ມີເດຍລາວແຂວງເຊກອງ ຂ່າວ: ພຸດທະສອນ
ເນື່ອງໃນໂອກາດສະເຫຼີມສະຫຼອງ ວັນລັດຖະທໍາມະນູນແຫ່ງຊາດ ຄົບຮອບ 30 ປີ (15/8/1991-15/8/2021) ໃນຕອນເຊົ້າວັນທີ 28 ກັນຍາ 2021 ນີ້, ບັນດາການນໍາ ແຂວງເຊກອງ ນຳໂດຍ ທ່ານ ເຫລັກໄຫລ ສີວິໄລ ກໍາມະການສູນກາງພັກ, ເລຂາພັກແຂວງ ເຈົ້າແຂວງເຊກອງ, ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍບັນດາທ່ານໃນຄະນະບໍລິຫານງານພັກແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ອາດີດການນໍາຂອງແຂວງ, ກໍາລັງປ້ອງກັນຊາດ-ປ້ອງກັນຄວາມສະຫງົບ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ອົງການປົກຄອງຂັ້ນແຂວງ-ຂັ້ນເມືອງ ໄດ້ເຂົ້າວາງກະຕ່າດອກໄມ້ ຢູ່ອານຸສາວະລີ ປະທານ ໄກສອນ ພົມວິຫານ.

ທັງນີ້, ກໍເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ເຖິງຄຸນງາມຄວາມດີ, ນ້ຳໃຈຕໍ່ສູ້ຢ່າງພິລະອາດຫານ ແລະບໍ່ຍອມຈໍານົນຂອງບັນພະບູລຸດລາວ ທີ່ເສຍສະຫຼະຊີວິດ, ເລືອດເນື້ອເພື່ອພາລະກິດປະຕິວັດ ຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາ ຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະ ແລະປະກາດເອກະລາດ, ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.

ໂອກາດນີ້ ທ່ານ ເຫລັກໄຫລ ສີວິໄລ ໄດ້ຕາງຫນ້າການນໍາແຂວງເຊກອງ ໄດ້ໃຫ້ຄໍາປະຕິຍານວ່າ ຈະນໍາພາ ແລະເສີມຂະຫຍາຍມູນເຊື້ອ, ຜົນງານ, ຄຸນງາມຄວາມດີຂອງທ່ານເຂົ້າໃນພາລະກິດປົກປັກຮັກສາ ແລະສ້າງສາປະເທດຊາດ ກໍຄືແຂວງເຊກອງໃຫ້ມີຄວາມເຂັ້ມແຂງ, ສັງຄົມມີຄວາມສະຫງົບສຸກ, ປະຊາຊົນມີຄວາມສາມັກຄີປອງດອງ, ມີຄວາມຜາສຸກ, ມີປະຊາທິປະໄຕ, ມີຄວາມຍຸຕິທໍາ ແລສີວິໄລ, ພ້ອມກັນຮໍ່າຮຽນເອົາແນວຄິດຄຸນສົມບັດສິນທໍາປະຕິວັດຂອງປະທານໄກສອນ ພົມວິຫານ, ສືບຕໍ່ຢ່າງແຂງແຮງໃນການປະຕິບັດຫນ້າທີ່ວຽກງານນິຕິບັນຍັດ ກໍຄືວຽກງານສະພາໃຫ້ເປັນຕົວແທນແຫ່ງສິດຜົນປະໂຫຍດຂອງປະຊາຊົນຢ່າງແທ້ຈິງ.