ມີເດຍລາວແຂວງຄຳມ່ວນ ເພື່ອ​ສະ​ກັດ​ກັ້ນ,ຄວບ​ຄຸມ ແລະ ປ້ອງ​ກັນ​ເຊື້ອ​ພະ​ຍາດ​ໂຄວິດ-19 ບໍ່​ໃຫ້​ແຜ່​ລະ​ບາດ​ໃນ​ຊຸມ​ຊົນ​ອອກ​ເປັນ​ວົງ​ກວ້າງ. ໃນ​ວັນ​ທີ່ 14 ກັນ​ຍາ 2021 ເຈົ້າ​ແຂວງ​ຄຳ​ມ່ວນໄດ້​ອອກ​ຄຳ​ສັ່ງເລກ​ທີ່ 08/ຈ​ຂ ວ່າ​ດ້ວຍ​ການ​ສືບ​ຕໍ່​ເພີ່ມ​ທະ​ວີ​ຄວາມ​ເຂັ້ມ​ງວດ​ໃນ​ການ​ຈັດ​ຕັ້ງ​ປະ​ຕິ​ບັດ​ມາດ​ຕະ​ການ ປ້ອງ​ກັນຄວບ​ຄຸມ ແລະ ແກ້​ໄຂການ​ແຜ່​ລະ​ບາດ​ຂອງ​ພະ​ຍາດ​ໂຄວິດ -19 ຢູ່​ແຂວງ​ຄຳ​ມ່ວນ​ຕື່ມ​ອີກ 14 ວັນແຕ່​ວັນ​ທີ 14 ຫາ ວັນ​ທີ 27 ກັນ​ຍາ 2021, ຜ່ານ​ການ​ຈັດ​ຕັ້ງ​ປະ​ຕິ​ບັດ​ຄຳ​ສັ່ງ​ດັ່ງ​ກ່າວເຫັນ​ວ່າ​ ພະນັກ​ງານ, ທະ​ຫານ, ຕຳ​ຫລວດ, ນັກ​ຮຽນ​ນັກ​ສຶກ​ສາ, ຜູ້​ຄ້າ​ຂາຍ, ປະ​ຊາ​ຊົນ​ບັນ​ດາ​ເຜົ່າ ແລະ ຊາວ​ຕ່າງ​ປະ​ເທດທີ່​ດຳ​ລົງ​ຊີ​ວິດ​ຢູ່​ແຂວງ​ຄຳ​ມ່ວນ ແມ່ນ​ມີ​ຄວາມ​ຕື່ນ​ຕົວ​ສູງ​ໃນ​ການ​ຈັດ​ຕັ້ງ​ປະ​ຕິ​ບັດ​ຄຳ​ສັ່ງດັ່ງກ່າວ ໄດ້​ດີ​ພໍ​ສົມ​ຄວນຊື່ງ​ສະ​ແດງ​ໃຫ້​ເຫັນ​ວ່າ ພໍ່​ແມ່ປະ​ຊ​າ​ຊົນຢຸດ​ຕິ​ການ​ເດີນ​ທາງ​ອອກ​ຈາກ​ບ້ານ, ຈາກ​ເຮືອນ​ເຮັດ​ໃຫ້​ເສັ້ນ​ທາງ​ແຕ່​ລະ​ສາຍ​ຂອງ​ຕົວ​ເມືອງ​ທ່າ​ແຂກງຽບສະງັດ, ບໍ່ມີພາ​ຫະ​ນະ​ທ່ຽວ​ໄປ​ມາ, ບັນ​ດາ​ເຈົ້າ​ໜ້າ​ທີ່ ກຳ​ລັງ ປກສ, ປກ​ຊ ​ແລະ ການ​ຈັດ​ຕັ້ງ​ບ້ານກໍ່​ໄດ້​ຈັດ​ຕັ້ງ​ການ​ປ້ອງ​ກັນ​ເວນ​ຍາມແຕ່​ລະ​ຈຸດ​ຢ່າງ​ຕັ້ງ​ໜ້າ ແລະ ເປັນ​ເຈົ້າ​ການ ເພື່ອ​ຮັກ​ສາ​ຄວາມ​ສະ​ຫງົບ ແລະ ຄວາມເປັນລະບຽບຮຽບຮ້ອຍ. ທ່ານ ພັ​ຕ ຫລອງ ຈັນ​ທະ​ວົງ ເຈົ້າ​ໜ້າ​ທີ່​ປ້ອງ​ກັນ​ຈຸດ​ທີ 02 ໄດ້​ກ່າວ​ຕໍ່​ສື່ມວນ​ຊົນ​ຂອງ​ແຂວງວ່າ: ຂ້າ​ພະ​ເຈົ້າ​ຮູ້​ສຶກ​ດີ​ໃຈ ທີ່​ໄດ້​ເປັນ​ສ່ວນ​ໜຶ່ງ​ໃນ​ການ​ປະ​ກອບ​ສ່ວນ​ເຂົ້າ​ໃນ​ວຽກ​ງານ​ປ້ອງ​ກັນ​ການ​ແຜ່ລະ​ບາດ​ຂອງ​ພະ​ຍາດ​ໂຄວິດ-19,​ ການ​ລົງ​ມາ​ປະ​ຕິ​ບັດ​ໜ້າ​ທີ່​ຄັ້ງ​ນີ້​ຂ້າ​ພະ​ເຈົ້າ​ຖືກ​ຮັບ​ຜິດ​ຊອບ​ຢູ່​ເຂດ​ເທ​ດສະ​ບານ​ເມືອງ​ທ່າ​ແຂກ ແລະ ໄດ້​ແບ່ງ​ກັນ​ເປັນ​ຈຸ​​ປະ​ຈຳ​ໃນ​ແຕ່​ລະ​ຈຸດເພື່ອ​ຕິດ​ຕາມກວດ​ກາ​ການ​ເຄື່ອນ​ໃຫວ​ຂອງ​ຜູ້​ຄົນທັງ​ນີ້ກໍ່​ເພື່ອ​ເຮັດ​ໜ້າ​ທີ່​ປ້ອງ​ການ​ຄວາມ​ສະ​ຫງົບ ແລະ ປອດ​ໄພ​ຂອງ​ປະ​ຊາ​ຊົນ.

ເພື່ອເປັນການຜັນຂະຫຍາຍເນື້ອໃນຄຳສັ່ງຂອງທ່ານເຈົ້າແຂວງຄຳມ່ວນເລກທີ 08/ຈຂ ພ້ອມນີ້ ຄະນະສະເພາະກິດແຂວງຄຳມ່ວນ ຍັງໄດ້ອອກແຈ້ງການເລກທີ 06/ສພກ ລົງວັນທີ 15 ກັນຍາ 2021 ເຖິງບຸກຄົນ, ນິຕິບຸກຄົນ, ການຈັດຕັ້ງທຸກພາກສ່ວນທັງພາຍໃນ ແລະ ຕ່າງປະເທດທີ່ເຄື່ອນໄຫວ ແລະ ດຳລົງຊີວິດຢູ່ແຂວງຄຳມ່ວນ ເລື່ອງການຈັດຕັ້ງປະຕິບັດມາດຕະການຕໍ່ຜູ້ລະເມີດຄຳສັ່ງຂອງເຈົ້າແຂວງ ເລກທີ 08/ຈຂ ມີດັ່ງນີ້: ຖ້າພົບເຫັນລົດຂົນສົ່ງສິນຄ້າ, ລົດໂດຍສານ, ສ່ວນບຸກຄົນຜ່ານແຂວງຈອດເອົາຄົນ ຂຶ້ນ-ລົງ ແມ່ນຈະໄດ້ປັບໄໝ 5 ແສນກີບໃນຄັ້ງທີ 1, ຄັ້ງທີສອງປັບໄໝ 2 ລ້ານກີບ, ກໍລະນີລະເມີດອອກຈາກເຮືອນໄປນອກ ບໍ່ໃສ່ຜ້າອັດປາກ – ດັງ ປັບ 50 ພັນກີບພ້ອມທັງກັກພາຫະນະຊ່ວງໄລຍະປິດເມືອງ, ຜູ້ທີ່ສຳພັດກັບຜູ້ຕິດ ເຊື້ອບໍ່ກັກຕົວ ແລະ ປິດບັງການເຄື່ອນໄຫວ ປັບໄໝ 1 ລ້ານກີບພ້ອມທັງດຳເນີນຄະດີຕາມກົດໝາຍ. ກໍລະນີລະເມີດ ໂມງເວລາການສັນຈອນບໍ່ໄດ້ຮັບອະນຸຍາດຈາກການຈັດຕັ້ງ ຄັ້ງທຳອິດປັບໄໝ 2 ແສນກີບ, ຄັ້ງທີສອງ 5 ແສນກີບ. ກໍລະນີຈັດງານຊຸມແຊວ, ງານລ້ຽງອື່ນໆ ປັບໄໝ 1 ແສນກີບຕໍ່ຄົນຕໍ່ຄັ້ງ, ເຈົ້າຂອງສະຖານທີ່ 5 ແສນກີບ, ຄັ້ງທີສອງ 1 ລ້ານກີບຕໍ່ຄົນ, ເຈົ້າຂອງສະຖານທີ່ 2 ລ້ານກີບ.

ກໍລະນີລະເມີດຂາຍສິ່ງມຶນເມົາ, ກັກຕຸນສິນຄ້າ ປັບ 1 ລ້ານກີບ ພ້ອມທັງເຮັດບົດບັນທຶກ, ຄັ້ງທີ່ສອງ 3-5 ລ້ານກີບ ພ້ອມໂຈະການດຳເນີນທຸລະກິດ. ກໍລະນີຫຼິ້ນໄພ້, ຕີໄກ່ ການພະນັນອື່ນໆ ປັບໄໝ 2 ລ້ານກີບຕໍ່ຄົນ, ເຈົ້າຂອງສະຖານທີ່ 5 ລ້ານກີບ, ຄັ້ງທີສອງ 5 ລ້ານກີບຕໍ່ຄົນ, ເຈົ້້າຂອງສະຖານທີ່ 10 ລ້ານກີບ. ກໍລະນີລະເມີດເປີດບໍລິການທີ່ລະບຸໄວ້ຂໍ້ທີ່ 11 ຂອງຄຳສັ່ງເລກທີ 08/ຈຂ ປັບ 1 ລ້ານກີບ, ຄັ້ງທີ່ສອງ 3-5 ລ້ານກີບ ແລະ ໂຈະການດຳເນີນທຸລະກິດຊົ່ວຄາວ. ກໍລະນີລະເມີດໂມງເວລາເຮືອຫາປາ ທຽບທ່າ ແລະ ລັກລອບແຮງງານນຳເຂົ້າບໍ່ຖືກຕ້ອງປັບໄໝ 2 ແສນກີບຕໍ່ລຳ, ຄັ້ງທີສອງ 1 ລ້ານກີບ ພ້ອມທັງຍຶດເຮືອຜູ້ກ່ຽວຕະຫລອດໄລຍະປິດເມືອງ. ໃຫ້ປະຊາຊົນທຸກຊັ້ນຄົນເປັນເຈົ້າການຕິດຕາມໃນກໍລະນີພົບ ເຫັນຕໍ່ຜູ້ລະເມີດຄຳສັ່ງດັ່ງກ່າວໃຫ້ລາຍງານຕໍ່ຄະນະສະເພາະກິດແຂວງໄດ້ທີ່ເບີໂທ: ທ່ານ ບຸນໂຮມ ມຸກດາສັກ 020 55859996, ທ່ານ ພັທ ຄໍາຮຸ່ງ ອາລຸນສັກ 020 99514229 ແລະ ທ່ານ ສີຫງວນ ອິນທິລາດ 020 55223315.

ແຂວງຄຳມ່ວນ