ມີເດຍລາວແຂວງອຸດົມໄຊ
ພິທີ ສະຫຼຸບບັ້ນແຂ່ງຂັນ 3 ດີ ປະຈໍາປີ 2021 ຂອງສະຫະພັນແມ່ຍິງ ຫນ່ວຍ ພະແນກ ພະລັງງານ ແລະ ບໍ່ແຮ່ ແຂວງອຸດົມໄຊ ໄດ້ຈັດຂຶ້ນ ໃນຕອນບ່າຍວັນທີ 23 ກັນຍາ 2021 ທີ່ຫ້ອງປະຊຸມຂອງຕົນ ໂດຍການເປັນປະທານຂອງທ່ານນາງ ອຸ່ນເຮືອນ ຈັນທະວີສຸກ ປະທານສະຫະພັນແມ່ຍິງຫນ່ວຍ ພະແນກ ພະລັງງານແລະບໍ່ແຮ່ແຂວງ,ມີທ່ານ ປອ ນາງວຽງມະລີ ສຸລິໄຊ ຮອງປະທານສະຫະພັນແມ່ຍິງແຂວງ,ທ່ານ ຊາຍແສງ ຈິດດາວົງ ຮອງເລຂາຫນ່ວຍພັກ,ຮອງຫົວຫນ້າພະແນກ ພະລັງງານແລະບໍ່ແຮ່ ແຂວງ,ຕາງຫນ້າສະຫະພັນແມ່ຍິງ ຫນ່ວຍອ້ອມຂ້າງ ແລະ ສະມາຊິກແມ່ຍິງ ພາຍໃນຫນ່ວຍ ພະແນກພະລັງງານ ແລະ ບໍ່ແຮ່ ເຂົ້າຮ່ວມ.

ໃນພິທີ ໄດ້ສະຫຼຸບການເຄື່ອນໄຫວຈັດຕັ້ງປະຕິບັດ ຂໍ້ແຂ່ງຂັນ 3 ດີ ປະຈໍາປີ 2021 ໃນນັ້ນ ໄດ້ຍົກໃຫ້ເຫັນສະພາບລວມ ກ່ຽວກັບການຈັດຕັ້ງປະຕິບັດວຽກງານດັ່ງກ່າວ ໂດຍສະເພາະແມ່ນຜົນງານທີ່ຍາດມາໄດ້ ເຊິ່ງມັນສະແດງອອກຄື ສະມາຊິກແມ່ຍິງ ຈຳນວນ 14 ສະຫາຍ ສາມາດຄັດເລືອກເອົາສະມາຊິກສະຫະພັນແມ່ຍິງ 3 ດີ ໄດ້ທັງຫມົດ 11 ສະຫາຍ ສ່ວນ 3 ສະຫາຍ ແມ່ນບໍ່ທັນໄດ້ຮັບການປະເມີນ ເນື່ອງຈາກຫາກໍຍົກຍ້າຍມາຈາກພະແນກ ວິທະຍາສາດ ແລະ ເຕັກໂນໂລຊີ ນອກນັ້ນ ຍັງສາ ມາດຄັດເລືອກ ແຕ່ລະດ້ານໄດ້ດັ່ງນີ້: ພົນລະເມືອງດີ,ພັດທະນາດີ ແລະ ສ້າງຄອບຄົວດີ ໄດ້ 11 ສະ ຫາຍ ເທົ່າກັບ 100%.

ສ່ວນວຽກງານກອງທຶນພັດທະນາ ແລະ ການສ້າງເງິນຄັງຂອງຫນ່ວຍ ກໍໄດ້ມີການເຄື່ອນໄຫວ ແລະ ຈັດຕັ້ງປະຕິບັດຢ່າງເປັນລະບົບ ແລະ ມີປະສິດທິພາບ ເຮັດໃຫ້ມີເງິນກອງທຶນທັງຫມົດ 14 ລ້ານກວ່າກີບ ແລະ ມີເງິນຄັງທັງຫມົດ 13 ລ້ານກວ່າກີບ. ເຊິ່ງເງິນຈຳນວນດັ່ງກ່າວ ໄດ້ປ່ອຍກູ້ໃຫ້ແກ່ສະມາຊິກພາຍໃນຫນ່ວຍ ນຳໄປພັດທະນາເສດຖະກິດຄອບຄົວ ແລະ ແກ້ໄຂຊີວິດການເປັນຢູ່ ເຮັດໃຫ້ມີສະມາຊິກຫລາຍສະຫາຍ ກາຍເປັນຄອບຄົວຕົວແບບ ທີ່ສາມາດສ້າງລາຍຮັບເຂົ້າຄອບຄົວຂອງຕົນ ໄດ້ຫລາຍສິບລ້ານກີບຕໍ່ປີ. ຕໍ່ກັບຜົນງານດັ່ງກ່າວ ສະຫະພັນແມ່ຍິງແຂວງ ອຸດົມໄຊ ຈຶ່ງອອກຂໍ້ຕົກລົງ ວ່າດ້ວຍການ ມອບໃບ ຢັ້ງຢືນ 3 ດີ ປະຈຳປີ 2021 ໃຫ້ແກ່ສະຫະພັນແມ່ຍິງຫນ່ວຍ ພະແນກພະລັງງານ ແລະ ບໍ່ແຮ່. ໃຫ້ກຽດມອບໂດຍທ່ານ ປອ ນາງວຽງມະລີ ສຸລິໄຊ ຮອງປະທານສະຫະພັນແມ່ຍິງແຂວງ ແລະ ຮັບໂດຍທ່ານນາງ ອຸ່ນເຮືອນ ຈັນທະວີສຸກ ປະທານສະຫະພັນ ແມ່ຍິງຫນ່ວຍ ພະແນກ ພະລັງງານ ແລະ ບໍ່ແຮ່ແຂວງ.

ຈາກນັ້ນ ໄດ້ມີການຜ່ານໃບສະຫມັກເພື່ອເຂົ້າແຂ່ງຂັນ 3 ດີ ພ້ອມທັງທິດທາງແຜນການເຄື່ອນໄຫວ ໃນປີ 2020 ແລະ ສະມາຊິກແມ່ຍິງໄດ້ພ້ອມກັນຈັບມື ເພື່ອສືບຕໍ່ຈັດຕັ້ງປະຕິບັດຂໍ້ແຂ່ງຂັນ 3 ດີໃນ ຕໍ່ຫນ້າ.

ຕອນທ້າຍຂອງພິທີ ທ່ານປອ ນາງວຽງມະລີ ສຸລິໄຊ ຮອງປະທານສະຫະພັນແມ່ຍິງແຂວງ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ ຕໍ່ສະມາຊິກແມ່ຍິງ ພາຍໃນຫນ່ວຍ ພະແນກພະລັງງານ ແລະ ບໍ່ແຮ່ ເພື່ອເປັນບ່ອນອີງໃນການຈັດຕັ້ງປະຕິບັດ ຂໍ້ແຂ່ງຂັນ 3 ດີ ໃຫ້ມີຜົນສຳເລັດ.