ມີເດຍລາວແຂວງສາລະວັນ ແຂວງສາລະວັນ ເຂົ້າຮ່ວມກອງປະຊຸມຕີລາຄາການຈັດຕັ້ງປະຕິບັດມາດຕະການປ້ອງກັນ, ສະກັດກັ້ນ, ຄວບຄຸມ, ແລະແກ້ໄຂການລະບາດພະຍາດໂຄວິດ-19 ຮ່ວມກັບຄະນະສະເພາະກິດຂັ້ນສູນກາງ, ໂດຍຜ່ານລະບົບວີດີໂອຄອນຟີເລັນ ( video conference) ຈັດຂື້ນໃນວັນທີ 29 ກັນຍາ 2021 ທີ່ຫ້ອງວ່າການສໍານັກງານນາຍົກລັດຖະມົນຕີ, ໂດຍການເປັນປະທານຂອງທ່ານ ສຈ.ປອ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ມີຄະນະສະເພາະກິດຂັ້ນສູນກາງ, ບັນດາແຂວງໃນທົ່ວປະເທດ ເຂົ້າຮ່ວມ. ແຂວງສາລະວັນ ຈັດຂື້ນຢູ່ທີ່ສະໂມສອນຂອງແຂວງ, ເຂົ້າຮ່ວມໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ແຂວງ ພ້ອມດ້ວຍຄະນະ.

ກອງປະຊຸມຄັ້ງນີ້ ໄດ້ຕີລາຄາການຈັດຕັ້ງປະຕິບັດ ໃນໄລຍະຜ່ານມາ ໃນການແກ້ໄຂ ແລະ ສະກັດກັ້ນພະຍາດດັ່ງກ່າວບໍ່ໃຫ້ແຜ່ລາຍອອກສູ່ວົງກວ້າງ ໂດຍສະເພາະໃນຊຸມຊົນ, ຕີລາຄາຜົນໄດ້ຮັບໃນການປະຕິບັດມາດຕະການປິດການເຂົ້າ-ອອກ ແຂວງ, ເມືອງ ແລະ ການນຳກົດເຂດບ້ານຕ່າງໆ, ການສຸມໃສ່ປີ່ນປົວຜູ້ຕິດເຊື້ອ ຕະຫຼອດຮອດການສັກວັກຊິນໃຫ້ປະຊາກອນໃນຂອບເຂດທົ່ວປະເທດ ເພື່ອສ້າງພູມຄຸ້ມກັນ. ນອກນັ້ນຍັງໄດ້ປະເມີນບັນດາແຂວງ ທີ່ມີການລະບາດໃນຊຸມຊົນ, ພ້ອມທັງທົບທວນຄືນ, ການເຂັ້ມງວດໃນການຈັດຕັ້ງປະຕິບັດມາດຕະການຕ່າງໆ, ການຕອບໂຕ້ ແລະ ຮັບມືໃນແຕ່ລະໄລຍະ ເປັນຕົ້ນ: ແມ່ນບັນດາກິດຈະກຳຕ່າງໆ ທີ່ອາດຈະເຮັດໃຫ້ເກີດການລະບາດໃນຊຸມຊົນ. ມາຮອດປັດຈຸບັນ ການຕິດເຊື້ອຈາກກໍລະນີນຳເຂົ້າ ໃນທົ່ວປະເທດ ແມ່ນມີທ່າອ່ຽງຫຼຸດລົງ, ແຕ່ການຕິດເຊື້ອໃນຊຸມຊົນ ເພີ່ມຂຶ້ນ ແລະ ຍັງໄດ້ນຳໃຊ້ສູນຈຳກັດບໍລິເວນ 192 ສູນ.

ແຂວງສາລະວັນ ພົບຜູ້ຕິດເຊື້ອຈາກກໍລະນີນຳເຂົ້າ ເລີ່ມຫຼຸດລົງ ແລະ ຍັງມີທ່າອ່ຽງການຕິດເຊື້ອໃນຊຸມຊົນ, ເຊີ່ງມາຮອດປັດຈຸບັນ ມີຜູ້ຕິດເຊື້ອສະສົມທັງໝົດ 1,596 ຄົນ, ປິ່ນປົວຫາຍດີສະສົມ 1,424 ຄົນເສຍຊີວິດ 1 ຄົນ ແລະ ໄດ້ນຳໃຊ້ສູນຈຳກັດບໍລິເວນ 36 ສູນ, ຂັ້ນແຂວງມີ 4 ສູນໃຫຍ່, ຂັ້ນເມືອງມີ 32 ສູນ ແລະ ໄດ້ເລັ່ງສັກຢາວັກຊິນໃຫ້ກຸ່ມເປົ້າໝາຍ ເປັນຕົ້ນ: ສັກວັກຊິນ ຊີໂນຟຣາມ ເຂັມທີ 1 ປະຕິບັດ ໄດ້ 67,634 ໂດສ, ເຂັມທີ 2 ຈຳນວນ 36,814 ໂດສ, ວັກຊິນຈອນສັນ ແອນ ຈອນສັນ ປະຕິບັດໄດ້ 56,956 ໂດສ, ແລະ ສັກຢາວັກຊິນແອສຕາເຊເນກາ ຈໍານວນ 35,086 ໂດສ. ນອກຈາກນັ້ນ ກໍ່ໄດ້ເຂັ້ມງວດປະຕິບັດມາດຕະການຂອງຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ຂັ້ນສູນກາງ ວາງອອກ ແລະ ຜັນຂະຫຍາຍ ປະຕິບັດຢູ່ພາຍໃນທ້ອງຖີ່ນ ຢ່າງເຂັ້ມງວດ.

ໂດຍ: ກິນດາວັນ ອ້ວນນາຄູ