ມີເດຍລາວແຂວງຜົ້ງສາລີ (ສພຂ.ຜລ) ໃນລະຫວ່າງວັນທີ 15-16 ກັນຍາ 2021 ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດກອງປະຊຸມຝືກອົບຮົມສ້າງຄວາມເຂັ້ມແຂງໃຫ້ແກ່ເສນາທິການຊ່ວຍວຽກ ພາຍໃນສະພາປະຊາຊົນແຂວງແຂວງ (ສພຂ) ໂດຍການເປັນທານຂອງທ່ານ ຫຸມເພັງ ຈອມວິສານ ກໍາມະການພັກແຂວງ, ຮອງປະທານສະພາປະຊາຊົນແຂວງ, ຫົວນ້າຄະນະຮັບຜິດຊອບຈັດກອງປະຊຸມຝືກອົບຮົມ; ມີບັນດາທ່ານນັກວີທະຍາກອນ ຈາກຫ້ອງການແຂວງ ແລະ ພະແນກພາຍໃນແຂວງນັກສໍາມະນາກອນ ພາຍໃນສະພາປະຊາຊົນແຂວງເຂົ້າຮ່ວມ.

ທັງນີ້ກໍເພື່ອເປັນການສ້າງພະນັັກງານ-ລັດຖະກອນກັບທີ່ ເພື່ອເຮັດໃຫ້ພະນັກງານນໍາພາ, ພະນັກງານວິຊາການ ແຕ່ລະຂັ້ນ, ແຕ່ລະທ່ານ ມີຄວາມຮູ້, ຄວາມສາມາດ, ມີຄວາມຊໍານິຊໍານານງານ, ເສີມຂະຫຍາຍບົດຮຽນປະສົບການ, ຫົວຄິດປະດິດສ້າງໃນການຄົ້ນຄວ້າບັນຫາ, ການເບິ່ງກວ້າງມອງໄກ ແນໃສ່ເຮັດໃຫ້ພະນັກງານ-ລັດຖະກອນມີຄວາມເຂັ້ມແຂງ ໂດຍສະເພາະ ການເປັນເສນາທິການດ້ານເນື້ອໃນ ແລະ ດ້ານການບໍລິຫານ, ການບໍລິການຮັບໃຊ້; ສາມາດເປັນເສນາທິການຊ່ວຍວຽກໃຫ້ແກ່ການນໍາ, ການເຄື່ອນໄຫວວຽກງານ ຂອງ ສພຂ ຢ່າງມີປະສິດທິພາບ ແລະ ປະສິດທິຜົນສູງ.

ໃນທີ່ກອງປະຊຸມໄດ້ຮັບຟັງ ທ່ານ ຄໍາເລີດ ອຸ່ນນະຄໍາ ຮອງຫົວໜ້າຫ້ອງການແຂວງ, ນໍາສະເໜີ ບາງເນື້ອໃນກ່ຽວກັບຄວາມໝາຍ, ຄວາມສໍາຄັນ ຂອງການເຮັດວຽກງານເລຂານຸການ; ດ້ານການຄົ້ນຄວ້າ-ສັງລວມເນື້ອໃນ ແລະ ການຈາລະຈອນເອກສານທາງລັດຖະການ; ໄດ້ຮັບຟັງ ນາງ ຈັນມະນີ ນະຄອນສຸກ ຮອງຫົວໜ້າຮອງຫ້ອງວ່າການແຂວງ ນໍາສະເໜີ ກ່ຽວກັບບາງບົດຮຽນວຽກງານການຄຸ້ມຄອງ ແລະ ບໍລິຫານ-ພິທິການ ໂດຍສະເພາະໃນການບໍລິການຮັບໃຊ້ໃຫ້ແກ່ການເຄື່ອນໄຫວຂອງ ການນໍາແຕ່ລະຂັ້ນ ແລະ ການເຄື່ອນໄຫວພາຍໃນອົງການຂອງຕົນ; ໄດ້ຮັບຟັງ ທ່ານ ນາງ ແສງນາລີ ບຸນປະເສີດ ຮອງຫົວໜ້າຂະແໜງຄຸ້ມຄອງເອກະສານ, ແຂ່ງຂັນ ແລະ ຍ້ອງຍໍ ນໍາສະເໜີ ບາງມາດຕາກ່ຽວກັບກົດໝາຍວ່າດ້ວຍເອກະສານ; ຮັບຟັງທ່ານ ກຸ່ມແສງ ວັນນະວົງ ຫົວໜ້າຂະແໜງ ບໍລິຫານ, ຈັດຕັ້ງ ແລະ ກວດກາ ນໍາສະເໜີ ຄໍາແນະນໍາຂອງລັດຖະມົນຕີກະຊວງພາຍໃນ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍເອກະສານ ສະບັບເລກທີ 02/ພນ, ລົງວັນທີ 09 ມີນາ 2021; ຜ່ານການຝືກອົບຮົບ ເຫັນວ່ານັກສໍາມະນາກອນມີຄວາມຮັບຮູ້, ເຂົ້າໃຈຕໍ່ກັບບົດຮຽນທີ່ທາງນັກວິຍາກອນນໍາມາສະເໜີ. ຊຶ່ງນັກສໍາມະນາກອນແຕ່ລະທ່ານກໍໄດ້ແລກປ່ຽນຄວາມຄິດຄວາມເຫັນຢ່າງເປັນຂະບວນຟົດຟື້ນ, ກົງໄປກົງມາ ແລະ ສ້າງສັນ.

ຕອນທ້າຍຂອງປະຊຸມ ທ່ານ ຫຸມເພັງ ຈອມວິສານ ກໍໄດ້ສັງລວມຄືນ ຜົນຂອງການຝືກອົບຮົມໃນຄັ້ງນີ້ ພ້ອມທັງຮຽກຮ້ອງໃຫ້ນັກສໍາມະນາກອນ (ພະນັກງານ-ລັດຖະກອນ) ພາຍໃນ ສພຂ ນໍາເອົາບົດຮຽນທີ່ຜ່ານການຝືກອົບຮົມໃນຄັ້ງນີ້ ນໍາໄປໝູນໃຊ້ເຂົ້າໃນການນຈັດຕັ້ງປະຕິບັດວຽກງານຂອງຕົນໃຫ້ເກີດດອກອອກຜົນດີຂຶ້ນກວ່າເກົ່າ.
(ພາບ-ຂ່າວ: ນາງ ສຸກສົມພອນ ແກ້ວແສງພະຈັນ)