ມີເດຍລາວແຂວງຄຳມ່ວນ ຂ່າວ: ກອງຄຳ ວັນທີ 12 ກັນຍາ 2021 ອົງການຈັດຕັ້ງຊາວໜຸ່ມແຂວງຄຳມ່ວນ ໄດ້ສ້າງຂະບວນການອະນາໄມ ໂຮງຮຽນມໍປາຍທ່າແຂກ (ຕຶກເບື້ອງຕາເວັນຕົກ) ເພື່ອກະກຽມເປັນສູນແຫ່ງທີ 6 ປິ່ນປົວຜູ້ຕິດເຊື້ອພະຍາດ ໂຄວິດ-19 ຂອງແຂວງຄຳມ່ວນ. ໂດຍການນຳພາສ້າງຂະບວນການຂອງທ່ານ ສາຍຄຳ ພະໄຊສິດທິເດດ ເລຂາຄະນະບໍລິຫານງານຊ່ວໜຸ່ມແຂວງ ທັງເປັນຄະນະສະເພາະກິດປ້ອງກັນ, ສະກັດກັ້ນ ແລະ ແກ້ໄຂ ການແຜ່ລະບາດ ໂຄວິດ-19 ຂັ້ນແຂວງ, ມີບັນດາສະມາຊິກຊາວໜຸ່ມຈາກພະແນກການອ້ອມຂ້າງ ແລະ ກຳລັງທະຫານຈາກ ປກຊ ແຂວງເຂົ້າຮ່ວມ.

ທ່ານ ສາຍຄຳ ພະໄຊສິດທິເດດ ໄດ້ໃຫ້ສຳພາດວ່າ: ເພື່ອຮອງຮັບໃຫ້ແກ່ຈຳນວນຜູ້ຕິດເຊື້ອພະຍາດ ໂຄວິດ-19 ທີ່ມີຈຳນວນເພີ່ມຂຶ້ນໃນແຕ່ລະວັນ ການນຳຂອງແຂວງຄຳມ່ວນ ກໍ່ຄືຄະນະສະເພາະກິດຂັ້ນແຂວງ ຈຶ່ງໄດ້ກຳນົດເອົາໂຮງຮຽນມໍປາຍທ່າແຂກ ເປັນສູນປິ່ນປົວໂຄວິດ-19 ໃໝ່ເປັນສູນທີ 6 ຂອງແຂວງ. ເຊິ່ງໃນ ອາທິດທີ່ຜ່ານນີ້ ກໍ່ໄດ້ມີການປັບປຸງ, ສ້ອມແປງທາງດ້ານຕ່າງໆ ເປັນຕົ້ນແມ່ນການປັບປຸງອາຄານ, ຫ້ອງຮຽນ, ລະບົບໄຟຟ້າ, ນໍ້າປະປາ, ກໍ່ສ້າງຫ້ອງນໍ້າ ແລະ ສິ່ງອຳນວຍຄວາມສະດວກອື່ນໆ. ເຊິ່ງໃນມື້ນີ້ ຄະນະບໍລິຫານ ງານຊາວໜຸ່ມແຂວງກໍ່ໄດ້ປຸກລະດົມສະມາຊິກຊາວໜຸ່ມ ຈາກພະແນກການ, ຂະແໜງການຕ່າງໆ ມາອະນາ ໄມ, ຕັດຫຍ້າ, ປັດກວາດຂີ້ເຫຍື້ອ ແລະ ສິ່ງຮົກເຮື້ອຕ່າງໆ ເພື່ອຄະນະສະເພາະກິດ ຈະໄດ້ປະກອບວັດຖຸ ອຸປະກອນ, ເຄື່ອງໃຊ້ທີ່ຈຳເປັນ ເຂົ້າໃນຫ້ອງປິ່ນປົວ ເຊິ່ງຄາດວ່າຈະໃຫ້ສຳເລັດ ແລະ ເປີດນຳໃຊ້ ໃນວັນທີ 13 ກັນຍາ 2021 ນີ້.