – ສັງຄົມຂອງເມືອງໃຫ້ປະກົດຜົນເປັນຈິງ.ສະນັ້ນທາງອຳນາດການປົກຄອງເມືອງ ຈຶ່ງໄດ້ປ-ສົມທົບກັບຂະແນກການທີ່ກ່ຽວຂ້ອງແຂວງ ພ້ອມກັນລົງຊູກຍູ້ ແລະ ໃຫ້ກຳລັງໃຈຕໍ່ກັບຄອບຄົວຕົວແບບຊາວກະສິກອນທີ່ຢຶດຖືເອົາອາຊີບການປູກຝັງ ແລະ ລ້ຽງສັດ ພາຍໃນເມືອງ ໂດຍສະເພາະຄອບຄົວຂອງ ພໍ່ ທອງດໍາ ບຸນໄຊຍະລັດ ເຊີ່ງນັບວ່າເປັນຕົວແບບດີເດັ່ນໃຫ້ແກ່ສັງຄົມໃນການຜະລິດທາງດ້ານກະສິກຳຈົນສາມາດສ້າງລາຍຮັບໃຫ້ກັບຄອບຄົວໄດ້ມີຊີວິດການເປັນຢູ່ທີ່ດີຂື້ນ ຫຼື ສາມາດກຸ່ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໄດ້.ເປັນບ່ອນສ້າງວຽກເຮັດງານທຳກະຈາຍລາຍໄດ້ໃຫ້ກັບພໍ່ແມ່ປະຊາຊົນພາຍໃນພື້ນທີ່,ເປັນບອນສະໜອງທາງດ້ານສະບຽງອາຫານໃຫ້ກັບພໍ່ແມ່ປະຊາຊົນບັນດາເຜົ່າທົ່ວເມືອງ ແລະ ແຂວງ ໂດຍສະເພາະໃນໄລຍະທີ່ມີການລະບາດຂອງພະຍາດໂຄວິດ 19.

ພໍ່ ທອງດໍາ ບຸນໄຊຍະລັດ ອາຍຸ 62 ປີ ເຈົ້າຂອງໜອງປາໄດ້ໃຫ້ສຳພາດກັບຜູ້ສື່ຂ່າວວ່າ: ແຕ່ເດີມມາຂ້າແມ່ນລູກຫຼານປະຊາຊົນບ້ານພັດທະນາອອກເມືອງ ເມືອງຊະນະສົມບູນ ແຂວງຈໍາສັກ,ໃນຄອບຄົວມີຈໍານວນສະມາຊິກທັງໝົດ 7 ຄົນ.ຍິງ 3 ຄົນ ແລະ ມີແຮງງານຕົ້ນຕໍ 4 ຄົນ.ຍິງ 2 ຄົນ.ປັດຈຸບັນແມ່ນຖືເອົາອາຊີບຜະລິດລູກປາຂາຍເປັນສິນຄ້າ,ເຊິ່ງມີສະຖານທີ່ທໍາການຜະລິດຢູ່ ບ້ານອອກເມືອງ ເມືອງຊະນະສົມບູນ ແຂວງຈໍາປາສັກ.

ໃນການຜະລິດລູກປາຂອງຂ້າພະເຈົ້າໄດ້ເລີ້ມເເຕ່ປີ 2014.ໂດຍນຳໃຊ້ທຶນຂອງຕົນເອງ 100% ,ເຊີ່ງມີເນື້ອທີ່ທັງໝົດ 7,8 ເຮັກຕາ,ມີໜອງປາທັງໝົດ 26 ໜອງ,ມີອ່າງປະສົມພັນປາຈໍານວນ 29 ອ່າງ,ສ່ວນຊະນິດປາທີ່ນໍາມາທໍາການຜະລິດມີຢູ່ 2 ຊະນິດປາຄື: ປານີນ,ປາປາກ) ໂດຍໃນປີໜຶ່ງແມ່ນສາມາດຜະລິດລູກຂາຍອອກສູ້ທ້ອງຕະຫຼາດສະເລ່ຍໄດ້ 4.400.000 ໂຕ/ຕໍ່ປີ.ໃນນັ້ນປານີນສະເລ່ຍໄດ້ 2.400.000ໂຕ/ຕໍ່ປີ,ປາປາກສະເລ່ຍໄດ້ 2.000.000ໂຕ/ຕໍ່ປີ,ສ່ວນຕະຫຼາດຮອງຮັບແມ່ນໄດ້ຈັດສົ່ງຂ້າຍປີ້ກ ແລະ ສົ່ງໃຫ້ກັບຮ້ານຂາຍລູກປາທົ່ວແຂວງຈຳປາສັກ ແລະ ປະຊາຊົນພາຍໃນເມືອງຊະນະສົມບູນ.ເຊີ່ງລາຄ່າແມ່ນຈະຂາຍໂດຍອິງຕາມຂະໜາດແຕ່ລະຊະນິດຂອງລູກປາ.ນອກຈາກການຜະລິດລູກປາຂາຍແລ້ວ ຍັງໄດ້ລຽ້ງປາຊີ້ນເພື່ອຈໍາໜ່າຍຂາຍເປັນສີນຄ້າອີກຈໍານວນໜື່ງ.

ຈາກການຜະລີດລູກປາຂາຍ ແລະ ລ້ຽງປາຊີ້ນຂາຍເປັນສີນຄ້າສາມາດສະເລຍຜົນລາຍຮັບທີ່ຈາກການຂາຍລູກປາ 600.000.000 ກີບ/ຕໍ່ປີ ແລະ ລາຍຮັບຈາກການຂາຍປາຊີ້ນ 40.000.0000 ກີບ/ຕໍ່ປີ ລວມລາຍຮັບທີ່ໄດ້ຈາກການຂາຍລູກປາ ແລະ ຂາຍປາຊີນທັງໝົດ 640.000.000 ກີບ/ຕໍ່ປີ.ໃນນັ້ນໄດ້ຫັກອອກພາກຈ່າຍເປັນຕົ້ນທຶນການຜະລິດຄື: ຈ່າຍຄ່າຫົວອາຫານ 330.000.000 ກີບ/ຕໍ່ປີ, ຈ່າຍຄ່າອຸປະກອນຮັບໃຊ້ 42.000.000 ກີບ/ຕໍ່ປີ,ຈ່າຍຄ່າແຮງງານ 39.000.000 ກີບຕໍ່ປີ,ຈ່າຍຄ່າໄຟຟ້າ 14.400.000 ກີບຕໍ່ປີ ລວມ 425.400.000 ກີບ/ຕໍ່ປີ.ສະເລຍລວມຜົນກຳໄລສຸດທິໄດ້ທັງໝົດ 214.600.000 ກີບ/ຕໍ່ປີ.

ສັງລວມແລ້ວກິດຈະກໍາເຮັດການຜະລິດລູກປາ ແລະ ລ້ຽງປາຊີ້ນຂອງຂ້າພະເຈົ້າ ແມ່ນສາມາດສ້າງລາຍໄດ້ໃຫ້ແກ່ຄອບຄົວຂ້າພະເຈົ້າ ມີຊີວິດການເປັນຢູ່ດີຂື້ນ ສາມາດມີເຮືອນຢູ່ທີ່ຖາວອນ,ມີລົດໃຫ່ຍຂີ,ສາມາດສົງລູກຮຽນຈົນຈົບ ແລະ ເປັນພະນັກງານໝົດທຸກຄົນ.

ພໍ່ ທອງດຳ ບຸນໄຊຍະລັດ ກ່າວຕື່ມວ່າ: ໃນການເຮັດທຸລະກິດຜະລິດລູກປາ ແລະ ລ້ຽງປາຂາຍ ໃນໄລຍະຜ່ານຂໍ້ສະດວກທາງອໍານາດການປົກຄອງເມືອງຊະນະສົມບູນ ກໍ່ຄືຫ້ອງການກະສິກໍາແລະປ່າໄມ້ເມືອງ ກໍ່ໄດ້ເອົາໃຈໃສ່ຊຸກຍູ້ໃຫ້ຄຳແນະກ່ຽວເຕັກນິກວິຊາການໃນການລ້ຽງປາແບບໃໝ່ໆຕິດຕາມຢ່າງໃກ້ຊິດ.ເຮັດໃຫ້ການຜະລິດລູກປາຂອງຂ້າພະເຈົ້າປະສົບຜົນສໍາເລັດເປັນຢ່າງດີ.ດ້ານຂໍ້ຫຍຸ້ງຍາກ – ເສັ້ນທາງເຂົ້າຫາໜອງປາຍັງມີຄວາມຫຍຸ້ງຍາກຫຼາຍ ເຮັດໃຫ້ການເດີນທາງໃນການຕິດຕາມກວດກາວຽກງານ,ການສົ່ງລູກປາມີຄວາມລໍາບາກຊັກຊ້າ,ກໍາລັງໄຟຟ້າບໍ່ພຽງພໍເຮັດໃຫ້ການເພາະພັນລູກປາມີຜົນກະທົບ ແລະ ຍ້ອນການລະບາດຂອງພະໂຄວິດ 19 ສົ່ງຜົນກະທົບໜັກພໍສົມຄວນໃນການດຳເນີນທຸລະກິດລ້ຽງປາ ແລະ ຕໍ່ກັບທິດທາງແຜນການໃນຕໍ່ໜ້າ ຂ້າພະເຈົ້າຈະຍຶດໜັ້ນຕໍ່ກັບອາຊິບດັ້ງກ່າວໃຫ້ມີຄວາມໜັ້ນຄົງ,ສຶກສາຄວາມຮູ້ເພີ້ມເຕີມເພຶ່ອເສີມຂະຫຍາຍກິດຈະການຜະລິດລູກປາໃຫ້ໄດ້ຫຼາຍຊະນິດຂື້ນຕື່ມ ແລະ ເພຶ່ອພັດທະນາເສດຖະກິດກໍ່ຄືພັດທະນາຄອບຄົວຂອງຕົ້ນໃຫ້ດີຂື້ນກວ່າເດີມ.

ໂອກາດນີ້: ພໍ່ ທອງດຳ ບຸນໄຊຍະລັດ ຍັງໄດ້ຝາກເຖີງພໍ່ແມ່ປະຊາຊົນທີ່ສົນໃຈຢາກດຳເນີນທຸລະກິດກ່ຽວກັບການຜະລິດລູກປາ ແລະ ລ້ຽງປາຂາຍເປັນສິນຄ້າ ຫຼື ບໍລິໂພກພາຍໃນຄອບຄົວກໍ່ສາມາດເຂົ້າມາແລກປຽ່ນຖອດຖອນບົດຮຽນຫຼື ຢາກໄດ້ລູກປາ ເພື່ອໄປລ້ຽງ ຫຼື ໄປຂາຍ ກໍ່ສາມາດຕິດຕໍ່ພົວພັນໄດ້ທີ່ໝາຍເລກໂທລະສັບ 020 22273331 . ເຊີ່ງສະຖານທີ່ໜອງປາແມ່ນຕັ້ງຢູ່ທາງເຂົ້າບ້ານພັດທະນາອອກເມືອງ ເມືອງຊະນະສົມບູນ ແຂວງຈຳປາສັກ ຫຼື ແຄມເສັ້ນທາງເລກທີ 11 ນັບແຕ່ເສັ້ນທາງຫຼວງເລກທີ 13 ແຍກທາງເຂົ້າບ້ານຊອນພາກ ເຂົ້າໄປຫາ ບ້ານອອກເມືອງໄລຍະທາງຍາວປະມານ 10 ກິໂລແມັດ.
ບັນນາທິການຂ່າວແຂວງ ຂ່າວ ແລະ ພາບ : ທ.ແຫຼມສີນໄຊ ສໍປະເສີດ ຫ້ອງ ຖວທ ເມືອງຊະນະສົມບູນ.