ມີເດຍລາວແຂວງບໍ່ແກ້ວ ກອງປະຊຸມໃຫຍ່ ຄັ້ງທີ V ຂອງບ້ານປາກງາວ ເມືອງຫ້ວຍຊາຍ ແຂວງບໍ່ແກ້ວ ໃນວັນທີ 27 ກັນຍານີ້, ທີ່ຫໍປະຊຸມຂອງບ້ານເປັນກຽດເຂົ້າຮ່ວມຂອງ ທ່ານ ບຸນຄົງ ວົງຄຳຈັນ ຮອງເລຂາພັກເມືອງ, ປະທານກວດກາພັກ-ລັດ ເມືອງຫ້ວຍຊາຍ, ມີບັນດາຄະນະພັກຊີ້ນໍາກຸ່ມບ້ານ, ຄະນະພັກຮາກຖານ, ອຳນາດການປົກຄອງບ້ານ, ເຖົ້າແກ່ແນວໂຮມ, ແຂກຖືກເຊີນຕະຫຼອດຮອດປະຊາຊົນເຂົ້າຮ່ວມ.

ທ່ານ ເດດສະຫວັນ ສຸບົວຄຳ ນາຍບ້ານໆປາກງາວ ໄດ້ຜ່ານບົດສະຫຼຸບການເຄື່ອນໄຫວໃນໄລຍະ 5 ປີ ຜ່ານມາ, ບ້ານປາກງາວເປັນບ້ານໜຶ່ງທີ່ຂຶ້ນກັບກຸ່ມບ້ານປາກງາວ, ເມືອງຫ້ວຍຊາຍ ແຂວງບໍ່ແກ້ວ, ປະກອບມີ 250 ຄົວເຮືອນ, ມີ 287 ຄອບຄົວ, ມີພົນລະເມືອງທັງໝົດ 1,039 ຄົນ, ຍິງ 513 ຄົນ, ປະກອບມີ 3 ເຜົ່າຄື: ເຜົ່າລາວລຸ່ມ, ເຜົ່າລື້, ເຜົ່າພູນ້ອຍ, ປະຊາຊົນພາຍໃນບ້ານສ່ວນໃຫ່ຍຖືເອົາອາຊີບປູກຟັງ ແລະ ຄ້າຂາຍເປັນອາຊີບສໍາຮອງ, ຜ່ານມາອົງການປົກຄອງບ້ານໄດ້ສົມທົບກັບຄະນະພັກເປັນເຈົ້າການສຶກສາອົບຮົມການເມືອງ-ແນວຄິດ, ເຜີຍແຜ່-ເຊື່ອມຊຶມ ບັນດາແນວທາງນະໂຍບາຍຂອງພັກ, ຂໍ້ກຳນົດ, ກົດໝາຍຕ່າງໆຂອງລັດ ໃຫ້ແກ່ປະຊາຊົນບັນດາເຜົ່າ ຢ່າງເປັນປົກກະຕິ ຕິດພັນການປັບປຸງພື້ນຖານໂຄງລ່າງຂອງບ້ານຢ່າງຕໍ່ເນື່ອງ ເຮັດໃຫ້ບ້ານສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ມີຄວາມສະຫງົບປອດໄພໂດຍພື້ນຖານ, ສະພາບເສດຖະກິດ ຊີວິດການເປັນຢູ່ຂອງປະຊາຊົນ ໄດ້ຮັບການຊຸກຍູ້ສົ່ງເສີມ ແລະ ພັດທະນາໃຫ້ນັບມື້ດີຂຶ້ນເລື້ອຍໆ, ຈາກນັ້ນ ກອງປະຊຸມຍັງໄດ້ປ່ອນບັດຄັດເລືອກເອົາຄະນະບ້ານຊຸດໃໝ່ມີຜູ້ສະໝັກ 7 ທ່ານເລືອກເອົາ 5 ທ່ານ, ຜ່ານການປ່ອນບັດຄັດເລືອກສາມາດເລືອກໄດ້ ທ່ານ ສົມມຸດ ໃຈຍະຮັກ ເປັນນາຍບ້ານ, ທ່ານ ອຸ່ນເຮືອນ ປັນຍາສັກ, ທ່ານ ຄຳຊອນ ນວນແກ້ວ, ທ່ານ ບຸນທັນ ທຳມະວົງ, ທ່ານ ສົມບັດ ໃຈຍະຮັກ ເປັນຮອງນາຍບ້ານ, ເລືອກຕັ້ງເອົາ ທ່ານ ອຸ່ນເຮືອນ ປັນຍາສັກ ເປັນປະທານກວດກາຂັ້ນບ້ານ, ທ່ານ ໄຊຍະພອນ ແກ້ວບຸນເລີດ ເປັນຮອງປະທານກວດກາຂັ້ນບ້ານ.

ໂອກາດນີ້, ທ່ານ ບຸນຄົງ ວົງຄຳຈັນ ຮອງເລຂາພັກເມືອງ, ປະທານກວດກາພັກ-ລັດ ເມືອງຫ້ວຍຊາຍ, ໄດ້ມີຄຳເຫັນສະແດງຄວາມຍ້ອງຍໍຊົມເຊີຍຕໍ່ ຜົນງານ, ຂອງຄະນະບ້ານຊຸດເກົ່າທີຍາດມາໄດ້ໃນໄລຍະຜ່ານມາ, ທ່ານ ເນັ້ນໜັກໃຫ້ຄະນະບ້ານຊຸດໃໝ່ ຕ້ອງສົມທົບກັບຄະນະພັກຮາກຖານ ສືບຕໍ່ສຶກສາອົບຮົມການເມືອງ-ແນວຄິດ ຄົ້ນຄວ້າແນວທາງແຜນພັດທະນາ ໃຫ້ຖຶກຕ້ອງສອດຄ່ອງກັບທ່າແຮງດ້ານເສດຖະກິດຂອງບ້ານ ເປັນສຳຄັນ ຕິດພັນກັບ ການແກ້ໄຂບັນຫາປະກົດການຫຍໍ້ທໍ້ໃນສັງຄົມເປັນຕົ້ນແມ່ນ: ຂີ້ລັກງັດແງະ, ສິ່ງເສບຕິດ ແລະ ຄວາມບໍ່ສະຫງົບພາຍໃນບ້ານໃຫ້ໝົດໄປ, ຮຽກຮ້ອງໃຫ້ ຄະນະບ້ານຊຸດໃໝ່ ແລະ ປະຊາຊົນບັນດາເຜົ່າ ຈົ່ງພ້ອມກັນປົກປັກຮັກສາມູນເຊື້ອຮີດຄອງປະເພນີຂອງຊາດ ກໍ່ຄືຂອງເຜົ່າໄວ້ໃຫ້ໝັ້ນຄົງຕະຫຼອດໄປ ແລະ ສ້າງຄວາມສາມັກຄີພາຍໃນເປັນປຶກແຜ່ນ, ພ້ອມກັນ ນຳເອົາເນື້ອໃນຈິດໃຈກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍໃຫ້ເກີດດອກອອກຜົນເທື່ອລະກ້າວ.
ພາບ-ຂ່າວ: ບຸນຈັນ ບຸນປັນຍາ