ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ວັນທີ 10 ກັນຍາ 2021 ຜ່ານມາ ທ່ານ ບຸນເລື່ອມ ມະນີວົງ ຮອງເຈົ້າແຂວງ ຫົວໜ້າຄະນະສະເພາະກິດ ຂັ້ນແຂວງ ພ້ອມດ້ວຍຄະນະ ໄດ້ລົງຊີ້ນໍາການປ້ອງກັນ ຄວບຄຸມ ຕ້ານ ແລະສະກັດກັ້ນການລະບາດຂອງພະຍາດໂຄວິດ 19 ຢູ່ເມືອງນານ ໂດຍມີເຈົ້າເມືອງ ຮອງເຈົ້າເມືອງ ແລະຄະນະສະເພາະກິດຂັ້ນເມືອງເຂົ້າຮ່ວມ.

ການລົງຊີ້ນໍາວຽກງານການຄວບຄຸມ ການລະບາດຂອງພະຍາດໂຄວິດ 19 ຢູ່ເມືອງນານ ຂອງຄະນະສະເພາະກິດແຂວງຄັ້ງນີ້ ເປັນວຽກງານຢ່າງຮິບດ່ວນນີ້, ຍ້ອນວ່າກາງເດືອນສິງຫາ ເປັນຕົ້ນມາຮອດປະຈຸບັດ ໄດ້ມີກໍລະນີຜູ້ຕິດເຊື້ອເດີນທາງຈາກ ແຂວງບໍ່ແກ້ວ ມາເຂົ້າຮ່ວມງານຊາປະນະກິດສົບ ຢູ່ບ້ານນາຝາຍ ເມືອງນານ ແຂວງຫຼວງພະບາງ ແລະເກີດການລະບາດເບື້ອງບາດ ໃນ 2 ບ້ານ ຄື: ບ້ານນາຝາຍ ແລະບ້ານປ່າໄຜ່ ແລະເຫັນວ່ານັບມື້ນັບມີການລະບາດໄດ້ຂະຫຍາຍຕົວເປັນວົງກ້ວາງ ແລະຮ້າຍແຮງຂື້ນເລື້ອຍໆ ຈາກ 2 ບ້ານ, ມາເປັນ 9 ບ້ານໃນປະຈຸບັນ ຄື: ບ້ານນາຝາຍ, ບ້ານປ່າໄຜ່, ບ້ານນາເມືອງໃຫຍ່, ບ້ານທ່າລີ່, ບ້ານຄໍແລ, ບ້ານຫ້ວຍຄົງ, ບ້ານຫ້ວຍຫຼາ, ບ້ານແກ້ວມະນີ ແລະບ້ານໂພນໄຊ. ມາຮອດປັດຈຸບັນທົ່ວເມືອງນານ ມີຜູ້ຕິດເຊື້ອ ທັງໝົດ 34 ຄົນ, ຍິງ 17 ຄົນ, ໃນນີ້ຕິດເຊື້ອຢູ່ຊຸມຊົນ 18 ກໍລະນີ ແລະນໍາເຂົ້າ 16 ກໍລະນີ. ຜູ້ຕິດເຊື້ອທັງໝົດໄດ້ຮັບການປິ່ນປົວ ແລະຕິດຕາມອາການຢູ່ໂຮງໝໍແຂວງແລ້ວ.

ຢູ່ທີ່ປະຊຸມ ຄະນະສະເພາະກິດຂັ້ນເມືອງ ກໍໄດ້ປະກອບຄວາມຄິດເຫັນ ເຂົ້າວຽກງານປ້ອງກັນ,ຄວບຄຸມ ແລະແກ້ໄຂການລະບາດຂອງເຊື້ອພະຍາດດັ່ງກ່າວ ຕາມພາລະບົດບາດໃຂຂົງເຂດຕົນ ເປັນຕົ້ນແມ່ນວຽກງານຈຸດກັ່ນຕອງ ແລະການປັບປຸງສູນກັກກັນຜູ້ທີ່ມີຄວາມສ່ຽງ ແລະອື່ນໆ,ຈາກນັ້ນ ຄະນະສະເພາະກິດຈາກພະແນກການກ່ຽວຂ້ອງຂອງແຂວງ ກໍໄດ້ປະກອບຄວາມຄິດເຫັນ ໃນການປະສານສົມທົບ ເພື່ອຊອກຫາທາງແກ້ໄຂ ພ້ອມກັນຈັດຕັ້ງປະຕິບັດໃຫ້ໄວ້ຂຶ້ນ.

ຕໍ່ກັບບັນຫາດັ່ງກ່າວທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ກໍໄດ້ລົງເຄື່ອນໄຫວຕິດຕາມຢ່າງໃກ້ຊິດ ແລະເນັ້ນໃຫ້ຄະນະສະເພາະກິດຂັ້ນແຂວງ ເອົາໃຈໃສ່ປະສານສົມທົບກັບອົງການປົກຄອງເມືອງນານ ເພື່ອຊອກຫາວິທີທາງແກ້ໄຂຢ່າງຮິບດ່ວນ,ທັນກັບສະພາບການ ເພື່ອຕັດວົງຈອນການລະບາດຂອງພະຍາດໂຄວິດ 19 ຢູ່ເມືອງນານ ໃຫ້ໄວເທົ່າທີ່ໄວໄດ້ ເປັນຕົ້ນແມ່ນ: ການຕິດຕາມສຶບຫາປະຫວັດການເຄື່ອນໄຫວ ຫຼື ທາມລາຍຂອງຜູ້ຕິດເຊື້ອ ໂດຍສະເພາະຜູ້ສໍາພັດໃກ້ສິດຜູ້ຕິດເຊື້ອ ແລະຜູ້ທີ່ມີຄວາມສ່ຽງສູງສົ່ງເຂົ້າສູນກັກກັ່ນ ຢ່າງຮິບດ່ວນ ພ້ອມນັ້ນອົງປົກຄອງ ແລະຄະນະສະເພາະກິດຂັ້ນເມືອງ ຕ້ອງໄດ້ເພີ່ມທະວີຄວາມການເອົາໃຈໃສ່ ໃນການຄວບຄຸມ ແລະແກ້ໄຂການລະບາດຂອງໂຄວິດ 19 ໂດຍການໂຄສະນາເຜີຍແຜ່ມາດຕະການປ້ອງກັນຕົວເອງ, ປ້ອງກັນຄອບຄົວ ແລະປ້ອງກັນສັງຄົມ ໃຫ້ປະຊາຊົນເຂົ້າໃຈຢ່າງເລິກເຊິ່ງ, ຕໍ່ຜົນຮ້າຍ ແລະໄພອັນຕະລາຍຂອງພະຍາດໂຄວິດ 19 ໃຫ້ປະຊາຊົນໃນທົ່ວເມືອງເປັນເຈົ້າການປະຕິບັດຄໍາສັ່ງ ເລກທີ 15/ນຍ ຂອງທ່່ານນາຍຍົກ ແລະຄໍາສັ່ງເລກທີ 01/ຈຂ.ຫຼບ ຂອງເຈົ້າແຂວງ ແລະຄໍາສັ່ງຂອງຄະນະສະເພາະກິດ ລວມເຖິງບັນດາມາດຕະປ້ອງກັນຢ່າງເຂັ້ມງວດ, ຈັດກໍາລັງປ້ອງກັນເວນຍາມ ກວດກາຄົນເຂົ້າ-ອອກບ້ານຕະຫຼອດ 24 ຊົ່ວໂມງ ແລະສຸມທຸກກໍາລັງແຮງເຂົ້າໃນການຄວບຄຸມ ແລະແກ້ໄຂການລະບາດຂອງໂຄວິດ 19 ຢູ່ເມືອງນານ ຢ່າງເອົາຈັງ ພ້ອມນັ້ນຕ້ອງໄດ້ປະເມີນຄວາມສ່ຽງຮອບດ້ານຢູ່ພາຍໃນ ຫາກເຫັນວ່າມີຄວາມສ່ຽງລະບາດຍຶດເຍື້ອຍາວນານ ແລະຂະຫຍາຍເປັນວົງກ້ວາງ ຕ້ອງໄດ້ນໍາໃຊ້ມາດຕະການປິດເມືອງໃນຂັ້ນຕໍ່ໄປ ເພື່ອຕັດທຸກວົງຈອນລະບາດ ບໍ່ໃຫ້ຂະຫຍາຍສູ່ວົງກ້ວາງ.