ມີເດຍລາວແຂວງຫຼວງພະບາງ ວັນທີ 10 ກັນຍາ 2021 ທ່ານ ວຽງສະຫວັນ ສຸກກະເສີມ ຫົວໜ້າອົງການກາແດງແຂວງຫຼວງພະບາງ ພ້ອມດ້ວຍຄະນະ ແລະທິມອາສາກູ້ໄພ 1625 ໄດ້ເຄື່ອນໄຫວມອບເຄື່ອງໃຫ້ ບ້ານເຂດແດງ ບ້ານທີ່ໄດ້ຮັບຜົນກະທົບຈາກການລະບາດຂອງພະຍາດໂຄດວິດ-19 ຈໍານວນ 4 ບ້ານໃນນະຄອນ ຫຼວງພະບາງ ໂດຍມີອົງການປົກຄອງບ້ານ ພ້ອມດ້ວຍເຈົ້າໜ້າທີ່ ປກສ-ປກຊເຂົ້າຮ່ວມເປັນສັກຂີພະຍານຮັບ.

ໂອກາດດັ່ງກ່າວນີ້ນີ້ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ແລະທ່ານ ບຸນລຽງ ແກ້ວມະນີ ປະທານກວດກາພັກ-ລັດນະຄອນ ຫຼວງພະບາງ ກໍໄດ້ໃຫ້ກຽດເຂົ້າຮ່ວມມອບ ແລະໃຫ້ກໍາລັງໃຈແກ່ປະຊາຊົນ ໃນບ້ານທີ່ໄດ້ຮັບຜົນກະທົບດັ່ງກ່າວ.ເຄື່ອງບໍລິໂພກທີ່ນໍາໄປມອບຄັ້ງນີ້ ລວມມູນຄ່າທັງໝົດ 16.215.000ກີບ. ປະກອບມີ: ບ້ານເມືອງງາ 45 ຖົງ,ພັນຫຼວງ 24 ຖົງ,ພູຊ້າງຄໍາ 52 ຖົງ ແລະ ບ້ານໂຄມຂວາງ 20 ຖົງ ລວມທັງໝົດ 141 ຖົງ,ແຕ່ລະຖົງມີ: ໄຂໄກ່,ເຂົ້າສານ 5 ໂລ,ໝີ່ ແລະ ປ່ອງປາ.

ທ່ານ ດຣ ວຽງສະຫວັນ ກະເສີມສຸກ ຫົວໜ້າອົງການກາແດງ ແຂວງຫຼວງພະບາງ ກ່າວວ່າ: ໂດຍເຫັນໄດ້ຄວາມຈໍາເປັນ ໃນການດໍາລົງຊີວິດຂອງເພື່ອນມະນຸດ ອົງການກາແດງ ແຂວງຫຼວງພະບາງ ກໍໄດ້ປະຕິບັດຕາມພາລະບົດບາດ ຂອງຕົນ ໂດຍນໍາເອົາເຄື່ອງຊ່ວຍເຫຼືອ ເຊິ່ງໄດ້ຈາກການສະໜັບສະໜູນຂອງອົງການກາແດງ ສະວິດ ແລະ ການປຸກລະດົມຊັ້ນຄົນໃນສັງຄົມ ໃຫ້ການປະກອບສ່ວນຊ່ວຍເຫຼືອ ເພື່ອບັນເທົາທຸກ ມອບໃຫ້ປະຊາຊົນທີ່ໄດ້ຮັບຜົນກະທົບດັ່ງກ່າວ.

ຈາກນັ້ນທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ກໍໄດ້ສະແດງຄວາມເປັນຫ່ວງເປັນຕໍ່ປະຊາຊົນ ແລະຍັງຮຽກຮ້ອງໃຫ້ປະຊາຊົນ ໃນບ້ານເຂດແດງ ໂດຍສະເພາະແມ່ນ ຄອບຄົວທີ່ມີບຸກຄົນຕິດເຊື້ອ ແລະກໍາລັງຮັກສາປິ່ນປົວ ລວມທັງຜົນກະທົບຕໍ່ບ້ານອ້ອມຂ້າງ ກໍຄືການລັອກດາວບໍ່ໃຫ້ຄົນເຂົ້າ-ອອກບ້ານ,ຈົ່ງມີຄວາມອົດທົນ,ສູ້ຊົນຜ່ານຜ່າ ເພື່ອຮັກສາ ຕົນເອງໃຫ້ຫາຍດີ ພ້ອມກັນນີ້ ກໍຕ້ອງຮ່ວມກັນປ້ອງກັນ,ຄວບຄຸມ,ຕ້ານ ແລະສະກັດກັ້ນ ເຊື້ອພະຍາດໂຄວິດ-19 ໃຫ້ໝົດໄປຈາກບ້ານ,ເມືອງ ແລະແຂວງຫຼວງພະບາງ ກໍຄືທົ່ວປະເທດລາວໃຫ້ໝົດສິ້ນ,ຄຽງຄູ່ກັນນັ້ນ ຕ້ອງປະຕິບັດຕາມລະບຽບການ,ຄໍາສັ່ງຂອງລັດຖະບານວາງອອກ ແລະປະຕິບັດຕາມຄໍາແນະນໍາຂອງແພດໝໍກໍຄື ໝັ່ນລ້າງມືທຸກເທື່ອ ແລະອອກຈາກບ້ານຕ້ອງຮັກສາໄລຍະຫ່າງ,ໃຊ້ຜ້າປິດດັງຢູ່ສະເໝີ.

ຂ່າວຍັງໃຫ້ຮູ້ຕື່ມວ່າ: ວັນທີ 9 ກັນຍາ ຜ່ານມາ ອົງການກາແດງແຂວງຫຼວງພະບາງ ແລະຄະນະ ກໍໄດ້ໄປມອບເງິນຄ່າອາຫານ ແລະເຄື່ອງບັນເທົາທຸກ ໃຫ້ແຮງງານທີ່ສູນກັກກັນບໍລິເວນ ເມືອງນານຈໍານວນ 104 ຄົນ,ຄົນລະ 3 ມື້,ມູນຄ່າ 6.240.000 ກີບ ແລະເຄື່ອງບັນເທົາທຸກ ມູນຄ່າ 15.906.000ກີບ,ລວມມູນຄ່າທັງໝົດ 22.146.000 ກີບຕື່ມອີກ.ໂດຍມີທ່ານ ຄໍາເກັ່ງ ຈັນທະວີສຸກ ເຈົ້າເມືອງນານ ພ້ອມດ້ວຍຄະນະສະເພາະກິດເມືອງຮ່ວມຮັບ.
ຂ່າວ: ເພັດສາຄອນ ສິມມະວົງ