ສະພາບແຜ່ລະບາດຂອງພະຍາດໂຄວິດ-19 ຢູ່ປະເທດເຮົາສືບຕໍ່ຮຸນແຮງຂື້ນນັບມື້ ໂດຍສະເພາະແມ່ນຢູ່ໃນເດືອນກັນຍາ 2021 ນີ້. ຕໍ່ໜ້າສະພາບການລະບາດເປັນວົງກວ້າງໃນຊຸມຊົນເພີ່ມຂື້ນໃນແຕ່ລະມື້; ເພື່ອສືບຕໍ່ເພີ່ມທະວີວຽກງານໂຄສະນາສຶກສາອົບຮົມການເມືອງ-ແນວຄິດ ກ່ຽວກັບການຈັດຕັ້ງປະຕິບັດມາດຕະການປ້ອງກັນ; ຄວບຄຸມ; ສະກັດກັ້ນ ແລະ ແກ້ໄຂການລະບາດຂອງພະຍາດດັ່ງກ່າວ ທັງເປັນການສ້າງຄວາມເຂົ້າໃຈໃຫ້ທົ່ວສັງຄົມຮັບຮູ້ ທັງເຂົ້າໃຈແນວທາງນະໂຍບາຍຂອງພັກ-ລັດ ກ່ຽວກັບການຕໍ່ສູ້ກັບພະຍາດໂຕຮ້າຍກາດໂຄວິດ-19.

ຄະນະໂຄສະນາອົບຮົມສູນກາງພັກ ຈື່ງອອກຄຳແນະນຳສະບັບເລກທີ 35/ຄອສພ ລົງວັນທີ 29 ກັນຍາ 2021 ວ່າດ້ວຍການເພີ່ມທະວີວຽກງານໂຄສະນາອົບຮົມການເມືອງ-ແນວຄິດ ກ່ຽວກັບການຈັດຕັ້ງປະຕິບັດມາດຕະການປ້ອງກັນ; ຄວບຄຸມ; ສະກັດກັ້ນ ແລະ ແກ້ໄຂພະຍາດໂຄວິດ-19 ຄຳແນະນຳສະບັບນີ້ແມ່ນສົ່ງເຖີງຄະນະໂຄສະນາອົບຮົມນະຄອນຫຼວງ, ບັນດາແຂວງໃນຂອບເຂດທົ່ວປະເທດ; ກົມໂຄສະນາອົບຮົມຂອງບັນດາກະຊວງ-ອົງການຂັ້ນສູນກາງ ໃນຄຳແນະນຳ ມີ 7 ຂໍ້ສຳຄັນດັ່ງນີ້:

  1. ຄະນະໂຄສະນາອົບຮົມແຕ່ລະຂັ້ນ ຕ້ອງຖືເອົາທິດນຳຂອງກົມການເມືອງສູນກາງພັກທີ່ວ່າ: “ຖືເອົາການຕ້ານສະກັດກັ້ນ, ຄວບຄຸມ ແລະ ປ້ອງກັນພະຍາດໂຄວິດ-19 ເປັນໜ້າທີ່ຍຸດທະສາດສຳຄັນແຖວໜ້າ ແລະ ຮີບດ່ວນໃນການນຳພາ-ຊີ້ນຳ ແລະ ບັນຊາຕົວຈີງຄືຢູ່ໃນສະພາວະສົງຄາມ; ຖືເປັນປັດໃຈສຳຄັນຕັດສິນກ່ວາໝູ່ໃນການຈັດຕັ້ງປະຕິ ບັດສະກັດກັ້ນ, ຄວບຄຸມການແຜ່ລະບາດຂອງເຊື້ອພະຍາດໂຄວິດ-19, ເດັດຂາດບໍ່ໃຫ້ປະເທດເຮົາມີການລະບາດເຊື້ອພະຍາດໃນຄັ້ງໃໝ່ ແລະ ການລະບາດຮອບໃໝ່ ເຊີ່ງຈະທະວີຄູນຂື້ນກ່ວາເກົ່າ; ຕ້ອງຖືເປັນໜ້າທີ່ຍຸດທະສາດຂອງທົ່ວພັກ, ທົ່ວລັດ, ທົ່ວປວງຊົນລາວທັງຊາດ” ເສີມຂະຫຍາຍບົດບາດສາຍພົວພັນທີ່ວ່າ: “ພັກນຳພາ, ລັດຄຸ້ມຄອງ, ປະຊາຊົນເປັນເຈົ້າ” ເປັນໜ້າທີ່ວຽກງານໃນການເຄື່ອນໄຫວໂຄສະນາສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກພັກ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ.
  2. ຕ້ອງຖືເປັນແນວທາງຍຸດທະສາດໃນການຕ້ານ, ສະກັດກັ້ນ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ຖືເປັນສະໜາມຮົບແນວໜ້າ, ເປັນສະໜາມຮົບປະຈັນບານໃນວຽກງານໂຄສະນາເຜີຍແຜ່, ສຶກສາອົບ ຮົມ, ຊີ້ແຈງອະທິບາຍດ້ວຍເຫດ ແລະ ຜົນ; ສືບຕໍ່ເພີ່ມທະວີວຽກງານໂຄສະນາສຶກສາອົບຮົມຢ່າງກວ້າງຂວາງ ແລະ ເລີກເຊີ່ງ ດ້ວຍຫຼາຍຮູບແບບ ແລະ ຫຼາຍວິທີການ ເພື່ອເຮັດໃຫ້ພະນັກງານ, ລັດຖະກອນ, ກຳມະກອນ ແລະ ປະຊາຊົນລາວບັນດາເຜົ່າ ລວມທັງຊາວຕ່າງດ້າວທີ່ດຳລົງຊີວິດຢູ່ ສປປ ລາວ ຕ້ອງມີຄວາມຮັບຮູ້-ເຂົ້ໃຈ ກ່ຽວກັບໜ້າທີ່ ແລະ ພັນທະໃນການປະກອບສ່ວນເຂົ້າໃນວຽກງານປ້ອງກັນຕ້ານ, ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19.
  3. ເພີ່ມທະວີວຽກງານເກັບກຳສະພາບແນວຄິດ ແລະ ເກັບກຳຫາງສຽງສັງຄົມ ເປັນຕົ້ນແມ່ນເກັບກຳສະພາບແນວຄິດ, ຫາງສຽງສັງຄົມຂອງພະນັກງານ, ປະຊາຊົນ, ຕິດຕາມຂໍ້ມູນຂ່າວສານຕ່າງໆ ເປັນຕົ້ນການໃສ່ຮ້າຍປ້າຍສີ, ບິດເບືອນ, ຂ່າວທີ່ບໍ່ມີມູນຄວາມຈີງ, ການສ້າງຂ່າວປອມ ເພື່ອເຜີຍແຜ່ ແລະ ສົ່ງຕໍ່ຂໍ້ມູນຂ່າວສານທີ່ບໍ່ມີມູນຄວາມຈີງໂດຍຜ່ານສື່ຕ່າງໆ ສື່ອອນລາຍ, ເຟດບຸກ, ສື່ອິນເຕີເນັດ ແລະ ອື່ນໆ ເພື່ອສ້າງຄວາມປັ່ນປ່ວນ ເຊີ່ງສົ່ງຜົນກະທົບທາງລົບຕໍ່ສັງຄົມ ເພື່ອສະຫຼຸບລາຍງານໃຫ້ຂັ້ນເທີງມີທິດຊີ້ນຳແກ້ໄຂຢ່າງວ່ອງໄວ ແລະ ທັນການ.
  4. ເພີ່ມທະວີວຽກງານປະສານສົມທົບຄະນະພັກແຕ່ລະຂັ້ນ, ອົງການຈັດຕັ້ງມະຫາຊົນແຕ່ລະຂັ້ນ ໃນການເຄື່ອນໄຫວເຮັດວຽກງານໂຄສະນາເຜີຍແຜ່, ສຶກສາອົບຮົມແນວຄິດ ແລະ ອະທິບາຍຊີ້ແຈງ ກ່ຽວກັບມາດຕະການໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ເປັນຕົ້ນຄຳສັ່ງ ຂອງນາຍົກລັດຖະ ມົນຕີ ເລກທີ 15/ນຍ; ຄຳສັ່ງແນະນຳ ຂອງຄະນະເລຂາທິການສູນກາງພັກ ເລກທີ 87/ຄລສພ, ຄຳສັ່ງ ເລກທີ 16/ຈນວ, ແຈ້ງການຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ແລະ ທ້ອງຖີ່ນ; ເອກະສານທີ່ທາງໂຄສະນາອົບຮົມສູນກາງພັກ.
  5. ເພີ່ມທະວີວຽກງານໂຄສະນາສຶກສາອົບຮົມການເມືອງ-ແນວຄິດໃຫ້ພະນັກງານ, ລັດຖະກອນ, ທະຫານ, ຕຳຫຼວດ, ກຳມະກອນ ແລະ ປະຊາຊົນລາວບັນດາເຜົ່າ ກ່ຽວກັບມູນເຊື້ອຮັກຊາດ, ຈິດໃຈເອກະລາດ, ເປັນເຈົ້າຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເສີມຂະຫຍາຍມູນເຊື້ອດຸໝັ່ນ, ອົດທົນ, ຂະຫຍັນພຽນ ແລະ ປະດິດສ້າງໃນການອອກແຮງງານ, ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ໂດຍຕິດພັນກັບຂະບວນການປະຕິບັດຄຳຂັວນ ແລະ ຂໍ້ແຂ່ງຂັນຂອງບັນດາອົງການຈັດຕັ້ງມະຫາຊົນ ໄປພ້ອມກັບຂະບວນການສ້າງຄອບຄົວສາມັກຄີ, ຄອບຄົວວັດທະນະທຳ… ຢ່າງເປັນຂະບວນການຫ້າວຫັນຟົດຟື້ນ.
  6. ເພີ່ມທະວີວຽກງານໂຄສະນາປຸກລະດົມທຸກກຳລັງແຮງສັງລວມຂອງປະຊາຊົນຢູ່ໃນນະຄອນຫຼວງ, ແຂວງ, ນະຄອນ, ເມືອງ, ຮາກຖານບ້ານ, ຊຸມຊົນ ປະກອບສ່ວນເຂົ້າຂະບວນການຕ້ານ, ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ນັບທັງພະນັກງານ, ທະຫານ, ຕຳຫຼວດ, ລັດຖະກອນ, ກຳມະກອນ, ນັກທຸລະ ກິດ, ຜູ້ປະກອບການ, ນັກຮຽນຮູ້, ປັນຍາຊົນ, ປະຊາຊົນ ແລະ ຊາວຕ່າງດ້າວທີ່ດຳລົງຊີວິດຢູ່ໃນ ສປປ ລາວ ຈົ່ງພ້ອມກັນຮ່ວມແຮງ, ຮ່ວມໃຈ,  ເປັນຈິດໜື່ງໃຈດຽວເຂົ້າຮ່ວມໃນ ສະໜາມຮົບຕໍ່ສູ້ຕ້ານພະຍາດໂຄວິດ-19 ຈົ່ງສາມັກຄີກັນ, ພ້ອມກັນຜ່ານຜ່າວິກິດການຂອງພະຍາດໂຄວິດ-19 ໃນຄັ້ງນີ້.
  7. ເພີ່ມທະວີການໂຄສະນາສຶກສາອົບຮົມການເມືອງ-ແນວຄິດ ກ່ຽວກັບມາດຕະການໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 “ຖືເອົາການຮັກສາໄລຍະຫ່າງໃນສັງຄົມເປັນປັດໄຈຕັດສິນ; ຖືເອົາການກວດວິເຄາະຫາເຊື້ອພະຍາດໂຄວິດເປັນຂໍກະແຈສຳຄັນພື້ນຖານ; ຖືເອົາການປີ່ນປົວຜູ້ທີ່ຕິດເຊື້ອເປັນໜ້າທີ່ແຖວໜ້າປະຈັນບານ; ຖືເອົາການປົກປັກຮັກສາສຸຂະພາບອະນາໄມໃນສັງຄົມແມ່ນໜ້າທີ່ຕົ້ນຕໍ; ຖືເອົາການປຸກລະ ດົມຂະບວນການໃນການສັກຢາວັກຊິນເປັນຍຸດທະສາດສຳຄັນໃນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19, ຖືເອົາວຽກງານປ້ອງກັນຊາດ-ປ້ອງກັນຄວາມສະຫົງບ ຄວາມປອດໄພໃນທົ່ວສັງຄົມເປັນໜ້າທີ່ຂອງທົ່ວປວງຊົນ” ດ້ວຍການໂຄສະນາປຸກລະດົມທົ່ວປວງຊົນເຂົ້າຮ່ວມຂະບວນການສັກວັກຊິນ ເພື່ອສ້າງພູມຕ້ານທານປ້ອງກັນການລະບາດພະຍາດໂຄວິດ-19 ໃຫ້ໄດ້ຕາມແຜນການທີ່ວາງໄວ້ ພ້ອມທັງ ຖືເອົາການສັກວັກຊິນກັນພະຍາດເປັນໜ້າທີ່ ແລະ ພັນທະຂອງພົນລະເມືອງລາວທຸກຄົນ, ທັງເປັນຍຸດທະສາດຂອງພັກ ແລະ ລັດຖະບານ ສປປ ລາວ ໃນການສະກັດກັ້ນ, ປ້ອງກັນ, ຄວບຄຸມການແຜ່ລະບາດເຊື້ອພະຍາດໂຄວິດ-19.

ຄະນະໂຄສະນາອົບຮົມທຸກຂັ້ນກໍ່ຄືບັນດາກົມໂຄສະນາອົບຮົມໃນບັນດາກະຊວງ-ອົງການຂັ້ນສູນກາງ ນອກຈາກການຈັດຕັ້ງໂຄສະນາ-ເຜີຍແຜ່ເຊື່ອມຊຶມພາຍໃນກົມກອງຂອງຕົນແລ້ວ ຍັງຈະຕ້ອງປະສານສົມທົບ ກັບສຳນັກງານສື່ມວນຊົນ ທັງສູນກາງ ແລະ ທ້ອງຖີ່ນ, ຜູ້ນຳໃຊ້ພາຫະນະສື່ມວນຊົນ ທີ່ຕົນຄຸ້ມຄອງຈັດຕັ້ງໂຄສະນາເຜີຍແຜ່ຢ່າງກວ້າງຂວາງ ຄຳແນະນຳສະບັບນີ້ເພື່ອໃຫ້ທົ່ວສັງຄົມມີຄວາມຮັບຮູ້ເຂົ້າໃຈຢ່າງກວ້າງຂວາງ ແລະ ທ່ົວເຖີງທຸກເປົ້າໝາຍ ແນໃສ່ເຮັດໃຫ້ການຈັດຕັ້ງປະຕິບັດຄຳແນະນຳສະບັບນີ້ປະສົບຜົນສຳເລັດສູງສຸດ.

ຂໍຮຽກຮ້ອງຈົ່ງສາມັກຄີກັນຮ່ວມແຮງ-ຮ່ວມໃຈ ຜ່ານຜ່າວິກິດການໃນຄັ້ງນີ້ໄປໃຫ້ໄດ້.

#ມີເດຍລາວ