ມີເດຍລາວແຂວງເຊກອງ (ຂ່າວ-ພາບ: ສັນຍາ) ວັນທີ 16 ກັນຍາ 2021 ທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ໄດ້ລົງເຄື່ອນໄຫວເຮັດວຽກ ແລະໂອ້ລົມພະນັກງານໂຮງໝໍແຂວງ ໂດຍເນັ້ນໃຫ້ເພີ່ມທະວີຄົ້ນຄວ້າເຊື່ອມຊຶມແນວທາງນະໂຍບາຍຂອງພັກ, ແຜນພັດທະນາ ແລະລະບຽບກົດໝາຍຂອງລັດ, ມີສະຕິຕໍ່ກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກ ແລະກຸ່ມຄົນບໍ່ດີຫວັງມ້າງເພທໍາລາຍລະບອບປະຊາທິປະໄຕຂອງພັກ, ເຮັດໜ້າທີ່ຂອງຕົນໃນການເບິ່ງແຍງດູແລ ແລະປິ່ນປົວຄົນເຈັບ ດ້ວຍຄວາມເສຍສະຫຼະ, ຈິງໃຈ ແລະຖືກຕາມຫຼັກວິຊາການຄວາມຮູ້ຄວາມສາມາດທີ່ຮຽນມາ ເພື່ອສ້າງຄວາມເພີ່ງພໍໃຈໃຫ້ແກ່ປະຊາຊົນຜູ້ໃຊ້ບໍລິການ.

ພ້ອມນີ້ ທ່ານຮອງເຈົ້າແຂວງ ຍັງໄດ້ຍ້ອງຍໍຊົມເຊີຍຕໍ່ຜົນສໍາເລັດທີ່ຄະນະພັກ-ຄະນະອໍານວຍການ ແລະພະນັກ ງານແພດ-ໝໍໂຮງໝໍແຂວງເຊກອງຍາດໄດ້ໃນໄລຍະຜ່ານມາ ໂດຍສະເພາະແມ່ນການເບິ່ງແຍງດູແລ ແລະປິ່ນປົວຜູ້ປ່ວຍຕິດເຊື້ອໂຄວິດ-19 ກໍລະນີທີ 1-ກໍລະນີທີ 4 ຂອງແຂວງຫາຍດີເປັນປົກກະຕິ ແລະສົ່ງກັບເມືອບ້ານເຮືອນໄປຫາພໍ່ແມ່, ຄອບຄົວດ້ວຍຄວາມປອດໄພ.

ດ້ານທ່ານ ດຣ. ເພັດສະໃໝ ເທບວົງສາ ຜູ້ອໍານວຍການໂຮງໝໍແຂວງເຊກອງໄດ້ລາຍງານວ່າ: ປັດຈຸບັນແຂວງເຊກອງມີຜູ້ຕິດເຊື້ອໂຄວິດ-19 ສະສົມທັງໝົດ 6 ຄົນ, ປິ່ນປົວຫາຍດີກັບບ້ານແລ້ວ 4 ຄົນ ແລະຍັງແຍກປ່ຽວຕິດຕາມປິ່ນປົວຢູ່ສູນປິ່ນປົວໂຮງໝໍແຂວງ 2 ຄົນ. ໃນນັ້ນເມືອງລະມາມມີຜູ້ຕິດເຊື້ອ 2 ຄົນ, ປິ່ນປົວຫາຍດີ 1 ຄົນ, ເມືອງທ່າແຕງມີຜູ້ຕິດເຊື້ອ 1 ຄົນ ແລະເມືອງກະລຶມມີຜູ້ຕິດເຊື້ອ 3 ຄົນ, ປິ່ນປົວຫາຍດີ 3 ຄົນ.