ມີເດຍລາວແຂວງບໍ່ແກ້ວ ວັນທີ 22 ກັນຍານີ້ ທ່ານ ປອ ບົວຄົງ ນາມມະວົງ ກຳມະການສູນການພັກ ເລຂາພັກແຂວງ ເຈົ້າແຂວງບໍ່ແກ້ວ ພ້ອມຄະນະ ແລະ ພະແນກການທີ່ກ່ຽວຂອງ ໄດ້ຕິດຕາມຊຸກຍູ້ການຈັດຕັ້ງປະຕິບັດວຽກງານຮອບດ້ານປະຈໍາ 9 ເດືອນປີ 2021 ແລະ ການຈັດຕັ້ງປະຕິບັດ 2 ວາລະແຫ່ງຊາດ ຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ການແກ້ໄຂບັນຫາຢາເສບຕິດ ຂອງເມືອງຜາອຸດົມ ຊອກໃຫ້ເຫັນດ້ານດີ, ດ້ານອ່ອນ, ບັນຫາຂໍ້ຄົງຄ້າງ, ຄວາມຫຍຸ້ງຍາກໃນການຈັດຕັ້ງປະຕິບັດໃນໄລຍະຜ່ານມາ ເພື່ອໃຫ້ຄະນະນຳຂອງແຂວງ, ພະແນກການມີທິດຊີ້ນຳ, ແນະນຳວິທີການຕ່າງໆ ເປັນບ່ອນອີງໃນການຈັດຕັ້ງປະຕິບັດເຮັດໃຫ້ວຽກງານ 3 ເດືອນທ້າຍປີ 2021ໄດ້ມີຜົນສຳເລັດຕາມຄາດໝາຍທີ່ວາງໄວ້, ເຂົ້າຮ່ວມມີບັນດາຄະນະປະຈຳພັກເມືອງ,ກຳມະການພັກເມືອງ,ຫົວໜ້າຫ້ອງການທີ່ກ່ຽວຂ້ອງຂອງເມືອງ

ທ່ານ ຈັນທອນ ພົນທະລາ ກຳມະການພັກແຂວງ ເລຂາພັກເມືອງ ເຈົ້າເມືອງຜາອຸດົມ ໄດ້ລາຍງານ ການເຄື່ອນໄຫວວຽກງານຮອບດ້ານປະຈໍາ 9 ເດືອນປີ 2021ແລະ ທິດທາງແຜນການ 3 ເດືອນທ້າຍປີ 2021 ຂອງເມືອງຜາອຸດົມ ເປັນຕົ້ນແມ່ນ ວຽກງານການເມືອງ-ແນວຄິດ, ວຽກງານ ປກຊ-ປກສ,ວຽກງານວັດທະນາທໍາ-ສັງຄົມ, ວຽກງານນິຕິບັນຍັດ ແລະ ຕຸລາການ, ວຽກງານຫ້ອງວ່າການເມືອງ, ວຽກງານເສດຖະກິດມາຮອດປະຈຸບັນສາມາດ ລວມຍອດລາຍຮັບທັງໝົດ: 19,486,121,152 ກີບ ທຽບແຜນການປີປະຕິບັດໄດ້ 64,43%, ຮັບດຸນດ່ຽງຈາກແຂວງປະຕິບັດໄດ້ 18,316,153,000 ກີບ ທຽບແຜນການປີປະຕິບັດໄດ້ 67,19%, ລາຍຮັບພາຍໃນເມືອງປະຕິບັດໄດ້ 1,169,968,152 ກີບ ທຽບແຜນການປີປະຕິບັດໄດ້ 39,25 %, ລາຍຈ່າຍ 19,272,590,531 ກີບ ທຽບແຜນການປີປະຕິບັດໄດ້ 63,73% ແລະ ສຳລັບການຈັດຕັ້ງປະຕິວາລະແຫ່ງຊາດການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແມ່ນໄດ້ແບ່ງຄວາມຮັບຜິດຊອບອັນເປັນລະອຽດໃຫ້ແຕ່ລະພາກສ່ວນ, ສຸມໃສ່ຊຸກຍູ້ສົ່ງເສີມແຫຼ່ງລາຍຮັບທີ່ມີ, ຂຸດຄົ້ນທ່າແຮງທີ່ບົ່ງຊ້ອນໃຫ້ເປັນບ່ອນສ້າງລາຍຮັບເຂົ້າງົບປະມານ ກໍ່ຄືຊຸກຍູ້ສົ່ງເສີມການປູກການລ້ຽງໃຫ້ຫຼາຍການເປັນສິນຄ້າ ແລະ ການແກ້ໄຂບັນຫາຢາເສບຕິດແມ່ນເນັນໃສ່ 2 ກຳລັງເປັນເຈົ້າການຈັດຕັ້ງປະຕິບັດພ້ອມຈະສ້າງເປັນແຜນການອັນລະອຽດໃຫ້ຖືກທິດຕາມຂັ້ນເທີງວາງອອກ.

ຈາກນັ້ນບັນດາພະແນກການ ໄດ້ຊີ້ແຈງ ແລະ ໃຫ້ທິດແນະນຳໃຫ້ຄະນະນຳ ແລະ ຫ້ອງການຂອງເມືອງ ກ່ຽວກັບຂັ້ນຕອນ, ວິທີການ, ທັດສະນະ ໃນການຈັດຕັ້ງປະຕິບັດວຽກງານໃນໄລຍະການລະບາດຂອງພະຍາດໂຄວິດ 19 ໃຫ້ຖືກຕ້ອງສອດຄ່ອງກັບແນວທາງນະໂຍບາຍໃໝ່ຂອງພັກ-ລັດວາງອອກ ແລະ ເຮັດໃຫ້ການຈັດຕັ້ງປະຕິບັດວຽກງານຮອບດ້ານຂອງເມືອງ ແລະ 2 ວາລະແຫ່ງຊາດ ໄດ້ດຳເນີນໄປຕາມຄາດໝາຍທີ່ວາງໄວ້.

ທ່ານ ປອ ບົວຄົງ ນາມມະວົງ ກຳມະການສູນການພັກ ເລຂາພັກແຂວງ ເຈົ້າແຂວງບໍ່ແກ້ວໄດ້ມີຄຳເຫັນເໜັນໜັກ ໃຫ້ຄະນະນຳຂອງເມືອງ ແລະ ທຸກພາກສ່ວນຕ້ອງສືບຕໍ່ເປັນເຈົ້າການ ສຶກສາອົບຮົມການເມືອງແນວຄິດ ໃນຖັນແຖວພະນັກງານ ຕະຫຼອດຮອດ ປະຊາຊົນບັນດາເຜົ່າ ໃຫ້ກຳແໜ້ນຕໍ່ແນວທາງນະໂຍບາຍຂອງພັກ-ລັດ, ເພີ້ມທະວີເອົາໃຈໃສ່ວຽກງານ ປກຊ-ປກສ ຕິດພັນກັບການປ້ອງກັນ ການລະບາດພະຍາດໂຄວິດ 19 ໃຫ້ທັນການ, ສືບສ້າງແຜນແກ້ໄຂຄວາມຫຍຸ້ງຍາກທາງດ້ານເສດຖະກິດການເງີນໃຫ້ຕິດພັນກັບແຜນພັດທະນາເສດຖະກິດ – ສັງຄົມ 5 ຂອງເມືອງ, ຕ້ອງຮູບປັບປຸງ ແບບແຜນວິທີເຮັດວຽກ ໃນຊວງວິດກິດໂຄວິດ 19 ເພື່ອແນ່ໃສ່ຫຼຸດຜ່ອນຜົນກະທົບ ແລະ ເຮັດໃຫ້ມີຜົນສຳເລັດຕາມລຳດັບ ແລະ ສຳລັບການສະເໝີຂອງເມືອງ ທາງແຂວງຈະໃຫ້ພະແນກທີ່ກ່ຽວຂ້ອງຊ່ວຍ ແລະ ແກ້ໄຂຕາມເງື່ອນໄຂຂອງສະພາບຄວາມເປັນຈິງ.
ພາບ-ຂ່າວ:ສາຍສະໝອນ ແກ້ວວິສິດ