ປະຈຸບັນ; ທົ່ວໂລກ ພວມປະເຊີນກັບການລະບາດຂອງພະຍາດໂຄວິດ-19 ແລະມັນໄດ້ປັບຕົວເປັນຫຼາຍສາຍພັນໃໝ່ ທີ່ມີລັກສະ ນະຮ້າຍແຮງ ຂະຫຍາຍຕົວໃນວົງກ້ວາງ; ຂະນະນີ້ (25.09.2021) ມີຜູ້ຕິດເຊື້ອສະສົມ 230 ລ້ານກ່ວາຄົນ (ໃໝ່ເກືອບ 5 ແສນຄົນ), ປົວດີ 208 ລ້ານກ່ວາຄົນ, ເສຍຊີວິດ 4,75 ລ້ານກ່ວາຄົນ (ໃໝ່ 8.305 ຄົນ); ສໍາລັບ ສປປ ລາວ, ເຖິງວ່າທົ່ວພັກ, ທົ່ວລັດ ແລະທົ່ວສັງຄົມ ໄດ້ເອົາໃຈໃສ່ເຂົ້າຮ່ວມປະຕິບັດມາດຕະການທີ່ລັດຖະບານວາງອອກ ກ່ຽວກັບການສະກັດກັ້ນ ແລະຄວບຄຸມການລະບາດຂອງພະຍາດນີ້ຢ່າງຈິງຈັງໃນຜ່ານມາ ໂດຍສະເພາະນັບແຕ່ເດືອນເມສາ 2021 ເປັນຕົ້ນມາ ໄດ້ມີຜູ້ຕິດເຊື້ອໃນຊຸມຊົນເພີ່ມຂຶ້ນຢ່າງໄວວາ ແລະແຜ່ລະບາດໄປຫຼາຍແຂວງໃນທົ່ວປະເທດ (ຍົກເວັ້ນແຂວງຫົວພັນ). ສະນັ້ນ, ລັດຖະບານ ຈຶ່ງຍົກລະດັບມາດຕະການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດພະຍາດດັ່ງກ່າວ ຢ່າງເລັ່ງດ່ວນ ເພື່ອບໍ່ໃຫ້ແຜ່ລາມເປັນວົງກວ້າງ.

ລັດຖະບານໄດ້ອອກຄໍາສັ່ງ ເລກທີ 15/ນຍ, ວັນທີ 21.04.2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ໂດຍສັ່ງໃຫ້ກະຊວງ, ອົງການຂັ້ນສູນກາງ ແລະອົງການປົກຄອງທ້ອງຖິ່ນທຸກຂັ້ນສືບ ຕໍ່ເພີ່ມທະວີການໂຄສະນາເຜີຍແຜ່, ສຶກສາອົບຮົມຢ່າງກວ້າງຂວາງເລິກເຊິ່ງດ້ວຍຫຼາຍຮູບແບບ ແລະວິທີການ ເພື່ອເຮັດໃຫ້ພົນລະເມືອງລາວ, ຊາວຕ່າງດ້າວ, ຜູ້ບໍ່ມີສັນຊາດ ແລະຊາວຕ່າງປະເທດຢູ່ ສປປ ລາວ ເຫັນໄດ້ໄພອັນຕະລາຍຂອງພະຍາດດັ່ງກ່າວທີ່ກາຍພັນ ແລະເພີ່ມຄວາມຮຸນແຮງ ພ້ອມທັງຮູ້ຈັກວິທີສະກັດກັ້ນ, ຄວບຄຸມ ແລະແກ້ໄຂພະຍາດນີ້ ດ້ວຍຕົນເອງ ພ້ອມທັງເຫັນໄດ້ຄວາມຈໍາເປັນຂອງລັດຖະບານໃນການປະກາດໃຊ້ມາດຕະການຕ່າງໆ ເພື່ອສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດດັ່ງກ່າວ ເພື່ອປົກປ້ອງສຸຂະພາບ ແລະຊີວິດຂອງທຸກຄົນຢູ່ ສປປ ລາວ….

ເນື້ອໃນບາງຂໍ້ຂອງຄໍາສັ່ງດັ່ງກ່າວ, ໄດ້ຫ້າມໂຄສະນາ, ເຜີຍແຜ່-ສົ່ງຕໍ່ຂໍ້ມູນຂ່າວສານ ທີ່ບໍ່ມີມູນຄວາມຈິງໃນຮູບແບບໃດໜຶ່ງ ຜ່ານສື່ຕ່າງໆ ເຮັດໃຫ້ມີຄວາມເຂົ້າໃຈຜິດ, ສ້າງຄວາມແຕກຕື່ນ ທີ່ສົ່ງຜົນກະທົບໃນທາງລົບຕໍ່ສັງຄົມ; ສະນັ້ນ, ເພື່ອຈັດຕັ້ງປະຕິບັດ ຄໍາສັ່ງເລກທີ 15/ນຍ, ກະຊວງຖະແຫຼງຂ່າວ ວັດທະນະທໍາ ແລະທ່ອງທ່ຽວ ໂດຍສະເພາະໜ່ວຍງານໂຄສະນາຂໍ້ມູນຂ່າວສານ ແລະຕ້ານຂ່າວສານທີ່ບິດເບືອນຄວາມຈິງຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂດວິດ-19 ໄດ້ອອກຄໍາແນະນໍາ ເລກທີ 528/ຖວທ, ວັນທີ 24.09.2021 ກ່ຽວກັບການເພີ່ມທະວີການໂຄສະນາ ໃຫ້ແກ່ວຽກງານການປ້ອງກັນ, ຄວບຄຸມ ແລະແກ້ໄຂການລະ ບາດຂອງພະຍາດນີ້ ໂດຍໃຫ້ບັນດາສື່ມວນຊົນໃນທົ່ວປະເທດ ເພີ່ມທະວີວຽກງານສຶກສາອົບຮົມນໍາພາແນວຄິດ, ນໍາພາ-ຊີ້ນໍາພະນັກງານ-ບຸກຄະລາກອນສື່ມວນຊົນທີ່ກໍາລັງປະຈັນບານກໍ່ຄືເຮັດໜ້າທີ່ວຽກງານໂຄສະນາໃຫ້ແກ່ວຽກງານຕ້ານພະຍາດນີ້ ດ້ວຍຄວາມຮັບຜິດຊອບສູງ ແລະເສຍສະຫຼະ ພ້ອມທັງເສີມຂະຫຍາຍວຽກງານໂຄສະນາທີ່ມີຜົນສໍາເລັດໃນໄລຍະຜ່ານມາແລະສະຫຼຸບຕີລາຄາຖອດບົດຮຽນ ເພື່ອເຮັດໃຫ້ວຽກງານໂຄສະນາດີຂຶ້ນກວ່າເກົ່າ;

ຄະນະບັນນາທິການສື່ມວນຊົນທຸກພາກສ່ວນ ຕ້ອງເປັນເຈົ້າການກໍ່ຄືຮັບຜິດຊອບຕໍ່ໜ້າທີ່ການເມືອງ ແລະໃຫ້ຖືເອົາວຽກງານໂຄສະ ນາໃຫ້ແກ່ການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂດວິດ-19 ເປັນຈຸດສໍາຄັນກວ່າໝູ່ໝົດໃນເວລານີ້ ໂດຍໃຫ້ແຕ່ງຕັ້ງຄະນະບັນນາທິການຮັບຜິດຊອບສະເພາະວຽກງານດັ່ງກ່າວນີ້; ເພີ່ມທະວີອອກໂຄສະນາ ນິຕິກໍາຕ່າງໆທີ່ກ່ຽວຂ້ອງຂອງຄະນະສະເພາະກິດ ທັງຢູ່ສູນກາງ ແລະທ້ອງຖິ່ນເປັນຕົ້ນ ແຈ້ງການ, ຄໍາສັ່ງ, ຄໍາແນະນໍາ ແລະບັນດາມາດຕະການ ທີ່ເປັນທາງການແລ້ວ ໂດຍອອກຜ່ານສື່ມວນຊົນທາງການໃຫ້ວ່ອງໄວ, ທັນການ ແລະເປັນລະບົບຕໍ່ເນື່ອງ, ອອກຖີ່ຂຶ້ນກວ່າເກົ່າ. ນອກນັ້ນ, ອອກໂຄສະນາບັນດາກົດໝາຍຕື່ມ ເປັນຕົ້ນກົດໝາຍແຮງງານ, ລະບຽບວິໄນໃນການປະຕິບັດກັກບໍລິເວນຢູ່ສູນກັກກັນ, ສູນປິ່ນປົວ ແລະບົດແນະນໍາ, ບົດສຶກສາອົບຮົມນໍາພາແນວຄິດໃຫ້ແກ່ແຮງງານລາວໄດ້ຮັບຮູ້ ແລະເຂົ້າໃຈຕື່ມ; ສືບຕໍ່ໂຄສະນາການຖະແຫຼງຂ່າວຂອງຄະນະສະເພາະກິດໃນແຕ່ລະວັນ ໂດຍສ່ອງແສງອອກໃຫ້ມີຫຼາກຫຼາຍຮູບແບບ, ຫຼາຍສີສັນ, ຫຼາຍເນື້ອໃນຜ່ານທາງສື່ວິທະຍຸ, ໂທລະພາບ ແລະສື່ສິ່ງພິມ ລວມທັງນໍາໃຊ້ໜ້າຂ່າວອອນລາຍຂອງສື່ທາງການ ແລະກະຈາຍຜ່ານລະບົບໂທລະໂຄ່ງຂອງບ້ານ-ຊຸມຊົນ, ໃນນີ້ ໃຫ້ເນັ້ນຕື່ມບັນດາມາດຕະການທີ່ອັນໃດຫ້າມ, ອັນໃດອະນຸຍາດ, ບັນຫາ ຄົງຄ້າງທີ່ກໍ່ໃຫ້ເກີດມີການລະບາດ, ການປະຕິບັດຫຼັກການໃນທາງການແພດ ແລະຂະບວນການສັກຢາວັກຊິນ, ບັນຫາເສດຖະກິດ ແລະທິດ ທາງແກ້ໄຂໃນຕໍ່ໜ້າຂອງລັດຖະບານ;

ສືບຕໍ່ໂຄສະນາ ເຕືອນສະຕີສັງຄົມ ໂດຍອອກເປັນບົດແນະນໍາ, ບົດສຶກສາອົບຮົມ, ນໍາພາແນວຄິດສັງຄົມກໍ່ຄືປະຊາຊົນໃນການຈັດ ຕັ້ງປະຕິບັດມາດຕະການຕ່າງໆຂອງຄະນະສະເພາະກິດ ແລະສ່ອງແສງ ຜູ້ທີ່ລະເມີດມາດຕະການ, ລະເມີດກົດໝາຍໃນໄລຍະຜ່ານມາ ແລະຊຸກຍູ້ຍ້ອງຍໍຊົມເຊີຍບຸກຄົນ, ນິຕິບຸກຄົນ, ການຈັດຕັ້ງ, ສັງຄົມທີ່ມີຜົນງານດີເດັ່ນໃນການປະກອບສ່ວນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດນີ້; ເພີ່ມທະວີການຕິດຕາມ, ກວດກາ ແລະເກັບກໍາສະພາບບັນຫາຫາງສຽງສັງຄົມ ກໍ່ຄືປະຊາຊົນສົນໃຈ, ຂ້ອງໃຈ ຕໍ່ກັບບັນຫາຕ່າງໆ ທີ່ເກີດຂຶ້ນໃນສັງຄົມ ໂດຍສະເພາະບັນຫາທີ່ພົ້ນເດັ່ນໃນໄລຍະການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19, ໃນນັ້ນ, ຖ້າບັນຫາກ່ຽວຂ້ອງກັບພາກສ່ວນໃດໃຫ້ປະສານຫາພາກສ່ວນນັ້ນ ເປັນຜູ້ຮັບຜິດຊອບຊີ້ແຈງຜ່ານສື່ມວນຊົນທາງການ ຫຼື ຜ່ານການຖະແຫຼງຂ່າວປະຈໍາວັນຂອງຄະນະສະເພາະກິດ; ສືບຕໍ່ຕິດຕາມ, ກວດກາ ແລະເກັບກໍາຂ່າວທີ່ບິດເບືອນຄວາມຈິງ ແລະແກ້ໄຂໃຫ້ທັນສະພາບການ ໂດຍຜ່ານສື່ມວນຊົນທາງການ.

Medialaos MMD (ແຫຼ່ງຂໍ້ມູນຈາກ: ຣັດສະໝີ ດວງສັດຈະ)