ມີເດຍລາວແຂວງຫຼວງພະບາງ ຕອນບ່າຍຂອງວັນທີ 29 ກັນຍາ 2021 ນີ້ ສະຫາຍ ພັນເອກ ຄໍາບົງ ໄຊຍະວົງສາ ຫົວໜ້າຫ້ອງເຕັກນິກທະຫານແຂວງຫຼວງພະບາງ ພ້ອມດ້ວຍຄະນະ ໄດ້ຕາງໜ້າກອງບັນຊາການທະຫານແຂວງ ນໍາເອົາເຄື່ອງບໍລິໂພກ ໄປມອບໃຫ້ອົງການກາແດງແຂວງຫຼວງພະບາງ, ເພື່ອຊຸກຍູ້ວຽກງານປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19,

ສະຫາຍ ພັນເອກ ຄໍາບົງ ໄຊຍະວົງສາ ກ່າວວ່າ: ຍ້ອນເຫັນໄດ້ສະພາບແວດລ້ອມການແຜ່ລະບາດຂອງພະຍາດໂຄວິດ 19 ຢູ່ແຂວງຫຼວງພະບາງ ພວມຢູ່ໃນພາວະການແຜ່ລະບາດເປັນບໍລິເວນກ້ວາງ ເຊິ່ງສົ່ງຜົນກະທົບໂດຍກົງຕໍ່ເສດຖະກິດຄອບຄົວ ຂອງປະຊາຊົນບັນດາເຜົ່າ ແລະສູນກັກກັນຫຼາຍແຫ່ງພົບກັບຄວາມຫຍຸ້ງຍາກຂາດເຂີນທາງດ້ານສະບຽງອາຫານ ເປັນຕົ້ນແມ່ນນໍ້າດື່ມ, ເຂົ້າສານ ແລະ ອາຫານປະຈໍາວັນ. ດັ່ງນັ້ນ: ຄະນະພັກກອງບັນຊາການທະຫານແຂວງຫຼວງພະບາງ ຈິ່ງໄດ້ນໍາເອົາເຄື່ອງບໍລິໂພກ ເຊັ່ນ: ນໍ້າດຶ່ມ 100 ແກັດ,ປ໋ອງປາ 2 ແກັດ ແລະ ໝີ່ສໍາເລັດຮູບ 2 ແກັດ,ລວມມູນຄ່າ 3.900.000 ກີບ, ເພື່ອມອບໃຫ້ອົງການກາແດງແຂວງຫຼວງພະບາງ ເຊິ່ງເປັນອົງການຊ່ວຍເຫຼືອສັງຄົມ ນໍາໄປແຈກຍາຍ ໃຫ້ຂົງເຂດທີ່ໄດ້ຮັບຜົນກະທົບ ໂດຍສະເພາະວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ 19. ເພື່ອບັນເທົາທຸກໃນເບື້ອງຕົ້ນ.

ໂອກາດນີ້ ທ່ານ ບຸນນາກ ເພັດສຸພັນ ຮອງຫົວໜ້າອົງການກາແດງແຂວຫຼວງພະບາງ ກໍໄດ້ສະແດງຄວາມຂອບໃຈ ພ້ອມທັງມອບໃບສໍາມະນາຄຸນ ໃຫ້ກອງບັນຊາການທະຫານແຂວງຫຼວງພະ ແລະຈະນໍາເອົາເຄື່ອງຈໍານວນດັ່ງກ່າວໄປບໍລິການແຈກຢ່າຍໃຫ້ຜົນເກີດປະໂຫຍດສູງສຸດແກ່ສ່ວນລວມ.
ໂດຍ: ສົມພອນ ສຸວັນທອນ.