ມີເດຍລາວແຂວງບໍ່ແກ້ວ
ຕອນເຊົ້າ ວັນທີ 21 ກັນຍາ 2021 ນີ້ ຄະນະນໍາ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ບໍ່ແກ້ວ ນຳໂດຍ ທ່ານ ປອ ສົມຄິດ ວົງປັນຍາ ກຳມະການພັກແຂວງ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ (ຖວທ), ພ້ອມດ້ວຍຄະນະ ໄດ້ລົງຊຸກຍູ້ຕິດຕາມວຽກງານຮອບດ້ານ ຂອງຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເມືອງ ຕົ້ນເຜິ້ງ ໂດຍການຕອບຮັບ ຂອງ ທ່ານ ສີສະອາດ ກຸມພົນ ກຳມະການພັກເມືອງ ຫົວໜ້າຫ້ອງການ ຖວທ ເມືອງ, ມີຄະນະພະແນກ, ຄະນະຫ້ອງການ, ບັນດາຂະແໜງ, ບັນດາໜ່ວຍງານ ແລະ ພະນັກ ງານວິຊາການ ເຂົ້າຮ່ວມ.

ທ່ານ ສີສະອາດ ກຸມພົນ ຫົວໜ້າຫ້ອງການ ຖວທ ເມືອງ ໄດ້ລາຍງານການຈັດຕັ້ງປະຕິບັດວຽກງານຮອບດ້ານຂອງຫ້ອງການໃນໄລຍະຜ່ານມາ ເປັນຕົ້ນ ການພັດທະນາວຽກວຽກຖະແຫຼງຂ່າວ – ສື່ມວນຊົນ, ການລົງຕິດຕັ້ງລະບົບໂທລະໂຄ່ງໃຫ້ບັນດາບ້ານ ເພື່ອກະຈາຍຂໍ້ມຸນຂ່າວສານຕ່າງໆສູ່ພໍ່ແມ່ປະຊາຊົນ, ການສ້າງຄອບຄົວ – ບ້ານວັດທະນະທຳ, ການຄຸ້ມຄອງປ້າຍໂຄສະນາ, ປ້າຍບອກຊື່ທຸລະກິດ, ການຄຸ້ມຄອງປົກປັກຮັກສາບັນດາແຫຼ່ງບູຮານສະຖານ, ວັດຖຸບູຮານ ຢູ່ພາຍໃນເມືອງ, ການພັດທະນາ ຄຸ້ມຄອງ ແລະ ປົກປັກຮັກສາແຫຼ່ງທ່ອງທ່ຽວ, ການຄູ້ມຄອງໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ອື່ນໆ. ພ້ອມທັງສະເໜີຂໍ້ສະດວກ ຂໍ້ຫຍຸ້ງຍາກຕ່າງໆ ເປັນຕົ້ນ ແມ່ນດ້ານງົບປະມານ,ໂກຕາລັດຖະກອນ, ພາຫານະສື່ມວນຊົນ, ພາຫະນະຮັບໃຊ້ ແລະ ບາງໜ້າວຽກ. ຈາກນັ້ນ ບັນດາຂະແໜງການເຂົ້າຮ່ວມກໍໄດ້ປະສົນທະນາແລກປຽນບັນຫາຕ່າງໆທີ່ຍັງຄົງຄ້າງ ເພື່ອເຮັດການຈັດຕັ້ງປະຕິບັດວຽກງານຮອບດ້ານຂອງຫ້ອງການໃນຕໍ່ໜ້ານັບມີຫາຍຂະຫຍາຍຕົວຢ່າງຕໍ່ເນື່ອງ.

ໂອກາດນີ້ ທ່ານ ປອ ສົມຄິດ ວົງປັນຍາ ກໍ່ໄດ້ມີຄໍາເຫັນໂອ້ລົມ ເຊິ່ງທ່ານໄດ້ສະແດງຄວາມຊົມເຊີຍຕໍ່ຄະນະຫ້ອງການ ແລະ ພະນັກງານພາຍໃນຫ້ອງການ ຖວທ ທຸກສະຫາຍ ເຖິງວ່າວຽກງານບາງດ້ານຍັງຂາດເງື່ອນໄຂ ໂດຍສະເພາະແມ່ນດ້ານເງື່ອນໄຂດ້ານທຶນຮອນແຕ່ພະນັກງານທຸກສະຫາຍກໍ່ໄດ້ພ້ອມບຸກບືນສູ້ຊົນຈັດຕັ້ງປະຕິບັດທຸກວຽກງານໃຫ້ມີຜົນສຳເລັດຫຼາຍດ້ານ ແລະ ມີການຂະຫຍາຍຕົວຢ່າງກວ້າງຂວາງ ພ້ອມທັງໄດ້ມີຄຳເຫັນຊີ້ນໍາຕໍ່ບັນດາໜ້າວຽກ ແລະ ບັນຫາຕ່າງໆ ເພື່ອເປັນບ່ອນອິງໃຫ້ແກ່ຫ້ອງການໃນການຈັດຕັ່ງປະຕິບັດໃນຕໍ່ໜ້າ. ໂອກາດດັ່ງກ່າວ ພະແນກ ຖວທ ແຂວງ ຍັງໄດ້ນໍາເອົາເງິນ ຈໍານວນ 3500.000 ກີບ ພ້ອມດ້ວຍອຸປະກອນເຄື່ອງໃຊ້ສື່ມວນຊົນ ແລະ ເຄື່ອງໃຊ້ພາຍໃນຫ້ອງການຈໍານວນໜຶ່ງ ມາມອບໃຫ້ຫ້ອງການ ຖວທ ເມືອງ ເພື່ອຊຸກຍູ້ເຂົ້າໃນວຽກງານຂອງຫ້ອງການຕື່ມອີກ.
ພາບ – ຂ່າວ: ອຸໄທ ພູມມາ.