ມີເດຍລາວແຂວງອຸດົມໄຊ ກອງປະຊຸມປຶກສາຫາລື ການກຳນົດ ໂຄງສ້າງລາຄາ ຊີ້ນໝູ, ໄຂ່ໄກ່ພັນ ແລະ ປານິນ ຢູ່ພາຍໃນເມືອງຫຼາ ໄດ້ຈັດຂຶ້ນຢ່າງເປັນທາງ, ໃນວັນທີ 21 ກັນຍາ 2021 ຢູ່ທີ່ຫ້ອງປະຊຸມ ຄະນະປະຈຳພັກເມືອງ ໂດຍການເປັນປະທານຂອງ ທ່ານ ຫຸມພັນ ບຸບຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງໆຫຼາ, ມີບັນດາທ່ານຫົວຫນ້າ-ຮອງຫົວໜ້າຫ້ອງການຂະແໜງການທີ່ກ່ຽວຂ້ອງ ພ້ອມດ້ວຍຜູ້ປະກອບການອ້ອມຂ້າງເມືອງເຂົ້າຮ່ວມ.

ໃນກອງປະຊຸມ ທ່ານ ຄຳທຽງ ທໍ່ ກຳມະການພັກເມືອງ ຫົວໜ້າຫ້ອງການ ອຸດສາຫະກຳ ແລະ ການຄ້າເມືອງ ກໍ່ໄດ້ຜ່ານເອກະສານແຈ້ງການຂອງພະແນກອຸດສາຫະກຳ ແລະ ການຄ້າແຂວງອຸດົມໄຊ ສະບັບເລກທີ 0978/ພອຄ.ອຊ ລົງວັນທີ 16 ກັນຍາ 2021. ວ່າດ້ວຍການກຳນົດໂຄງສ້າງລາຄາ ຊີ້ນໝູ, ໄຂ່ໄກ່ພັນ ແລະ ປານິນ ຄືນໃຫມ່ເພື່ອເຮັດໃຫ້ເໝາະສົມກັບສະພາບປັດຈຸບັນໃນທົ່ວແຂວງ ກໍ່ຄືພາຍໃນເມືອງຫຼາ. ໃນນັ້ນໄດ້ກຳນົດລາຄາຊີ້ນໝູມີດັ່ງນີ້; ຊີ້ນສົດລາຄາສູງສຸດບໍ່ໃຫ້ເກີນ 50.000 ກີບຕໍ່ກິໂລ, ຊີ້ນໝູສາມຊັ້ນຕິດກະດູກຂ້າງ ລາຄາສູງສຸດບໍ່ໃຫ້ເກີນ 35.000 ກີບຕໍ່ກິໂລ, ເຄື່ອງໃນລວມໝູ ລາຄາສູງສຸດບໍ່ໃຫ້ເກີນ 45.000 ກີບຕໍ່ກິໂລ, ໄສ້ອ່ອນໝູ່ ລາຄາສູງສຸດບໍ່ໃຫ້ເກີນ 45.000 ກີບຕໍ່ກິໂລ, ຕີນໝູ ລາຄາບໍ່ໃຫ້ເກີນ 25.000 ກີບຕໍ່ກິໂລ, ຫົວໝູ ແລະ ກະດູກໝູຕິດຊີ້ນ ລາຄາບໍ່ໃຫ້ເກີນ 20.000 ກີບຕໍ່ກິໂລ, ສຳລັບໄຂ່ໄກ່ພັນ ໜ່ວຍໃຫຍ່ລາຄາສົ່ງ ບໍ່ໃຫ້ເກີນ 420.000 ກີບຕໍ່ແກັດ, ລາຄາຂາຍຍ່ອຍບໍ່ໃຫ້ເກີນ 38.000 ກີບຕໍ່ແຕະ,

ປານິນຂາຍຢູ່ໜ້າ(ໜອງ) ສູງສຸດບໍ່ໃຫ້ເກີນ 20.000 ກີບຕໍ່ກິໂລ, ລາຄາສົ່ງສູງສຸດບໍ່ໃຫ້ເກີນ 22.000 ກີບຕໍ່ກິໂລ ແລະ ລາຄາຂາຍຍ່ອຍຢູ່ຕາມທ້ອງຕະຫຼາດສູງສຸດບໍ່ໃຫ້ເກີນ 24.000 ກີບຕໍ່ກິໂລ. ພ້ອມນີ້ຜູ້ເຂົ້າຮ່ວມກອງປະຊຸມຍັງໄດ້ສຸມຈິດສຸມໃຈ ປະກອບຄຳຄິດເຫັນຕໍ່ເນື້ອໃນເອກະສານດັ່ງກ່າວ ໂດຍສະເພາະແມ່ນປຶກສາຫາລື ຕໍ່ລອງລາຄາໃຫ້ເໝາະສົມ ຕາມສະພາບ ເສດຖະກິດ-ສັງຄົມ ຫລື ສອດຄ່ອງກັບການຜະລິດ ແລະ ການບໍລິໂພກຂອງສັງຄົມ.

ໃນຕອນທ້າຍກອງປະຊຸມ ທ່ານ ຫຸມພັນ ບຸບຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງໆຫຼາ ຍັງໄດ້ມີຄຳເຫັນໂອ້ລົມຕືມອີກວ່າ: ສາເຫດທີ່ເຮັດໃຫ້ລາຄາສິນຄ້າປະເພດນຳເຂົ້າຖີບຕົວສູງຂຶ້ນ ເນື່ອງມາຈາກ ລາຄານ້ຳມັນໄດ້ປັບຕົວສູງຂຶ້ນ, ຕິດພັນກັບການລະບາດຂອງເຊື້ອພະຍາດໂຄວິດ-19 ຈິ່ງເຮັດໃຫ້ການຂົນສົ່ງມີຄວາມຫຍຸ້ງຍາກ ແລະ ຄ່າຂົນສົ່ງແພງຂຶ້ນ ລວມທັງ ການອ່ອນຄ່າຂອງເງິນກີບ ຕໍ່ສະກຸນເງິນຕ່າງປະເທດ. ພ້ອມທັງຮຽກຮ້ອງໃຫ້ບັນດາຂະແໜງການທີ່ກ່ຽວຂ້ອງ ໂດຍສະເພາະຫ້ອງການອຸດສາຫະກຳ ແລະ ການຄ້າເມືອງ ໃຫ້ເປັນເຈົ້າການຕິດຕາມ-ກວດກາລາຄາສິນຄ້າໃຫ້ຢູ່ໃນເກນປົກກະຕິ ແລະ ການຊື້-ຂາຍຕ້ອງຢູ່ໃນລາຄາທີ່ສົມເຫດສົມຜົນ ຖ້າລະເມີດ ແມ່ນຈະໄດ້ປະຕິບັດຕາມລະບຽບກົດໝາຍ .