ມີເດຍລາວແຂວງຈຳປາສັກ
ວັນທີ 10 ກັນຍາ 2021, ທີ່ແຂວງຈຳປາສັກ. ອົງການພຸດທະສາສະໜາສັມພັນ ແຫ່ງ ສປປ ລາວ, ໂຄງການ ບຳບັດທຸກ ບຳຣຸງສຸກ ວັດອົງຕື້ວໍຣະມະຫາວິຫານ ຮ່ວມກັບ ຄະນະກຳມະການຈັດສ້າງວັດຖຸມຸງຄຸນພະເຈົ້າໃຫຍ່ອົງຕື້ ລຸ້ນ ປະຕິສັງຂອນ ໄດ້ມອບປັດໄຈ ເພື່ອຊ່ວຍເຫລືອພີ່ນ້ອງຊາວລາວ ທີ່ ສູນກັກກັນ ແລະ ປິ່ນປົວພະຍາດໂຄວິດ-19 ຢູ່ແຂວງຈຳປາສັກ ຈຳນວນ 60 ລ້ານກີບ ແລະ ມອບປັດໄຈຮ່ວມປະຕິສັງຂອນ ຫໍໄຕຣ ວັດພຸດທະວັນນາຣາມ (ວັດບ້ານເມືອງກາງ) ເມືອງຈຳປາສັກ ແຂວງຈຳປາສັກ ຈຳນວນ 20 ລ້ານກີບ. ທີ່ໄດ້ມີພິທີເຊັນສັນຍາ ການບູລະນະ ແລະປະຕິສັງຂອນ ເມື່ອວັນທີ 9 ກັນຍາຜ່ານມານີ້.

ມອບປັດໄຈໂດຍ ພຣະຫຼັກແກ້ວມະຫາສຸເມທາທິບໍດີ (ມະຫາບຸນມາ ສິມມາພົມມະຫາເຖຣະ) ອົງຮັກສາການປະທານສູນກາງ ອົງການພຸດທະສາສະໜາສຳພັນ ແຫ່ງ ສປປ ລາວ ແລະ ກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ມີ ພຣະອາຈາຣຍ໌ ພວງປະເສີດ ພູມະວົງສ໌ ຄະນະບໍລິຫານງານປະຈຳການ ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ, ຮອງຫົວໜ້າກັມມາທິການສຶກສາສົງ ສູນກາງ, ຜູ້ອຳນວຍການວິທະຍາໄລສົງອົງຕື້ ພ້ອມດ້ວຍ ຄະນະກຳມະການຈັດສ້າງວັດຖຸມຸງຄຸນພະເຈົ້າໃຫຍ່ອົງຕື້ ລຸ້ນ ປະຕິສັງຂອນ, ມີ ພຣະອາຈາຣຍ໌ ສຸວັນ ຈັນທະລາດ ເຈົ້າຄະນະແຂວງ, ປະທານ ອພສ ແຂວງຈຳປາສັກ, ທ່ານ.ນາງ ວາດສະໜາ ສີລິມາ ປະທານແນວລາວສ້າງຊາດແຂວງ ມີ ພຣະເຖຣານຸເຖຣະ ພ້ອມທັງອອກຕົນຍາດໂຍມ ອຸບາສົກອຸບາສິກາ ພຸດທະສາສະນິກະຊົນ ເຂົ້າຮ່ວມ.

ພຣະຍອດຄຳວໍຣະທັມມຸນີ (ພຣະອາຈາຣຍ໌ ພວງປະເສີດ ພູມະວົງສ໌) ໄດ້ກ່າວວ່າ: ການມອບປັດໄຈ ເພື່ອຊ່ວຍເຫລືອພີ່ນ້ອງຊາວລາວ ທີ່ ສູນກັກກັນ ແລະ ປິ່ນປົວພະຍາດໂຄວິດ-19 ຢູ່ແຂວງຈຳປາສັກ ນີ້ແມ່ນ ໃນໂຄງການບຳບັດທຸກ ບຳຣຸງສຸກ ປະຊາຊົນ ດ້ວຍນ້ຳໃຈອັນເມດຕາກາຣຸນ ແລະ ຄວາມຫ່ວງໃຍຕໍ່ປະຊາຊົນລາວ ຂອງ ອົງການພຸດທະສາສະໜາສັມພັນ ແຫ່ງ ສປປ ລາວ, ກໍຄືພຸດທະສາສະນິກະຊົນລາວບັນດາເຜົ່າ ໃນໄລຍະ ທີ່ສັງຄົມລາວ ກໍາລັງປະສົບການແຜ່ລະບາດຂອງພະຍາດໂຄວິດ 19 ເຊິ່ງມີຫຼາຍແຂວງ ທີ່ຍັງມີການແຜ່ລະບາດໃນຊຸມຊົນ ແລະ ຜົນຂອງການແຜ່ລະບາດຂອງ ເຮັດໃຫ້ເກີດຄວາມຫຍຸ້ງຍາກທາງດ້ານ ການດຳຣົງຊີວິດ ເສດຖະກິດຕ່າງໆ ຢ່າງຫຼວງຫຼາຍ.
ໂອກາດດັ່ງກ່າວ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງຄວາມ ຊົມຊື່ນ ຍິນດີມຸທິຕາ ຂອບໃຈໃນຄວາມເມດຕາກາຣຸນ ພຣະເດດພຣະຄຸນ ບຳບັດທຸກ ບຳຣຸງສຸກ ເພື່ອຊ່ວຍເຫລືອພີ່ນ້ອງຊາວລາວ ທີ່ ສູນກັກກັນ ແລະ ປິ່ນປົວພະຍາດໂຄວິດ-19 ຢູ່ແຂວງຈຳປາສັກ ແລະ ປັດໄຈຮ່ວມປະຕິສັງຂອນ ຫໍໄຕຣ ວັດພຸດທະວັນນາຣາມ ວັດບ້ານເມືອງກາງ ເມືອງຈຳປາສັກ ແຂວງຈຳປາສັກ. ພ້ອມນັ້ນ ກໍໄດ້ລາຍງານ ສະພາບການລະບາດ ໂດຍລວມ ຢູ່ ແຂວງຈໍາປາສັກ ແລະ ການຈັດຕັ້ງປະຕິບັດມາດຕະການຕ່າງໆ ຂອງຄະນະສະເພາະກິດປ້ອງກັນ, ຄວບຄຸມ ແລະສະກັດກັ້ນການລະບາດ ຂອງພະຍາດ ໂຄວິດ-19.

ຂ່າວ: ທັດຊະນະ