ມີເດຍລາວແຂວງບໍ່ແກ້ວ ວັນທີ 11 ກັນຍານີ້ ປອ ບົວຄົງ ນາມມະວົງ ເຈົ້າແຂວງບໍ່ແກ້ວ ພ້ອມດ້ວຍຄະນະນຳຂອງແຂວງ-ເມືອງ ແລະ ຄະນະຄຸມຄອງເຂດເສດຖະກິດພິເສດ 3 ຫຼຽມຄຳ ໄດ້ນຳເອົາເຄື່ອງອຸປະໂພກບໍລິໂພກມາມອບໃຫ້ແກ່ແຮງງານມຽນມາ, ແຮງງານລາວທີ່ໄດ້ກັກຕົວຢູ່ສູນກັກກັນຂອງເມືອງໃນ 5 ບ້ານທີ່ຮັບຜົນກະທົບຈາກການລະບາດຂອງພະຍາດໂຄວິດ-19. ເນື່ອງ ຈາກການຂາດເຂີນທາງດ້ານສະບຽງອາຫານໃນການດຳລົງຊີວິດປະຈຳວັນ ຍ້ອນເຫັນໄດ້ແນວນັ້ນການນຳຂອງແຂວງຈຶ່ງໄດ້ສົມທົບການນຳຂອງເມືອງນຳເອົາເຄື່ອງຊ່ວຍເຫຼືອປະເພດ ເຂົ້າສານຈ້າວ ແລະ ໝີ່ສຳເລັດຮູບໄວໄວ ໃນມູນຄ່າທັງໝົດ 28 ລ້ານກີບມາມອບໃຫ້ແຮງງານມຽນມາ, ແຮງງານລາວ ແລະ ປະຊາຊົນຜູ້ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19.

ໃນນັ້ນມອບໃຫ້ແຮງງານມຽນມາທີ່ໄດ້ອາໃສຢູ່ເຂດພິເສດ 3 ຫຼຽມຄຳ ມີເຂົ້າສານຈ້າວ 1 ໂຕນ ແລະ ໝີ່ສຳເລັດຮູບໄວໄວ 200 ແກັດ ມູນຄ່າ 19 ລ້ານກີບ. ນອກ ນັ້ນຍັງໄດ້ມອບໃຫ້ແຮງງານລາວ ແລະ ປະຊາຊົນໃນບ້ານເປົ້າໝາຍ 5 ບ້ານທີ່ໄດ້ຮັບການປິ່ນປົວ ຫຼື ໄດ້ກັກໂຕຢູ່ສູນກັກກັນຂອງເມືອງເປັນຕົ້ນແມ່ນ: ບ້ານໃຫຍ່ສີເມືອງງາມ, ບ້ານຂຸນບົງ, ບ້ານສາມສິບ, ບ້ານກໍ່ສ້າງ ແລະ ບ້ານປ່າສັກ ເມືອງຕົ້ນເຜິ້ງ ແຂວງບໍ່ແກ້ວ ລວມມູນຄ່າ 9 ລ້ານກີບ.

ປອ ບົວຄົງ ນາມມະວົງ ເຈົ້າແຂວງບໍ່ແກ້ວ ໄດ້ກ່າວວ່າ: ການມອບເຄື່ອງບັນເທົ່າທຸກຝນເທື່ອນີ້ແມ່ນການອົບອຸ່ນຈິດໃຈ, ໃຫ້ຂວັນກຳລັງໃຈແກ່ຜູ້ທີ່ໄດ້ຮັບຜົນກະທົບຈາກພະຍາດໂຄວິດ-19 ທີ່ໄດ້ເອົາໃຈໃສ່ຕື່ນຕົວປະຕິບັດຕາມມາດຕະການ ຂອງຄະນະສະເພາະກິດວ່າງອອກຢ່າງເຂັ້ມງວດ ທັງເປັນການຍື້ຢາມຖາມຂ່າວຕໍ່ປະຊາຊົນ ເພື່ອເຮັດໃຫ້ປະຊາຊົນ ໄດ້ມີກຳລັງໃຈໃນການສ້າງເສດຖະກິດຄອບຄົວ ແລະ ພ້ອມກັນຕໍ່ສູ້ກັບໄພຮຸກຮານກໍ່ຄືພະ ຍາດອັກເສບປອດສາຍພັນໃໝ່ໂຄວິດ-19ໃຫ້ໝົດໄປ.

ທັງໝົດນັ້ນດ້ວຍຄວາມເປັນຫ່ວງເປັນໃຍຂອງພັກ-ລັດທີ່ໄດ້ເອົາໃຈໃສ່ໃນການຊຸກຍູ້ ຕິດຕາມການດຳລົງຊີວິດປະຈຳວັນຂອງປະຊາຊົນຜູ້ທີ່ຂາດເຂີນທີ່ກັກໂຕ 14 ວັນຕາມລະ ບຽບການ ທັງເປັນການໃຫ້ຂວັນກຳລັງໃຈ ເພື່ອຫຼີກຫຼ້ຽງຈາກການຕິດເຊື້ອ ຫຼື ແຜ່ເຊື້ອໄປສູ່ຄົນອື່ນໃນສັງຄົມ.
ພາບ-ຂ່າວ: ບຸນຈັນ ມະນີໄຊ.