ມີເດຍລາວແຂວງເຊກອງ ໃນວັນທີ 29 ກັນຍາຜ່ານມາ ພະແນກແຜນການ ແລະການລົງທຶນແຂວງເຊກອງ, ໄດ້ຈັດກອງປະຊຸມເຜີຍແຜ່ເຊື່ອມຊຶມບັນດາເອກະສານສຳຄັນຕ່າງໆຂອງພັກ-ລັດຂຶ້ນ ໂດຍການເປັນປະທານຂອງທ່ານ ສາກົນ ພອນປະເສີດ ກຳມະການພັກແຂວງ, ຫົວໜ້າພະແນກແຜນການ ແລະການລົງທຶນແຂວງ, ມີຄະນະພັກ, ຮອງຫົວໜ້າພະແນກ ແລະພະນັກງານ-ລັດຖະກອນເຂົ້າຮ່ວມ.

ໂດຍເອກະສານທີ່ນຳມາເຜີຍແຜ່ຄັ້ງນີ້ ປະກອບມີມະຕິກອງປະຊຸມຄົບຄະນະສະໄໝວິສາມັນຂອງຄະນະບໍລິຫານງານສູນກາງພັກສະໄໝທີ XI ຕິດພັນກັບຄຳສັງວ່າດ້ວຍການເພີ່ມທະວີການນຳພາ-ຊີ້ນຳຂອງຄະນະພັກແຕ່ລະຂັ້ນໃນການຈັດຕັ້ງປະຕິບັດມາດຕະການແກ້ໄຂຄວາມທຸກຍາກດ້ານເສດຖະກິດ-ການເງິນ, ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດ, ມະຕິກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ IV ສະໄໝທີ X, ມະຕິວ່າດ້ຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່, ມະຕິວ່າດ້ວຍການເພີ່ມທະວີການນຳພາຂອງພັກຕໍ່ວຽກງານວັດທະນະທຳໃນໄລຍະໃໝ່, ຄຳສັງວ່າດ້ວຍການເພີ່ມທະວີການນຳພາ-ຊີ້ນຳຂອງຄະນະພັກ ແຕ່ລະຂັ້ນ ຕໍ່ການສະກັດກັ້ນ ແລະແກ້ໄຂບັນຫາຢາເສບຕິດ, ສັນຍາການຮ່ວມມືທະວີພາຄີ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ສສ ຫວຽດນາມ ໄລຍະປີ 2021-2025 ແລະຂໍ້ຕົກລົງ ວ່າດ້ວຍຍຸດທະສານການຮ່ວມມື ລະຫວ່າງລັດຖະບານແຫ່ງ ສປປ ລາວ ແລະລັດຖະບານ ສສ ຫວຽດນາມ ໄລຍະປີ 2021-2030.

ທ່ານ ສາກົນ ພອນປະເສີດ ກ່າວວ່າ: ຈຸດປະສົງກອງປະຊຸມຄັ້ງນີ້ ກໍເພື່ອເປັນການສຶກສາອົບຮົມການເມືອງ-ນຳພາແນວຄິດ ແນໃສ່ເຮັດໃຫ້ພະນັກງານ-ສະມາຊິກພັກພາຍໃນຂະແໜງແຜນການ ແລະການລົງທຶນແຂວງ ຮັບຮູ້, ເຂົ້າໃຈ ແລະ ກຳໄດ້ເນື້ອໃນຈິດໃຈມະຕິ, ຄຳສັ່ງຕ່າງໆ ແນໃສ່ສ້າງການຫັນປ່ຽນຢ່າງແຂງແຮງ, ຮອບດ້ານ ເຮັດໃຫ້ການປະຕິບັດມະຕິ XI ຂອງສູນກາງພັກ, ມະຕິ X ຂອງອົງຄະນະພັກແຂວງ ກໍຄືການປະຕິບັດ 2 ວາລະແຫ່ງຊາດຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດ ໄດ້ຮັບຜົນສຳເລັດຕາມຄາດໝາຍແຜນການວາງໄວ້. ຂ່າວ: ບູ້ສຸວັນ.