ວັນທີ 28 ກັນຍາ 2021 ກອງປະຊຸມຄະນະສະເພາະກິດຂັ້ນສູນກາງ ແລະ ຄະນະສະເພາະກິດຂັ້ນແຂວງ ຕາງໜ້າກອງເລຂາຄະນະສະເພາະກິດ ເພື່ອ​ປ້ອງ​ກັນ, ຄວບ​ຄຸມ ແລະ ແກ້​ໄຂ​ການ​ລະ​ບາດ​ຂອງ​ພະ​ຍາດ COVID-19 ໄດ້ລາຍງານ ກ່ຽວກັບສະພາບການແຜ່ລະບາດຂອງພະຍາດ COVID-19 ແລະ ການຈັດ​ຕັ້ງ​ປະ​ຕິ​ບັດບັນດາມາດ​ຕະ​ການ​ປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ໃນໄລຍະຜ່ານມາ ແລະ ມາດຕະການ ສະເພາະໜ້າດັ່ງລາຍລະອຽດຂ້າງລຸ່ມນີ້:

          ຮອດ​ວັນ​ທີ 29 ກັນ​ຍາ 2021 ມີຜູ້ຕິດເຊື້ອສະສົມ ທັງໝົດ 23.488 ກໍລະນີ (ທຽບໃສ່ຈຳນວນປະຊາກອນ ແມ່ນ0,34%), ໃນນີ້ ຕິດເຊື້ອໃນຊຸມຊົນ 9.758 ກໍລະນີ, ກໍລະນີນຳເຂົ້າ 13.730 ກໍລະນີ, ປິ່ນປົວຫາຍດີ 18.722 ຄົນ (ທຽບໃສ່ຈຳນວນຜູ້ຕິດເຊື້ອ ແມ່ນປະມານ 79,71%), ກຳລັງປິ່ນປົວ 4.766 ຄົນ  ແລະ ເສຍຊີວິດ 17 ຄົນ (ໃໝ່ 1 ເປັນເພດຍິງ 57 ປີ ຢູ່ບ້ານ ໂພນໂຮງ, ເມືອງໂພນໂຮງ ແຂວງວຽງຈັນ).

        ສະເພາະໄລຍະປະຕິບັດມາດຕະການ ເລກທີ 1177/ຫສນຍ (ວັນທີ 16 -29 ກັນຍາ 2021), ມີຜູ້ຕິດເຊື້ອທັງໝົດ 4.303  ຄົນ, ໃນນີ້ຕິດເຊື້ອຊຸມຊົນ 4.082 ຄົນ ແລະ ນຳເຂົ້າ 221 ຄົນ, ເສຍຊີວິດ 1 ຄົນ ແລະ ປີ່ນປົວຫາຍດີ 2.997 ຄົນ.

ສຳລັບແຂວງທີ່ມີການລະບາດໃນຊຸມຊົນເພີ່ມຂື້ນໃໝ່ ມີ: ແຂວງວຽງຈັນ, ຊຽງຂວາງ, ໄຊສົມບູນ ແລະ ຫຼວງພະບາງ. ສາເຫດຕົ້ນຕໍ ຂອງການຕິດເຊື້ອໃນຊຸມຊົນ ແມ່ນການເດີນທາງໄປມາລະຫວ່າງທ້ອງຖິ່ນຫາທ້ອງຖິ່ນ ໂດຍສະເພາະໃນເຂດແດງ ແລະ ການດຳເນີນກິດຈະກຳຕ່າງໆໃນສັງຄົມຢູ່ຫຼາຍບ່ອນ ຂອງການຈັດຕັ້ງ ແລະ ບຸກຄົນຈຳນວນໜຶ່ງ ຍັງບໍ່ທັນປະຕິບັດມາດຕະການຕ້ານ ແລະ ສະກັດກັ້ນການລະບາດຂອງພະຍາດ COVID-19 ໄດ້ຢ່າງຖືກຕ້ອງ ແລະ ເຂັ້ມງວດ ເປັນຕົ້ນແມ່ນງານສົ່ງສະການ ແລະ  ອື່ນໆ.

ໃນທົ່ວປະເທດ ມີບ້ານແດງທັງໝົດ 257 ບ້ານ ໃນທີ່ນອນຢູ່ໃນ 39 ເມືອງ ແລະ 10 ແຂວງ (ນະຄອນຫຼວງວຽງຈັນ, ຈຳປາສັກ, ຄຳມ່ວນ, ສາລະວັນ, ສະຫວັນນະເຂດ, ບໍ່ແກ້ວ, ຊຽງຂວາງ, ໄຊສົມບູນ, ວຽງຈັນ ແລະ ຫຼວງພະບາງ). ສະເພາະ ນະຄອນຫຼວງ ມີ 107 ບ້ານ ທີ່ເປັນບ້ານເຂດແດງ ນອນຢູ່ໃນ 8 ຕົວເມືອງ.

ເມື່ອຕີລາຄາສະພາບການລະບາດ, ມາຮອດວັນທີ 29 ກັນຍາ 2021 ເຫັນວ່າ ຈຳນວນຄົນເຈັບຕິດເຊື້ອ ເພີ່ມຂື້ນ ທຽບໃສ່ໄລຍະການຈັດຕັ້ງປະຕິບັດມາດຕະການຜ່ານມາ, ການຕິດເຊື້ອຈາກກໍລະນີນຳເຂົ້າ ແມ່ນຫຼຸດລົງ, ສ່ວນການຕິດເຊື້ອໃນຊຸມຊົນ ແມ່ນເພີ່ມຂຶ້ນຢ່າງຕໍ່ເນື່ອງ ຢູ່ຫຼາຍແຂວງ, ເພີ່ມຂຶ້ນເ​ຖິງ 48.06% ໂດຍສະເພາະ ຢູ່ນະຄອນຫຼວງວຽງຈັນ ພົບການຕິດເຊື້ອເພີ່ມຂຶ້ນ ໂດຍເລີ່ມຈາກໂຮງງານຕັດຫຍິບ 2 ແຫ່ງ ແລ້ວຂະຫຍາຍສູ່ຫຼາຍໂຮງງານ ແລະ ຊຸມຊົນ ພາຍໃນ 1 ອາທິດ ມີຜູ້ຕິດເຊື້ອຫຼາຍກ່ວາ 1.000 ຄົນ.

          ຕໍ່​ສະ​ພາບ​ການ​ລະ​ບາດ​ດັ່ງ​ກ່າວ, ຄະ​ນະ​ສະ​ເພາະ​ກິດໄດ້​ດຳ​ເນີນ​ມາດ​ຕະ​ການດັ່ງ​ນີ້:

  1. ສຳ​ລັບບັນດາແຂວງ ໄດ້ເອົາໃຈໃສ່ໃນການເພີ່ມທະວີຍົກລະດັບມາດຕະການເພື່ອສະກັດກັ້ນ ແລະ ແກ້ໄຂການລະບາດ ໂດຍໄດ້ປະກາດໃຊ້ບັນດາມາດຕະການ ເປັນ​ຕົ້ນ ໄດ້ຈໍາກັດການເດີນທາງພາຍໃນແຂວງ ແລະ ລະຫວ່າງແຂວງ (ຫ້າມຄົນທີ່ມາຈາກເຂດລະບາດເດີນທາງເຂົ້າແຂວງ ແລະ ຈຳກັດບໍລິເວນ 14 ວັນ); ຫ້າມບໍ່ໃຫ້ອອກເຮືອນ, ຫ້າມການເດີນທາງພາຍໃນແຂວງ ແລະ ລະຫວ່າງແຂວງ, ລະຫວ່າງເມືອງ, ບ້ານ ລວມທັງຜູ້ທີ່ໄດ້ຮັບວັກຊີນຄົບໂດສ ຍົກເວັ້ນການເດີນທາງທີ່ຈໍາເປັນເພື່ອໂຕ້ຕອບຕໍ່ການລະບາດຂອງພະຍາດ COVID-19; ໂຈະການຮຽນ-ການສອນ; ບັນດາສຳນັກງານ, ອົງການ ຂອງພາກລັດ ແລະ ເອກະຊົນ ຕ້ອງພິຈາລະນາສັບປ່ຽນກັນມາປະຈຳການ ແລະ ປະຕິບັດມາດຕະການຢ່າງເຄັ່ງຄັດ ເພື່ອຫຼຸດຜ່ອນຈຳນວນພະນັກງານມາປະຈຳການ.
  2. ເລັ່ງຊອກຫາຜູ້ຕິດເຊື້ອ ແລະ ຜູ້ສຳຜັດໃກ້ຊິດ; ໄດ້ເລັ່ງກວດຫາເຊື້ອ, ເພີ່ມຈຸດເກັບຕົວຢ່າງ ແລະ ກວດວິເຄາະຄົ້ນຫາກໍລະນີຜູ້ຕິດເຊື້ອ, ໄດ້ສະໜອງນ້ຳຢາກວດວິເຄາະ ແລະ ອຸປະກອນການແພດ ໃຫ້ບັນດາແຂວງ ຢ່າງພຽງພໍ; ເພີ່ມສູນປິ່ນປົວ ແລະ ສູນຈຳກັດບໍລິເວນໃນນະຄອນຫຼວງວຽງຈັນ ເພື່ອຮອງຮັບຜູ້ຕິດເຊື້ອ ແລະ ຜູ້ສຳຜັດໃກ້ຊິດ ໃຫ້ພຽງພໍ, ສຳລັບຜູ້ສຳຜັດໃກ້ຊິດ C1 ໃນໂຮງງານແມ່ນຈຳນວນໜື່ງໄປຈຳກັດບໍລິເວນຢູ່ສູນດົງໂດກ, ຫໍພັກໃນໂຮງງານ  ແລະ ໂຮງຮຽນປະຖົມໃນແຕ່ລະບ້ານຕ່າງໆ. ປັດຈຸບັນ, ທົ່ວປະເທດມີ ສູນຈຳກັດບໍລິເວນຢູ່  192 ສູນ ແລະ 106 ໂຮງແຮມ ແລະ ກຳລັງເປີດນຳໃຊ້ 106 ສູນ ແລະ 55 ໂຮງແຮມ, ຍັງມີໜ້າຢູ່ສູນທັງ​ໝົດ 5.404 ຄົນ, ສາມາດຮອງຮັບໄດ້ຕື່ມອີກ 11.486 ຄົນ ແລະ ຍັງຈຳກັດບໍລິເວນຢູ່ໂຮງແຮມ 2.074 ຄົນ, ສາມາດຮອງຮັບໄດ້ຕື່ມອີກ 7.530 ຄົນ.

                 ສຳລັບ​ສະ​ຖານ​ທີ່​ປິ່ນ​ປົວ ມີ​ໂຮງ​ໝໍ​ສູນ​ກາງ, ແຂວງ, ຊຸມ​ຊົນ ແລະ ໂຮງ​ໝໍ​ພາກ​ສະ​ໜາມ ລວມ​ທັງ​ໝົດ 52 ແຫ່ງ, ມີຕຽງຮອງຮັບທັງໝົດ ທົ່ວປະເທດມີ 9.925 ຕຽງ ໃນນັ້ນ ຢູ່ສູນກາງ 1.142 ຕຽງ ແລະ ຕ່າງແຂວງ 8.783 ຕຽງ. ນອກນັ້ນ. ຢູ່ສູນກາງ ໄດ້ເປີດສູນດົງໂດກ ເປັນໂຮງໝໍພາກສະໜາມ ມີ800 ຕຽງ ປະຈຸບັນເອົາຄົນເຈັບເຂົ້າແລ້ວ 250 ຄົນ, ໂຮງຮຽນ ມໍຕົ້ນ ສີເກີດ ຮອງຮັບໄດ້ 150 ຕຽງ, ເອົາຫໍພັກຂອງໂຮງງານ Trio ເປັນບ່ອນກັກກັນ 250 ຄົນ ແລະ ບ່ອນຮັບຄົນເຈັບ 450 ຄົນ. ນອກນັ້ນຍັງໄດ້ກະກຽມສະ​ໜາມກິລາຫຼັກ 16 ສໍາຮອງໄວ້ ເປັນໂຮງໝໍພາກສະ​ໜາມຮອງຮັບໄດ້ 360 ຕຽງ ແລະ ຕຶກດາວເຮືອງ ຮອງຮັບໄດ້ 600 ຕຽງ. ຕາມການປະເມີນຕົວເລກຄວາມຕ້ອງຕຽງໃນນະຄອນຫຼວງວຽງຈັນ ທັງໝົດ 2.000 ຕຽງ ມີແລ້ວໃນປັດຈຸບັນ 1594 ຕຽງ ຕ້ອງການຈັດຫາສະຖານທີ່ເພີ່ມອີກ ໃຫ້ໄດ້ 406 ຕຽງ ເພື່ອພຽງພໍໃນການຮອງຮັບຄົນເຈັບ.

  • ໄດ້​ກະ​ກຽມ​ທີມ​ແພດ​ຈາກ​ສູນ​ກາງ,  ພ້ອມ​ທັງທີມ​ສະ​ໜັບ​ສະ​ໜູນ ໂດຍ​ມີ​ການ​ຝຶກ​ອົບ​ຮົມ​ກ່ອນ​ເຂົ້າ​ປະ​ຈຳ​ການ. ພ້ອມນີ້ ໄດ້ສົ່ງທີມແພດ ໄປຊ່ວຍແຂວງຄຳມ່ວນ ຢູ່ເມືອງງອຍແຂວງຫຼວງພະບາງ.
  • ໄດ້ລົງປະເມີນໂຮງງານໃນນະຄອນຫຼວງວຽງຈັນ ເພື່ອຮັບປະກັນວ່າໂຮງງານມີມາດຕະການໃນການປ້ອງກັນ ແລະ ຕອບໂຕ້ການລະບາດໃນໂຮງງານ.
  • ໄດ້ເລັ່ງ​ການ​ຈັດ​ຫາ​​ວັກ​ຊີນປ້ອງກັນ COVID-19​ ແລະ ຈັດ​ຕັ້ງ​ສັກ​ວັກ​ຊີນ​ດັ່ງ​ກ່າວ ໃຫ້​ປະ​ຊາ​ຊົນ, ເພີ່ມຈຸດໃຫ້ວັກຊີນ ແລະ ທີມສັກວັກຊີນເຄື່ອນທີ່, ​ຮອດ​ທີ 25 ກັນຍາ 2021 ໄດ້ຮັບທັງໝົດ 5.576.490 ໂດສ ແລະ ໄດ້ແຈກຢາຍໃຫ້ທຸກແຂວງ ເປັນທີ່ຮຽບຮ້ອຍແລ້ວ ໂດຍສະເພາະບັນດາແຂວງພາກໃຕ້; ທົ່ວປະເທດ ສັກເຂັມທີ 1 ໄດ້ 2.940.677 ໂດສ ກວມ 40.08% ແລະ ສັກ​ຄົບໂດສ 2.023.326 ໂດສ ກວມ 27,57 %.  ໃນອາທິດຜ່ານມາ ກໍໄດ້ຮັບວັກຊີນ ຈາກສະຫະພາບ ລັດເຊັຍ ຕື່ມຈຳນວນ 30.000ໂດສ ຊຶ່ງແມ່ນ Sputnik light ແບບສັກເຂັມດຽວ ແລະ ມື້ວານນີ້ ໄດ້ຮັບວັກຊີນ Sinovac ຈາກ ກຳປູເຈຍ 200.000 ໂດສ.
  • ການຄົ້ນຫາຜູ້ສຳຜັດໃກ້ຊິດໃນຜູ້ຕິດເຊື້ອໃນໂຮງງານ ຍັງພົບຄວາມຫຍຸ້ງຍາກ ເນື່ອງຈາກກຳມະກອນຈຳນວນຫຼາຍ ອາໃສຢູ່ເຮືອນຂອງຕົນເອງ ດັ່ງນັ້ນຈຶ່ງມີການແຜ່ເຊື້ອໃສ່ຄົນໃນຄອບຄົວ.
  • ຍັງມີພະນັກງານວິຊາການຈຳນວນໜຶ່ງ ໄປເຮັດວຽກຢູ່ຫຼາຍໂຮງງານ ຈຶ່ງເປັນສາເຫດໃຫ້ມີການຕິດເຊື້ອຈາກໂຮງງານໜຶ່ງສູ່ໂຮງງານອື່ນ.
  • ການຕິດເຊື້ອໃນບາງພື້ນທີ່ ບໍ່ຮູ້ທີ່ມາຂອງການຕິດເຊື້ອ.
  • ສະຖານທີ່ປີ່ນປົວ ແລະ ໂຮງໝໍພາກສະໜາມ ຫຼາຍແຫ່ງ ເລີ່ມເຕັມ ແລະ ຈຳເປັນຕ້ອງໄດ້ຊອກສະຖານທີ່ປີ່ນປົວເພື່ອຮອງຮັບເພີ່ມເຕີມ ແລະ ບຸກຄະລາກອນແພດມີຈໍາກັດ.
  • ສະຖານທີ່ຈຳ​ກັດ​ບໍ​ລິ​ເວນ ຢູ່ບາງແຂວງ ບໍ່​ທັນ​ໄດ້​ມາດ​ຕະ​ຖານ ແລະ ບໍ່​ພ​ຽງ​ພໍ.
  • ບຸກຄະລາກອນແພດ, ກວດວິເຄາະ, ຊ່ຽວຊານ, ເຈົ້າໜ້າທີ່ດ່ານໜ້າແມ່ນບໍ່ໄດ້ພັກເຊົາເປັນເວລາຍາວນານ ເຮັດໃຫ້ເມື່ອຍລ້າ ແລະ ມີຄວາມສ່ຽງໃນການຕິດເຊື້ອ.
  • ການຈັດຫານ້ຳຢາກວດວິເຄາະໃນປັດຈຸບັນແມ່ນພຽງພໍ, ແຕ່ຖ້າການລະບາດຫາກແກ່ຍາວ ແລະ ຈຳນວນຜູ້ສຳຜັດໃກ້ຊິດຜູ້ຕິດເຊື້ອ ຍັງຫຼາຍຄືປະຈຸບັນຈະຕ້ອງໄດ້ໃຊ້ເພີ່ມຂື້ນນ້ຳຢາກວດຫາເຊຶ້ອ .
  • ປະຊາຊົນໃນບາງແຂວງຍັງຄົງລັງເລໃນການໄປຮັບວັກຊີນ ຈຶ່ງເຮັດໃຫ້ອັດຕາປົກຄຸມວັກຊີນຕ່ຳໃນບາງແຂວງ.

ຕອນທ້າຍເຫັນວ່າໃນທົ່ວປະເທດແມ່ນຈັດຢູ່ໃນລະດັບ 2 ຍົກເວັ້ນແຂວງຄຳມ່ວນ, ຈຳປາສັກ ແລະ ນະຄອນຫຼວງວຽງຈັນ ທີ່ຈັດຢູ່ໃນລະດັບ 3 ທີ່ມີການແຜ່ລະບາດເປັນວົງ ກວ້າງໃນຊຸມຊົນ. ປະຈຸບັນມີການລະບາດໃນຊຸມຊົນ ໃນຫຼາຍເມືອງຂອງແຂວງຫຼວງພະບາງ, ຊຽງຂວາງ, ໄຊສົມບູນ ແລະ ວຽງຈັນ. ສ່ວນແຂວງອື່ນໆ ການລະບາດ ມີທ່າອ່ຽງຫຼຸດລົງ ແລະ ສາມາດຄວບຄຸມໄດ້ ໂດຍພື້ນຖານ. ສະນັ້ນ, ຈຶ່ງມີຄວາມຈຳເປັນຕ້ອງໄດ້ເພີ່ມຄວາມເຂັ້ມງວດ ແລະ ສືບຕໍ່ປະຕິບັດບັນດາມາດຕະການຜ່ານມາ ຊຶ່ງໂດຍລວມແມ່ນສືບຕໍ່ປະຕິບັດແຈ້ງການ 1094/ຫສນຍ ແລະ 1177/ຫສນຍ ແຕ່ເພີ່ມບາງມາດຕະການດັ່ງນີ້:

  1. ປິດບັນດາໂຮງງານອຸດສາຫະກຳ ແລະ ບັນດາວິສາຫະກິດ ຢູ່ເຂດທີ່ມີການລະບາດພາຍໃນໂຮງງານ ແລະໃນຊຸມຊົນ. ຍົກເວັ້ນ ໂຮງງານທີ່ໄດ້ຮັບອະນຸຍາດ ຈາກຄະນະສະເພາະກິດ, ໂຮງງານທີ່ຜະລິດສິນຄ້າບໍລິໂພກ, ຢາປົວພະຍາດ, ແລະ ອຸປະກອນການແພດ, ແຕ່ໃຫ້ມີການຄຸ້ມຄອງຮັບປະກັນຕາມມາດຕະການທີ່ຄະນະສະເພາະກິດ ວາງອອກຢ່າງເຂັ້ມງວດ. ໂຮງງານໃດ ບໍ່ໃຫ້ການຮ່ວມມື ແລະ ບໍ່ປະຕິບັດຕົວຈິງ ຕໍ່ມາດຕະການປ້ອງກັນ, ຄວບຄຸມ ແລະ ແກ້ໄຂສະພາບການລະບາດ ຂອງ COVID-19 ຕ້ອງໂຈະຊົ່ວຄາວ ຈຶ່ງຈະພິຈາລະນາໃຫ້ເປີດຄືນ.
  2. ປິດການສັນຈອນຂອງພາຫະນະ ຢູ່ນະຄອນຫຼວງ ແລະ ບັນດາແຂວງທີ່ມີການລະບາດໃນຊຸມຊົນ ຕັ້ງແຕ່ເວລາ 21:00 ໂມງ – 05:00 ໂມງເຊົ້າ.
  3. ໃຫ້ບັນດາກະຊວງ, ອົງການທຽບເທົ່າ, ວິສາຫະກິດ ທີ່ໄດ້ຮັບອະນຸຍາດ ຢູ່ນະຄອນຫຼວງວຽງຈັນ ແລະ ບັນດາແຂວງ ທີ່ມີການລະບາດໃນຊຸມຊົນ ໃຫ້ພະນັກງານ ແລະ ລັດຖະກອນ ຜັດປ່ຽນກັນມາປະຈຳການ ຫຼື ເຮັດວຽກຢູ່ເຮືອນ ຜ່ານລະບົບເອເລັກໂຕຣນິກ, ສຳລັບຜູ້ທີ່ມີຄວາມສ່ຽງ ແລະ ຜູ້ຍິງຖືພາ ທີ່ບໍ່ສາມາດສັກວັກຊີນໄດ້ ແມ່ນໃຫ້ເຮັດວຽກຢູ່ເຮືອນ.
  4. ອະນຸຍາດໃຫ້ເປີດໂຮງຈັກໂຮງງານ ແລະ ວິສາຫະກິດ ຢູ່ໃນເຂດທີ່ບໍ່ມີການລະບາດໃນຊຸມຊົນ ເພື່ອດຳເນີນກິດຈະການໄດ້ ໂດຍພະນັກງານ, ກໍາມະກອນ ຕ້ອງໄດ້ ຮັບວັກຊີນຄົບກ່ອນ ແລະ ບໍ່ໄດ້ພັກພາອາໄສຢູ່ພື້ນທີ່ທີ່ມີການລະບາດໃນຊຸມຊົນ (ເຂດແດງ). ສຳລັບໂຮງງານໃດ ທີ່ມີເງື່ອນໄຂ ກໍໃຫ້ຈັດທີ່ພັກອາໄສກັບທີ່ໃຫ້ແຮງງານຂອງຕົນ ເພື່ອຫຼຸດຜ່ອນຄວາມສ່ຽງໃນການຕິດເຊື້ອ.
  5. ສືບຕໍ່ອະນຸຍາດໃຫ້ເປີດຮ້ານນວດ, ຮ້ານເສີມສວຍ, ເສີມຄວາມງາມ, ຮ້ານຕັດຜົມ ຢູ່ແຂວງທີ່ບໍ່ມີການລະບາດໃນຊຸມຊົນ.