ມີເດຍລາວແຂວງຜົ້ງສາລີ
ໃນຕອນແລງ 13 ກັນຍາ 2021ນີ້ ສະຫະພັນກຳມະບານ ແລະ ສະຫະພັນແມ່ຍິງ ໄດ້ຈັດກອງປະຊຸມເຜີຍແຜ່ຜັນຂະຫຍາຍມະຕິກອງປະຊຸມ ຢູ່ທີ່ສະໂມສອນຂອງເມືອງໃໝ່ ແຂວງຜົ້ງສາລີ ໃນກອງປະຊຸມດັ່ງກ່າວໃຫ້ກຽດເປັນປະທານຂອງ ທ່ານ ນາງ ຕຸລາພອນ ອະລີຍະ ມີທ່ານ ນາງ ແດງ ຕິດສະພອນ ກຳມະການປະຈຳພັກເມືອງ ປະທານແນວລາວສ້າງຊາດ ຜູ້ຊີນຳອົງການຈັດຕັ້ງມະຫາຊົນ ມີປະທານສະຫະພັນກຳມະບານ ຄະນະບໍລິຫານງານ ແລະ ສະມາຊິກກຳມະບານ ມີປະທານສະຫະພັນແມ່ຍິງອ້ອມຂ້າງເທດສະບານເມືອງເຂົ້າຮ່ວມຢ່າງພ້ອມພຽງ.​

ໃນກອງປະຊຸມດັ່ງກ່າວ ທ່ານ ສົມບຸນ ອິນສົມດີ ຫົວໜ້າຫ້ອງການສະຫະພັນກຳມະບານແຂວງ ຂື້ນເຜີຍແຜ່ຜົນສຳເລັດຂອງກອງປະຊຸມໃຫຍ່ ຄັ້ງທີ່ VIII ຂອງສະຫະພັນກຳມະບານແຂວງ ບັນດາສະຫາຍຄະນະບໍລິຫານງານສະຫະພັນກຳມະບານແຂວງ ຮັບຜິດຊອບຢູ່ບັນດາພະແນກການໃນ 7 ເມືອງທົ່ວແຂວງ ກໍ່ໄດ້ຕັ້ງໜ້າອອກແຮງປະຕິບັດໜ້າທີ່ ໃນການຊີ້ນຳ-ນຳພາ ແລະ ຍົກສູງຄວາມເປັນເຈົ້າການຂອງຕົນເອງ ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ເສີມຂະຫຍາຍມູນເຊື້ອແຮງຄວາມສາມັກຄີອັນເປັນປຶກແຜນ,​ເຊີດຊູຈິດໃຈຮັກຊາດ ຮັກລະບົບໃໝ່ ບົນຈິດໃຈແຫ່ງຄວາມເປັນເອກະລາດ ປະຊາທິປະໄຕ ຕໍ່ມາຍັງໄດ້ຮັບຟັງ ທ່ານ ນາງ ຕຸລາພອນ ອະລີຍະ ກຳມະການພັກແຂວງ ປະທານກຳມະບານແຂວງ ຂື້ນຜ່ານເນື້ອໃນຜັນຂະຫຍາຍມະຕິກອງປະຊຸມ ແລະ ເນື້ອໃນ 5 ເປັນເຈົ້າ ໃນກອງປະຊຸມ ທ່ານ ນາງເປີງ ອຸ່ນລະທອງ ກຳມະການພັກເມືອງ ຄະນະບໍລິຫານງານແມ່ຍິງແຂວງ ຂື້ນຜ່ານຂໍ້ຕົກລົງແບ່ງໜ້າທີ່ຄວາມຮັບຜິດຊອບ ໃຫ້ບັນດາສະຫາຍຄະນະບໍລິຫານງານແມ່ຍິງແຂວງຊຸດທີ່ X ລວມ 29 ສະຫາຍ

ພ້ອມດ່ຽວກັນນີ້ ທ່ານ ນາງ ວຽງສະໄໝ ແກ້ວວິໄລ ຮອງປະທານສະຫະພັນແມ່ຍິງແຂວງ ຂື້ນຜັນຂະຫຍາຍຜົນສຳເລັດກອງປະຊຸມໃຫຍ່ຜູ້ແທນແມ່ຍິງ ແຂວງຜົ້ງສາລີ ຄັ້ງທີ່ X ໄດ້ດຳເນີນໃນຄັ້ງວັນທີ່ 5 ສິງຫາ 2020 ທີ່ສະໂມສອນຂອງເມືອງບຸນເໜືອ ດ້ວຍບັນຍາກາດອັນຟົດຟືນ ແລະ ມີຄວາມຮັບຜິດຊອບສູງ ມີຄວາມສາມັກຄີເປັນເອກະພາບ ຮັບເອົາເນື້ອໃນສຳຄັນ ແນ່ໃສ່ການສຶກສາອົບຮົມການເມືອງແນວຄິດ ປັບປຸງການຈັດຕັ້ງ ຊຸກຍູ້ຂະບວນການຈັດຕັ້ງ ປະຕິບັດແມ່ຍິງ 3 ດີ ຕິດພັນກັບໜ່ວຍພັກປອດໃສ ເຂັ້ມແຂງ ໜັກແໜ້ນ ປະຕິບັດຄຳຂວັນຮັກຊາດ ແລະ ພັດທະນາໃຫ້ການຈັດຕັ້ງສະຫະພັນແມ່ຍິງມີການເຕີບໃຫຍ່ເຂັ້ມແຂງເທື່ອລະກ້າວ.​