ມີເດຍລາວແຂວງບໍ່ແກ້ວ ວັນທີ 23 ກັນຍາ 2021 ນີ້, ພະແນຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍ່ ແກ້ວ (ຖວທ) ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 19 ປີ ຄື: ( 9 ກັນຍາ 2002 ຫາ 9 ກັນຍາ 2021 ) ຂຶ້ນທີ່ຫໍປະຊຸມສະຖານີວິທະຍຸ-ໂທລະພາບ ແຂວງບໍ່ແກ້ວ (ຫລັງ ໃໝ່) ໂດຍການເປັນປະທານ ພ້ອມທັງປາຖະກະຖາຂອງທ່ານ ສົມສັກ ມະຫາພົນ ຮອງຫົວໜ້າພະແນກ ຖວທ ແຂວງ, ມີບັນດາຫົວໜ້າ-ຮອງຫົວໜ້າຂະແໜງ ແລະ ພະນັກງານລັດຖະກອນ ເຂົ້າຮ່ວມ.

ທ່ານ ສົມສັກ ມະຫາພົນ ຮອງຫົວໜ້າພະແນກ ຖວທ ແຂວງ ໄດ້ຍົກໃຫ້ເຫັນປະຫວັດຄວາມເປັນມາ ແລະ ຄວາມໝາຍ ຄວາມສຳຄັນ, ພາລະບົດບາດ, ໜ້າທີ່ຜົນງານອັນໃຫຍ່ຫຼວງໃນຖັນແຖວນັກຮົບເກົ່າ ໃນການຕໍ່ສູ້ກູ້ຊາດກອບກູ້ເອົາເອກະກາດ, ອຳນາດອະທິປະໄຕປົກປັກຮັກສາ ແລະ ສ້າງສາພັດທະນາປະເທດຊາດ, ພາຍໃຕ້ການນຳພາຂອງພັກປະຊາຊົນປະຕິວັດລາວ ສະຫະພັນນັກຮົບເກົ່າແມ່ນ ກຳລັງປະກອບອາວຸດ, ທະຫານ-ຕຳຫຼວດທີ່ພັກຜ່ອນບຳນານ, ບຳເນັດ ແມ່ນຜູ້ໄດ້ຜ່ານການປະຕິບັດໜ້າທີ່ນັກຮົບປ້ອງກັນຊາດ-ປ້ອງກັນຄວາມສະຫງົບ ແລະ ຜ່ານການທົບສອບແປວໄຟສົງຄາມແຫ່ງການຕໍ່ສູ້ກູ້ຊາດ ແລະ ນຳເອົາເອກະລາດຄວາມຢູ່ເຢັນເປັນສຸກມາໃຫ້ປະຊາຊົນລາວບັນດາເຜົ່າ ເປັນຜູ້ມີບົດຮຽນໃນການຊີ້ນຳໆພາບັນຊາ ການກໍ່ສ້າງຮາກຖານການເມືອງຂົນຂວາຍປຸກລະດົມ, ປະຊາຊົນຈົງຮັກພັກດີຕໍ່ປະຊາຊົນ ແນໃສ່ສ້າງຄວາມສາມັກຄີປອງດອງເປັນປຶກແຜນແໜ້ນໜາ ເວົ້າລວມ ເວົ້າສະເພາະ ພະນັກງານປະຕິວັດອາວຸໂສເປັນແກ່ນສານຖັນແຖວນັກຮົບເກົ່າ, ເຂົ້າປະຕິບັດ 2 ໜ້າທີຍຸດທະສາດປົກປັກຮັກສາ ແລະ ສ້າງສາພັດທະນາປະເທດຊາດຕາມຈຸດໝາຍສັງຄົມນິຍົມ, ແລະ ທ່ານຍັງໄດ້ຍົກໃຫ້ເຫັນຜົນງານການເຄື່ອນໄຫວຂອງສະຫະພັນນັກຮົບເກົ່າຂອງແຂວງ, ຕະຫຼອດໄລຍະຜ່ານມາໃນຫຼາຍດ້ານເປັນຕົ້ນ: ດ້ານການເມືອງແນວຄິດ, ດ້ານການປັບປຸງກໍ່ສ້າງພັກ-ພະນັກງານ ແລະ ປັບປຸງການຈັດຕັ້ງ, ວຽກງານເສດຖະກິດແກ້ໄຂການເປັນຢູ່ ແລະ ແກ້ໄຂຄວາມທຸກຍາກ, ວຽກງານພົວພັນຕ່າງປະເທດ.

ເພື່ອເປັນການປຸກລະດົມສຶກສາອົບຮົມໃຫ້ພະນັກງານລັດຖະກອນຮຸ່ນສືບທອດມີຄວາມເອກອ້າງທະນົງໃຈ, ກຳແໜ້ນຜົນງານປະຫວັດ, ຜົນງານແຫ່ງການຕໍ່ສູ້ມີໄຊຂອງນັກຮົບເກົ່າປະຕິວັດລາວທີ່ໄດ້ຕໍ່ສູ້ພິລະອາດຫານ, ເດັດດ່ຽວໜຽວແໜ້ນ ແລະ ນ້ຳໃຈເສຍສະຫຼະອັນສູງສົ່ງໃນພາລະກິດປະຕິວັດ ເອົາໃຈໃສ່ເສີມຂະຫຍາຍ ໝາກຜົນຂອງການປະຕິວັດທີ່ນັກຮົບເກົ່າຍາດມາໄດ້ ກໍ່ຄືການສືບຕໍ່ສ້າງສາ ແລະ ພັດທະນາປະເທດຊາດໃນໄລຍະໃໝ່ໃຫ້ນັບມື້ນັບຈະເລີນກ້າວໜ້າໄປເລື້ອຍໆ.

ໂອກາດດຽວກັນນີ້ ທ່ານ ສົມສັກ ມະຫາພົນ ໄດ້ມີຄໍາເຫັນໂອ້ລົມ ພະນັກງານ-ລັດຖະກອນ ສະມາຊິກພັກທຸກສະຫາຍ ຈົ່ງເປັນເຈົ້າການ ນໍາເອົາເນື້ອໃນຈິດໃຈ, ບົດຮຽນຂອງຄົນຮຸ່ນກ່ອນ ໄປເປັນບົດຮຽນ ແລະ ຈັດຕັ້ງຜັນຂະຫຍາຍ, ໝູນໃຊ້ເຂົ້າໃນຂົງເຂດວຽກງານທີ່ຕົນຮັບຜິດຊອບໃຫ້ເກີດຜົນປະໂຫຍດສູງສຸດ ຕິດພັນກັບການສະກັດກັ້ນ ການແຜ່ລະບາດຂອງພະຍາດໂຄວິດ-19 ໃຫ້ເຂັ້ມງວດ.
ພາບ: ຄໍາພັນ ແກ້ວມະນີ
ຂ່າວ: ນ. ວິໄລສີ ພົມປັນຍາ