ມີເດຍລາວແຂວງບໍ່ແກ້ວ
ວັນທີ 23 ກັນຍາ 2021 ນີ້, ຢູ່ທີ່ຫ້ອງປະຊຸມຫ້ອງວ່າການເມືອງປາກທາ ແຂວງບໍ່ແກ້ວ ໄດ້ມີກອງປະຊຸມ ຄະນະກຳມະທິການເພື່ອຄວາມກ້າວໜ້າຂອງແມ່ຍິງ ແລະ ເດັກຂັ້ນເມືອງ, ໂດຍການເປັນປະທານຂອງທ່ານ ນາງ ສຸກ ວັນນະວົງ ຮອງເຈົ້າເມືອງປາກທາ ປະທານຄະນະກຳມະທິການເພື່ອຄວາມກ້າວໜ້າຂອງແມ່ຍິງ ແລະ ເດັກຂັ້ນເມືອງ, ມີບັນດາຄະນະກຳມະທິການເພື່ອຄວາມກ້າວໜ້າຂອງແມ່ຍິງ ແລະ ເດັກຂັ້ນເມືອງເຂົ້າຮ່ວມ.

ກອງປະຊຸມຜູ້ເຂົ້າຮ່ວມແມ່ນໄດ້ຮັບຟັງການຜ່ານຂໍ້ຕົກລົງ ເລກທີ 187/ຈມ,ປທ ວ່າດ້ວຍການແຕ່ງຕັ້ງຄະນະກຳມະທິການເພື່ອຄວາມກ້າວໜ້າຂອງແມ່ຍິງ ແລະ ເດັກຂັ້ນເມືອງ ພ້ອມທັງ ຂໍ້ຕົກລົງ ວ່າດ້ວຍການເຄື່ອນໄຫວຂອງຄະນະກຳມະທິການເພື່ອຄວາມກ້າວໜ້າຂອງແມ່ຍິງ, ວຽກແມ່ ແລະ ເດັກຂັ້ນເມືອງ, ຈາກນັ້ນບັນດາຄະນະກຳມະທິການເພື່ອຄວາມກ້າວໜ້າຂອງແມ່ຍິງ ແລະ ເດັກຂັ້ນເມືອງ ກໍ່ໄດ້ພັດປ່ຽນກັນປະກອບຄຳຄິດຄຳເຫັນແລກປ່ຽນບົດຮຽນເຊິ່ງກັນ ແລະ ກັນ ເພື່ອເປັນບ່ອນອິ່ງໃຫ້ແກ່ການຈັດຕັ້ງ ແລະ ການເຄື່ອນໄຫວຂອງຄະນະກຳມະທິການເພື່ອຄວາມກ້າວໜ້າຂອງແມ່ຍິງ ວຽກແມ່ ແລະ ເດັກຂັ້ນເມືອງ ໂດຍແນ່ໃສ່ການຊຸກຍູ້ສົ່ງເສີມຄວາມກ້າວໜ້າຂອງແມ່ຍິງໃນທຸກດ້ານເຊັ່ນ: ດ້ານການເມືອງ, ດ້ານເສດຖະກິດ, ວັດທະນະທຳ-ສັງຄົມ ໄດ້ລະບຸໄວ້ໃນແນວທາງຂອງພັກ, ລັດຖະທຳມະນູນ, ກົດໝາຍຂອງລັດ ກໍ່ຄື ສົນທິສັນຍາຕ່າງໆ ທີ່ສາທາລະນະລັດ ປະຊາທິປະໄຕ ປະຊາຊົນລາວ ເປັນພາຄີ ໃຫ້ກາຍເປັນການກະທຳຕົວຈິງຂອງສັງຄົມຢ່າງກວ້າງຂວາງ ເພື່ອກ້າວໄປເຖິງຈຸດໝາຍການປົກປ້ອງສິດທິເດັກ ແລະ ການລົບລ້າງທຸກຮູບການຈຳແນກຕໍ່ແມ່ຍິງ ແລະ ເດັກໃຫ້ລຸດໜ້ອຍຖອຍລົງເທື່ອລະກ້າວ.
ພາບ-ຂ່າວ: ວັນນະເດດ ວິໄລຄຸນ