ລັດຖະບານ ໄດ້ອອກແຈ້ງການ ເລກທີ 1177/ຫສນຍ ລົງວັນທີ 15 ກັນຍາ 2021 ກ່ຽວກັບການກຳນົດບັນດາມາດຕະການ ສໍາລັບໄລຍະ 15 ວັນຕໍ່ໜ້າ ໂດຍເລີ່ມແຕ່ເວລາ 00:00 ໂມງ ຂອງວັນທີ 16 ກັນຍາ ຫາ ເວລາ 24:00 ໂມງ ຂອງວັນທີ 30 ກັນຍາ 2021 ເຊີ່ງມີລາຍລະອຽດດັ່ງນີ້:

ສຳລັບມາດຕະການຫ້າມ ແລະ ຜ່ອນຜັນແມ່ນໃຫ້ສືບຕໍ່ປະຕິບັດຕາມແຈ້ງການສະບັບເລກທີ 1094/ຫສນຍ ລົງວັນທີ 31 ສິງຫາ 2021 ສ່ວນມາດຕະການຜ່ອນຜັນໃໝ່, ໂດຍອີງໃສ່ຄວາມຮຽກຮ້ອງຕ້ອງການຂອງວຽກງານສຶກສາ ແມ່ນເຫັນດີໃຫ້ປິດການຮຽນການສອນ ສຳລັບການສຶກສາທຸກຊັ້ນ ທຸກສາຍ ແລະ ສືບຕໍ່ເລື່ອນການສອບເສັງຄັດເລືອກເຂົ້າຮຽນສາຍອາຊີວະສຶກສາ, ສ້າງຄູ, ການສຶກສາຊັ້ນສູງ ແລະ ມະຫາວິທະຍາໄລ ຢູ່ນະຄອນຫຼວງວຽງຈັນ ແລະ ບັນດາແຂວງ ທີ່ມີການລະບາດໃນຊຸມຊົນ, ແຕ່ອະນຸຍາດໃຫ້ໂຮງຮຽນກິນນອນ ທີ່ບໍ່ມີການເຄື່ອນຍ້າຍນັກຮຽນ-ນັກສຶກສາ ແລະ ພະນັກງານຄູ-ອາຈານ ດໍາເນີນການຮຽນ-ການສອນໄດ້ ໂດຍໂຮງຮຽນຕ້ອງປະຕິບັດມາດຕະການປ້ອງກັນ ແລະ ຄວບຄຸມການລະບາດຂອງພະຍາດ COVID-19 ຢ່າງເຂັ້ມງວດ ແລະ ໄດ້ຮັບການອະນຸຍາດຈາກຄະນະສະເພາະກິດຂັ້ນແຂວງ, ນະຄອນຫຼວງວຽງຈັນ.

ສຳລັບມາດຕະການຕໍ່ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ລະເມີດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດ COVID-19 ທີ່ລັດຖະບານ, ຄະນະສະເພາະກິດ, ກະຊວງ-ອົງການ ຂັ້ນສູນກາງ, ນະຄອນຫຼວງວຽງຈັນ ແລະ ບັນດາແຂວງ ວາງອອກ ແມ່ນດຳເນີນຕາມກົດໝາຍ ແລະ ລະບຽບການ ກ່ຽວຂ້ອງ ຕາມແຕ່ກໍລະນີ ໜັກ ຫຼື ເບົາ.

ມອບໃຫ້ບັນດາກະຊວງ,​ ອົງການທຽບເທົ່າ, ອົງການປົກຄອງທ້ອງຖິ່ນ ແລະ ຄະນະສະເພາະກິດທຸກຂັ້ນ ຜັນຂະຫຍາຍ ແລະ ຈັດຕັ້ງປະຕິບັດແຈ້ງການສະບັບນີ້ ໃຫ້ຖືກຕ້ອງ ແລະ ເຂັ້ມງວດສອດຄ່ອງກັບສະພາບຕົວຈິງຂອງແຕ່ລະບ່ອນ.