ມີເດຍລາວແຂວງຫຼວງພະບາງ ຂ່າວ:ຫຸມແພງ ສີດາໄລ ວັນທີ 20 ກັນຍາ 2021 ຜ່ານມານີ້ ຄະນະສະເພາະກິດເມືອງນານ ແຂວງຫຼວງພະບາງ ໄດ້ເປີດກອງປະຊຸມຄົ້ນຄ້ວາ ຖອດຖອນບົດຮຽນກ່ຽວກັບການຈັດຕັ້ງປະຕິບັດການ ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ 19 ຢູ່ທີ່ສະໂມສອນຂອງເມືອງ ໂດຍການເປັນປະທານຂອງ ທ່ານ ຄໍາເກັ່ງ ຈັນທະວີສຸກ ເຈົ້າເມືອງ-ເມືອງນານ, ມີຄະນະສະເພາະກິດແຂວງຫຼວງພະບາງ,ຫົວໜ້າສະເພາະກິດເມືອງ ພ້ອມດ້ວຍຄະນະ ແລະພະນັກງານຊີ້ນໍາຂັ້ນບ້ານທີ່ປະຈໍາຢູ່ບັນດາສູນກັກກັນເຂົ້າຮ່ວມ.

ກອງປະຊຸມຄັ້ງນີ້ ເພື່ອສະຫຼຸບຕີລາຄາຜົນຂອງການຈັດຕັ້ງປະຕິບັດວຽກງານ ປ້ອງກັນ ຄວບຄຸມ ແກ້ໄຂການລະບາດຂອງພະຍາດໂຄວິດ 19 ຢູ່ພາຍໃນເມືອງໃນໄລຍະຜ່ານມາ ພ້ອມທັງຮັບຟັງການລາຍງານການເຄື່ອນໄຫວວຽກງານຂອງບັນດາສູນ ແລະ ການພົ່ນຢາຂ້າເຊື້ອພະຍາດໂຄວິດ 19 ໃນຂອບເຂດທີ່ມີການຕິດເຊື້ອພາຍໃນເມືອງ.

ແລະໄດ້ເປີດໃຫ້ຄະນະສະເພາະກິດຊີ້ນໍາແຕ່ລະສູນປະກອບຄໍາຄິດເຫັນ ໃນການຈັດຕັ້ງປະຕິບັດວຽກງານຂອງຕົນພາຍໃນສູນກັກກັນທີ່ໄດ້ຮັບມອບໝາຍ, ເຊິ່ງໃນໄລຍະຜ່ານມາ ນັ້ນມີທັງຂໍ້ສະດວກ ແລະ ຂໍ້ຄົງຄ້າງທີ່ຈະຕ້ອງໄດ້ປັບປຸງແກ້ໄຂ ໂດຍສະເພາະແມ່ນຄວາມບໍ່ເຂົ້າໃຈຂອງປະຊາຊົນບັນດາເຜົ່າຢູ່ພາຍໃນບ້ານຕໍ່ຄໍາສັ່ງ ແລະ ມາດຕະການຕ່າງໆຂອງສະເພາະກິດແຕ່ລະຂັ້ນວາງອອກໃນໄລຍະຂອງການ(Lock Down)ປິດເມືອງ, ເພື່ອຕັດວົງຈອນການແຜ່ລະບາດຂອງເຊື້ອພະຍາດບໍ່ໃຫ້ຂະຫຍາຍອອກເປັນວົງກ້ວາງນັ້ນ ບາງພາກສ່ວນຍັງຖືເບົາບໍ່ປະຕິບັດຕາມ ຄໍາສັ່ງ ແລະ ມາດຕະການຕ່າງໆທີ່ທາງສະເພາະກິດແຕ່ລະຂັ້ນວາງອອກເທົ່າທີ່ຄວນ ຕໍ່ກັບບັນຫາດັ່ງກ່າວຈຶ່ງມີຄວາມສ່ຽງທີ່ຈະກໍ່ໃຫ້ເກີດມີການຕິດເຊື້ອໃນຊຸມຊົນເປັນວົງກ້ວາງ, ສະນັ້ນຄະນະສະເພາະກິດແຕ່ລະຂັ້ນຂອງເມືອງຈຶ່ງໄດ້ເອົາໃຈໃສ່ໃນການ ປ້ອງກັນ ຄວບຄຸມ ແກ້ໄຂການລະບາດຂອງພະຍາດດັ່ງກ່າວຢ່າງເປັນເຈົ້າການເພື່ອຊອກຄົ້ນຫາຜູ້ທີ່ໄດ້ສໍາພັດ ໃກ້ສິດກັບຜູ້ຕິດເຊື້ອພະຍາດໂຄວິດ 19 ບຸກຄົນທີ່ເປັນກຸ່ມສ່ຽງເຂົ້າມາຈໍາກັດບໍລິເວນຢູ່ພາຍໃນສູນກັກກັນຕ່າງໆທີ່ທາງສະເພາະກິດເມືອງໄດ້ກໍານົດໄວ້, ຕິດຕາມອາການແຕ່ລະວັນ ພ້ອມທັງເກັບຕົວຢ່າງໄປກວດຫາເຊື້ອໂດຍໄວ.

ຈາກນັ້ນທິມງານຄະນະສະເພາະກິດແຂວງຫຼວງພະບາງ ຍັງໄດ້ໃຫ້ຄໍາແນະນໍາກ່ຽວກັບການກໍານົດສິດ-ໜ້າທີ່, ການແບ່ງຄວາມຮັບຜິດຊອບ ແລະ ມອບຄວາມຮັບຜິດຊອບໃນການຈັດຕັ້ງປະຕິບັດຕໍ່ວຽກງານການລາຍງານ ຄວບຄຸມ ແກ້ໄຂການລະບາດຂອງພະຍາດໂຄວິດ 19 ພາຍໃນເມືອງ ຊອກຮູ້ຂໍ້ມູນຂ່າວສານກ່ຽວກັບການຕິດເຊື້ອພະຍາດທີ່ມີການປ່ຽນແປງໃນແຕ່ລະວັນ.

ໂອກາດດັ່ງກ່າວນີ້ ທ່ານ ຄໍາເກັ່ງ ຈັນທະວີສຸກ ເຈົ້າເມືອງ-ເມືອງນານ ກໍໄດ້ເນັ້ນແຕ່ລະສູນເອົາໃຈໃສ່ຕື່ມໃນການປະຕິບັດໜ້າທີ່ວຽກງານ ເປັນເຈົ້າການໃນການເຂັ້ມງວດກວດກາບັນທຶກປະຊາຊົນທີ່ມີການເຂົ້າ-ອອກບ້ານທີ່ກໍານົດເປັນບ້ານແດງ, ສຸມໃສ່ສຶກສາອົບຮົມ ຕໍ່ບຸກຄົນທີ່ເປັນກຸ່ມສ່ຽງເຂົ້າມາຈໍາກັດບໍລິເວນຢູ່ໃນສູນກັກກັນ ໃຫ້ປະຕິບັດມາດຕະການປ້ອງກັນການຕິດເຊື້ອຢ່າງເຄັ່ງຄັດ,ຕ້ອງມີການປະສານງານຮ່ວມກັນໃນການຄວບຄຸມ ແກ້ໄຂການລະບາດຂອງພະຍາດໂຄວິດ 19 ພາຍໃນເມືອງ ,ມີຄວາມເປັນເອກະພາບໃນການລາຍງານສະພາບການຂອງແຕ່ລະສູນ ທຸກພາກສ່ວນຕ້ອງເປັນເຈົ້າການຮ່ວມກັນໃນການຈັດຕັ້ງປະຕິບັດວຽກງານ ປ້ອງກັນ ຄວບຄຸມ ແກ້ໄຂການລະບາດຂອງພະຍາດໂຄວິດ 19 ໃນຊຸມຊົນຢູ່ພາຍໃນເມືອງນານໃຫ້ໝົດໄປໂດຍໄວ.