ມີເດຍລາວແຂວງເຊກອງ ໃນວັນທີ 27 ກັນຍາ 2021 ນີ້ ຊາວໜຸ່ມຮາກຖານ ພະແນກ ຖວທ ແຂວງເຊກອງ ໄດ້ຈັດພິທີຮັບໃບຢັ້ງຢືນ 4 ບຸກ ປະຈໍາປີ 2020 ໂດຍມີທ່ານ ແສງໂນພາ ມິກດາວົງ ຮອງເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວແຂວງ, ມີທ່ານ ນາງ ວຽງສະໄໝ ວົງວິຈິດ ຄະນະພັກຮາກຖານ, ຮອງຫົວໜ້າພະແນກ ຖວທ ແຂວງ, ມີແຂກຖືກເຊີນ ພ້ອມດ້ວຍສະມາຊິກຊາວໜຸ່ມເຂົ້າຮ່ວມ.

ທ່ານ ເພັດພູທອນ ສິດທິເດດ ກຳມະການຊາວໜຸ່ມແຂວງ ເລຂາຄະນະຊາວໜຸ່ມ ພະແນກ ຖວທ ແຂວງເຊກອງ ໄດ້ຂຶ້ນຜ່ານບົດສະຫຼຸບການປະເມີນຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ປີ 2020 ວ່າ: ພາຍໃນຮາກຖານຊາວໜຸ່ມພະແນກ ຖວທ ແຂວງ ມີສະມາຊິກທັງໝົດ 44 ສະຫາຍ ຍິງ 25 ສະຫາຍ, ມີຄະນະຮາກຖານ 4 ສະຫາຍ, ຍິງ 2 ສະຫາຍ, ແບ່ງອອກເປັນ 3 ໜ່ວຍຂຶ້ນກັບ ແລະມີ 6 ຈຸ ເພື່ອເຄື່ອນໄຫວດຳເນີນຊີວິດການເມືອງ, ໂດຍໃນໄລຍະ 1 ປີຜ່ານມາ ຄະນະຊາວໜຸ່ມຮາກຖານ ພະແນກ ຖວທ ແຂວງ ໄດ້ເອົາໃຈໃສ່ຊີ້ນຳໆພາ ແລະເປັນເຈົ້າການຈັດຕັ້ງຜັນຂະຫຍາຍຂະບວນການ 4 ບຸກຕິດພັນກັບຂໍ້ແຂ່ງຂັນຮັກຊາດ ແລະພັດທະນາຢ່າງຈິງຈັງຕໍ່ເນື່ອງ ຊຶ່ງເຮັດໃຫ້ສະມາຊິກຊາວໝຸ່ມ ມີຄວາມເຊື່ອໝັ້ນຕໍ່ແນວທາງການເມືອງ ແລະການຊີ້ນຳໆພາຂອງພັກ-ລັດ, ຫ້າວຫັນຕື່ນຕົວໃນການປະຕິບັດໜ້າທີ່ວຽກງານວິຊາສະເພາະ, ເອົາໃຈໃສ່ປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດໃຫ້ກ້າວຂຶ້ນຢ່າງບໍ່ຢຸດຢັ້ງ ເປັນຕົ້ນ ບັນດາສື່ມວນຊົນ ໄດ້ເຮັດໜ້າທີ່ເປັນກະບອກສຽງອັນແຫຼມຄົມ ໃຫ້ແກ່ພັກ-ລັດ ເຜີຍແຜ່ຂໍ້ມູນຂ່າວສານອອກສູ່ສັງຄົມຢ່າງກວ້າງຂວາງ; ນອກນີ້ ຊາວໜຸ່ມພວກເຮົາ ກໍ່ໄດ້ເຂົ້າຮ່ວມຮັບຟັງປາຖະກະຖາການເລົ່າມູນເຊື້ອວັນສໍາຄັນຕ່າງໆຂອງພັກ ກໍຄືຂອງຊາດ ແລະເອກະສານອື່ນໆ ທີ່ຂັ້ນແຂວງ ແລະພະແນກ ຈັດຂຶ້ນ ລວມມີ 15 ຄັ້ງ ມີ 17 ເອກະສານ, ມີສະມາຊິກຊາວໜຸ່ມເຂົ້າຮ່ວມ 145 ເທື່ອຄົນ, ຍິງ 109 ເທື່ອຄົນ.

ໂດຍຜ່ານການຈັດຕັ້ງປະຕິບັດສາມາດຕີລາຄາໄດ້ຄື: ບຸກດ້ານການເມືອງແນວຄິດ ປະຕິບັດໄດ້ 91,08%; ດ້ານການຝຶກຝົນຫຼໍ່ຫຼອມ-ການຮ່ຳຮຽນ ປະຕິບັດໄດ້ 90,60%; ບຸກທາງດ້ານວຽກງານການຈັດຕັ້ງ ປະຕິບັດໄດ້ 90,06% ແລະບຸກທາງດ້ານວິຊາຊີບ-ສ້າງວຽກເຮັດງານທຳ ປະຕິບັດໄດ້ 91,03%, ຈັດປະເພດສະມາຊິກຊາວໜຸ່ມ 4 ບຸກ ປະເພດ 1 ຈໍານວນ 42 ສະຫາຍ, ຍິງ 24 ສະຫາຍ, ປະເພດ 2 ຈໍານວນ 2 ສະຫາຍ, ຍິງ 1 ສະຫາຍ; ຈາກຜົນງານດັ່ງກ່າວນັ້ນ, ທ່ານ ແສງໂນພາ ມິກດາວົງ ກໍໄດ້ຂຶ້ນມອບໃບຢັ້ງຢືນ 4 ບຸກໃຫ້ແກ່ຮາກຖານຊາວໜຸ່ມ ພະແນກ ຖວທ ແຂວງ, ກ່າວຮັບແມ່ນທ່ານ ເພັດພູທອນ ສິດທິເດດ ເລຂາຄະນະຊາວໜຸ່ມ ພະແນກ ຖວທ, ນອກນີ້ ໄດ້ມີການມອບໃບຍ້ອງຍໍ, ໃບຊົມເຊີຍໃຫ້ແກ່ສະມາຊິກຊາວໜຸ່ມ 4 ບຸກຕື່ມອີກ.

ໃນໂອກາດນີ້, ທ່ານ ແສງໂນພາ ມິກດາວົງ ໄດ້ຮຽກຮ້ອງໃຫ້ຄະນະຊາວໜຸ່ມຮາກຖານ ພະແນກ ຖວທ ແຂວງ ຈົ່ງສືບຕໍ່ສຶກສາອົບຮົບການເມືອງແນວຄິດໃຫ້ແກ່ສະມາຊິກ, ເອົາໃຈໃສ່ຊຸກຍູ້ຈັດຕັ້ງປະຕິບັດຂໍ້ແຂ່ງຂັນ 4 ບຸກ ຕິດພັນກັບຂໍ້ແຂ່ງຂັນຮັກຊາດພັດທະນາ, ຮຽກຮ້ອງໃຫ້ຄົນລຸ້ນໜຸ່ມຍົກສູງການປະຕິບັດ 2 ຫນ້າທີ່ຍຸດທະສາດ, ພ້ອມທັງເອົາໃຈໃສ່ພົວພັນແຮກສ່ຽວກັບອົງການຊາວໜຸ່ມພາຍໃນ ແລະຕ່າງແຂວງ ເພື່ອແລກປ່ຽນບົດຮຽນມາພັດທະນາວຽກງານໃນຂະແໜງການຕົນໃຫ້ດີຂຶ້ນກວ່າເກົ່າ
ຂ່າວ : ພຸດທະສອນ