ມີເດຍລາວແຂວງເຊກອງ ວັນທີ 30 ກັນຍາ 2021 ພຣະອາຈານ ກໍລະກັນ ເຊື້ອໂຊດ ຄະນະບໍລິຫານງານປະຈໍາການ, ຫົວໜ້າກໍາມາທິການສາທາລະນຸປະການ ອພສ ເມືອງລະມາມ ໄດ້ມອບຊຸດກິລາ, ບານເຕະ, ກະຕໍ້, ນໍ້າດື່ມ ແລະຜ້າອັດປາກ-ອັດດັງ ເພື່ອປ້ອງກັນໂຄວິດ-19 ລວມມູນຄ່າທັງໝົດ 2,2 ລ້ານກີບ ໃຫ້ໂຮງຮຽນມັດທະຍົມຕອນຕົ້ນບ້ານເຊນ້ອຍ ເມືອງລະມາມ ເຊິ່ງກ່າວຮັບໂດຍທ່ານ ອຸດອນ ແກ້ວປັນຍາ ຜູ້ອໍານວຍການໂຮງຮຽນ ມຕ ບ້ານເຊນ້ອຍ, ມີທ່ານ ແສງເພັດ ບົວລະພາ ເລຂາໜ່ວຍພັກ, ນາຍບ້ານເຊນ້ອຍ, ທ່ານ ຄໍາຊ່ອງ ຄໍາຊາຢືນ ເລຂາໜ່ວຍພັກ, ນາຍບ້ານດ່ານ ພ້ອມດ້ວຍຄູ-ອາຈານ, ນ້ອງນ້ອຍນັກຮຽນ ແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ອຸດອນ ແກ້ວປັນຍາ ແລະທ່ານ ແສງເພັດ ບົວລະພາ ໄດ້ກ່າວສະແດງຄວາມຮູ້ບຸນຄຸນ ແລະຂອບໃຈມາຍັງພຣະອາຈານ ກໍລະກັນ ເຊື້ອໂຊດ ກໍຄືອົງການປົກຄອງບ້ານດ່ານ, ອົງການຈັດຕັ້ງພັກ-ລັດ, ບໍລິສັດລັດວິສາຫະກິດ ແລະປະຊາຊົນບັນດາເຜົ່າທີ່ໄດ້ອຸປະຖໍາຄໍ້າຊູໃຫ້ການຊຸກຍູ້ຊ່ວຍເຫຼືອແກ່ໂຮງຮຽນບ້ານຂອງພວກຂ້າພະເຈົ້າ ເຊິ່ງເປັນການປະກອບສ່ນຊຸກຍູ້ເຂົ້າໃນການພັດທະນາວຽກງານສຶກສາທິການ ແລະກິລາເວົ້າລວມ, ເວົ້າສະເພາະກໍ່ແມ່ນວຽກງານກິລາ ເພື່ອເດັກນ້ອຍຫັນມາຫຼິ້ນກິລາຫ່າງໄກຢາເສບຕິດ; ຄະນະພັກ-ອົງການປົກຄອງບ້ານ ແລະຄະນະອໍານວຍການໂຮງຮຽນຈະປົກປັກຮັກສາ ແລະນໍາໃຊ້ເຄື່ອງດັ່ງກ່າວ ໃຫ້ເກີດປະໂຫຍດສູງສຸດເຂົ້າໃນວຽກງານອັນລວມ ແລະເຊື່ອໝັ້ນວ່າ ໃນຕໍ່ໜ້າໂຮງຮຽນຂອງພວກຂ້າພະເຈົ້າຈະໄດ້ຮັບການອຸປະຖໍາຊ່ວຍເຫຼືອນໍາບັນດາທ່ານຕື່ມອີກ.

ໃນຂະນະດຽວກັນ ທ່ານ ນາງ ເພັດສະຫວັນ ໄຊຍະສິດ ເຈົ້າຂອງແຫຼ່ງທ່ອງທ່ຽວຕາດຫົວຄົນ ກໍໄດ້ມອບເງິນສົດ ຈໍານວນ 5 ແສນກີບໃຫ້ໂຮງຮຽນ ມຕ ເຊນ້ອຍຕື່ມອີກ.

(ຂ່າວ-ພາບ: ສັນຍາ)