ມີເດຍາວແຂວງຫຼວງພະບາງ ເນື່ອງຈາກການແຜ່ລະບາດຂອງພະຍາດ ໂຄວິດ-19 ຢູ່ປະເທດເຮົາ ຍັງມີທ່າອ່ຽງເພີ່ມຂຶ້ນເລື່ອຍໆເວົ້າລວມ ເວົ້າສະເພາະ ຢູ່ແຂວງຫຼວງພະບາງຂອງພວກ ຍັງມີການລະບາດຢູ່ໃນບາງເມືອງ ດັ່ງນັ້ນພວກເຮົາຄວນໄດ້ເພີ່ມທະວີໃນການປ້ອງກັນ, ຄວບຄຸມ ແລະສະກັດກັ້ນການລະບາດຂອງພະຍາດ ໂຄວິດ-19 ຢ່າງເຂັ້ມງວດ ແລະຕໍ່ເນື່ອງ. ທ່ານ ບຸນເລື່ອມ ມະນີວົງ ຮອງເຈົ້າແຂວງ ຫົວໜ້າຄະນະສະເພາະກິດ ຄວບຄຸມໂຄວິດ-19 ແຂວງຫຼວງພະບາງ ໄດ້ຊີ້ນຳໃນກອງປະຊຸມປືກສາຫາລືວຽກງານ ຄວບຄຸມ ໂຄວິດ-19

ໃນວັນທີ 20 ກັນຍາ 2021 ໂດຍໄດ້ເນັ້ນໃຫ້ເອົາໃສ່ 4 ບັນຫາສຳຄັນຄື: (ໜຶ່ງ) ຍົກລະດັບເຂັ້ມງວດຈຸດກວດກາດ່ານຄົນເຂົ້າ-ອອກເມືອງ ຖ້າບໍ່ຈຳເປັນແທ້ແມ່ນບໍ່ໃຫ້ເຂົ້າເມືອງຢ່າງເດັດຂາດ ໃຫ້ຢຸດການອະນຸຍາດຄົນທີ່ອາໄສຢູ່ຫຼວງພະບາງໄປເຂດອື່ນຊົ່ວຄາວ, (ສອງ) ເພີ່ມທະວີຍົກລະດັບຄວາມເຂັ້ມງວດຢູ່ສູນກັກກັນແຕ່ລະແຫ່ງຂອງແຂວງ ໃຫ້ມີຄວາມເຂັ້ມງວດ ຮັບປະກັນບໍ່ໃຫ້ມີການແຜ່ເຊື້ອຕໍ່ພະນັກງານໃນສູນ ແລະໃນຊຸມຊົນ, (ສາມ) ກວດກາຄືນວຽກງານວິຊາສະເພາະ ເຊັ່ນ: ວຽກງານປິ່ນປົ່ວ, ຄວບຄຸມ, ພະລາ (ການຮັກສາຄວາມປອດໄພ) ຕ້ອງໄດ້ມີການຍູ້ແຮງກວດກາຄືນການເບີກຈ່າຍດ້ານການເງິນ ອັນໃດສໍາຄັນຄວນແກ້ໄຂກ່ອນໃຫ້ແກ້ໄຂ, ແລະ (ສີ່) ສະເພາະຢູ່ນະຄອນຫຼວງພະບາງ ແມ່ນໃຫ້ເອົາໃຈໃສ່ໃນການກວດກາລາດຕະເວນໃຫ້ເປັນປົກກະຕິ ເພື່ອເປັນການເຕື່ອນສະຕິໃຫ້ປະຊາຊົນບໍ່ໃຫ້ກາຍໂມງກາຍເວລາ, ແຈ້ງເຕືອນໃຫ້ປະຊາຊົນມີສະຕິລະວັງຕົວຢູ່ສະເໝີ.
ສຳລັບແຜນການໃນຕໍ່ໜ້າແມ່ນຕ້ອງໄດ້ມີການລົງກວດກາເມືອງ ທີ່ມີຜູ້ຕິດເຊື້ອ ເຊັ່ນ: ເມືອງນານ, ວຽງຄຳ ແລະເມືອງງອຍ, ຖ້າຍັງມີຄົນເຈັບລະບາດຢູ່ເມືອງນານ ແມ່ນໃຫ້ນຳເອົາມາປິ່ນປົວຢູ່ແຂວງ, ໃຫ້ຄະນະສະເພາະກິດມາປະຈຳສູນຕະຫຼອດເວລາ ເພື່ອຈະໄດ້ມີການປຶກສາຫາລືກັນເມື່ອມີວຽກອັນຮີບດ່ວນ.
ພາບ-ຂ່າວໂດຍ: ດາວອນ ມະນີວັນ