ມີເດຍລາວແຂວງຈຳປາສັກ
ແຂວງຈຳປາສັກ ໄດ້ມອບເຄື່ອງຜະລິດອົກຊີ ໃຫ້ແກ່ແຂວງສາລະວັນ ແລະແຂວງຄຳມ່ວນ ເປັນມູນຄ່າ 60 ລ້ານກີບ. ເພື່ອປະກອບສ່ວນ ຊຸກຍູ້ ດ້ານສາທາລະນະສຸກ ໂດຍສະເພາະ ແມ່ນເພື່ອປະກອບສ່ວນເຂົ້າໃນວຽກງານປ້ອງກັນ ສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19 ຢູ່ບັນດາແຂວງດັ່ງກ່າວ.

ເຄື່ອງທີ່ມອບໃຫ້ແຂວງສາລະວັນ ປະກອບມີ: ເຄື່ອງຜະລິດອົກຊີ ຂະໜາດ 10 ລິດ ຈໍານວນ 3 ໜ່ວຍ; ຂະໜາດ 5 ລິດ ຈໍານວນ 2 ໜ່ວຍ, ເປັນມູນຄ່າ 30 ລ້ານກີບ ແລະແຂວງຄຳມ່ວນ ມີ: ເຄື່ອງຜະລິດອົກຊີ ຂະໜາດ 10 ລິດ ຈໍານວນ 2 ໜ່ວຍ; ຂະໜາດ 5 ລິດ ຈໍານວນ 3 ໜ່ວຍ, ເປັນມູນຄ່າ 30 ລ້ານກີບ.

ພິທີມອບ-ຮັບ ໄດ້ມີຂຶ້ນໃນວັນທີ 10 ກັນຍາ 2021,ທີ່ຫ້ອງວ່າການແຂວງຈຳປາສັກ, ຕາງໜ້າໃຫ້ຄະນະນຳແຂວງ, ກ່າວມອບໂດຍທ່ານ ວັນນະໄຊ ຊາດຕະກຸນ ຫົວໜ້າຫ້ອງວ່າການແຂວງ, ຫົວໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ຂັ້ນແຂວງ ແລະ ກ່າວຮັບໂດຍຜູ້ຕາງໜ້າໃຫ້ ສອງແຂວງ ສາລະວັນ ແລະແຂວງຄຳມ່ວນ ໂດຍ ມີ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດນີ້, ທ່ານ ວັນນະໄຊ ຊາດຕະກຸນ ໄດ້ກ່າວວ່າ: ແຂວງຈຳປາສັກ ມີ ຄວາມພູມໃຈ ແລະຍິນດີ ທີ່ໄດ້ ປະກອບສ່ວນ ມອບ ອຸປະກອນການແພດ, ເຄື່ອງຜະລິດອົກຊີ ໃນການ ຊຸກຍູ້ ວຽກງານ ດ້ານສາທາລະນະສຸກ ໃຫ້ທັງສອງແຂວງ ສາລະວັນ ແລະແຂວງຄຳມ່ວນ ໂດຍສະເພາະ ແມ່ນເພື່ອປະກອບສ່ວນເຂົ້າໃນວຽກງານປ້ອງກັນ ສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19. ພ້ອມນັ້ນ ກໍ່ໄດ້ລາຍງານ ໃຫ້ຮູ້ເຖິງ ສະພາບການລະບາດ ແລະ ການຈັດຕັ້ງປະຕິບັດມາດຕະການຕ່າງໆ ຂອງຄະນະສະເພາະກິດປ້ອງກັນ, ຄວບຄຸມ ແລະສະກັດກັ້ນການລະບາດ ຂອງພະຍາດ ໂຄວິດ-19 ແຂວງຈໍາປາສັກ ແລະ ປັດຈຸບັນ ແຂວງຈຳປາສັກ ມີ ຕົວເລກຕິດເຊື້ອສະສົມທົ່ວແຂວງ 4.113 ຄົນ,ຍິງ 2.017 ຄົນ, ຕິດໃນຊຸມຊົນ 389 ຄົນ, ແຮງງານຕິດເຊື້ອ 3.724 ຄົນ, ປົວດີສະສົມ 3.557 ຄົນ. ຍັງສືບຕໍ່ປົວ 553 ຄົນ.

ຂ່າວ: ທັດຊະນະ