ມີເດຍລາວແຂວງຫຼວງພະບາງ ວັນທີ 28 ກັນຍາ 2021 ທີ່ຜ່ານມາ ທ່ານ ວຽງຄອນ ຈະເລີນໄຊ ຫົວໜ້າຫ້ອງການສາທາລະນະສຸກເມືອງໂພນທອງ ແຂວງຫຼວງພະບາງ ຕາງໜ້າຄະນະສະເພາະກິດ ປ້ອງກັນ ແລະ ຄອບຄຸມພະຍາດໂຄວິດ-19 ຂັ້ນເມືອງພ້ອມດ້ວຍຄະນະ ໄດ້ລົງເຄື່ອນໄຫວ ຕິດຕາມ ແລະ ຊຸກຍູ້ ການປ້ອງກັນ ການແຜ່ລະບາດຂອງພະຍາດໂຄວິດ 19 ຢູ່ທີີ່ສູນກັກກັນ ໂຮງໝໍຊຸມຊົນ ແລະ ສູນກັກກັນບ້ານວັງແນກ ,ເຊິ່ງມີຜູ້ກັກກັນທັງໝົດ 17 ຄົນ,ໃນນີ້ແມ່ນແຮງງານລາວທີ່ກັບມາພູມລຳເນົາ ແລະ ມາກັກກັນໂຕເພື່ອຕິດຕາມອາການໃຫ້ຄົບຕາມກຳນົດ 14 ວັນຕາມລະບຽບຂອງຄະນະສະເພາະກິດວາງອອກ.

ໂອກາດການລົງເຄືອນໄຫວມາຕິດຕາມຄັ້ງນີ້ ທ່ານ ວຽງຄອນ ຈະເລີນໄຊ ກໍ່ໄດ້ອະທິບາຍກ່ຽວກັບ ການຈັດຕັ້ງປະຕິບັດ, ມາດຕະການຕ່າງໆ ໃນການປ້ອງກັນການແຜ່ລະບາດຂອງພະຍາດໂຄວິດ 19 ແລະສະພາບການການແພ່ລະບາດຂອງພະຍາດດັ່ງກ່າວໃຫ້ແກ່ຜູ້ທີ່ຖືກກັກກັນພາຍໃນສູນກັກກັນ ທັງ 2 ຈຸດ. ພ້ອມກັນນີ້ ຍັງໄດ້ເນັ້ນໃຫ້ບັນດາຜູ້ທີ່ຖືກກັກກັນເອົາໃຈໃສ່ປະຕິບັດຕາມລະບຽບຂອງຄະນະສະເພາະກິດວາງອອກຢ່າງເຂັ້ມງວດ ແລະຕ້ອງເຂົ້າໃຈເຖີງ ຜົນຮ້າຍ ຂອງພະຍາດອັກເສບປອດຈາກເຊື່ອພະຍາດຈຸລະໂລກສາຍພັນໃໝ່ ຫຼື ພະຍາດໂຄວິດ-19 ທີ່ກໍາລັງແຜ່ລະບາດຢ່າງຮ້າຍແຮງ ແລະຂະຫຍາຍອອກເປັນວົງກ້ວາງ ຢູ່ໃນປະຈຸບັນນີ້ ໂດຍສະເພາະກໍ່ຄືແຂວງຫຼວງພະບາງ.

ໃນການເຄື່ອນໄຫວ ຕິດຕາມ ແລະ ຊຸກຍູ້ ການປ້ອງກັນ ການແຜ່ລະບາດຂອງພະຍາດໂຄວິດ 19 ໃນຄັ້ງນີ້ ທ່ານ ວຽງຄອນ ຈະເລີນໄຊ ຫົວໜ້າຫ້ອງການສາທາລະນະສຸກເມືອງ ຕາງໜ້າຄະນະສະເພາະກິດ ປ້ອງກັນ ແລະ ຄອບຄຸມພະຍາດໂຄວິດ19 ຂັ້ນເມືອງກໍ່ໄດ້ມອບເຂົ້າສານ, ເຄື່ອງອຸປະໂພກ ແລະ ບໍລິໂພກຈຳນວນໜຶ່ງໃຫ້ແກ່ຜູ້ທີ່ຖືກກັກກັນອີກດ້ວຍ.
ຂ່າວ: ທ. ທອງສີ ພົມມະຈັກ