ມີເດຍລາວແຂວງໄຊສົມບູນ
ໃນຕອນເຊົ້າຂອງວັນທີ 1 ຕຸລາ 2021 ນີ້ ທ່ານ ທອງດໍາ ຂຸນອຸດົມ ຫົວໜ້າພະແນກອຸດສາຫະກໍາ ແລະ ການຄ້າ ແຂວງໄຊສົມບູນ ພ້ອມດ້ວຍຄະນະ ສົມທົບກັບຫ້ອງການອຸດສະຫະກໍາ ແລະ ການຄ້າ ເມືອງອະນຸວົງ ລົງຕິດຕາມ, ກວດກາ ລາຄາສິນຄ້າ ໃນຊ່ວງໄລຍະການແຜ່ລະບາດຂອງພະຍາດໂຄວິດ 19 ນີ້ ຢູ່ທີ່ຕະຫຼາດແຂວງໄຊສົມບູນ ແລະ ບັນດາຮ້ານຂາຍເຄື່ອງຕ່າງໆ ອ້ອມຂ້າງເທດສະບານແຂວງ.

ໂດຍຈຸດປະສົງ ແມ່ນເພື່ອປະຕິບັດຕາມຄໍາສັ່ງເລກທີ 15 ຂອງນາຍົກລັດຖະມົນຕີ ແລະ ປະຕິບັດຕາມຄໍາສັ່ງ ເລກທີ 295 ຂອງຄະນະສະເພາະກິດແຂວງ ກ່ຽວກັບການສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ 19 ຢູ່ໃນຂອບເຂດຄວາມຮັບຜິດຊອບຂອງຕົນ ກໍ່ຄືການລົງແນະນໍາບັນດາຫົວໜ່ວຍວິສາຫະກິດທີ່ດໍາເນີນກິດຈະການຈໍາໜ່າຍສິນຄ້າ ຢູ່ແຂວງໄຊສົມບູນ ໃຫ້ປະຕິບັດຕາມມາດຕະການປ້ອງກັນຢ່າງເຂັ້ມງວດ ເປັນຕົ້ນແມ່ນ ຕ້ອງມີການຮັກສາໄລຍະຫ່າງ 1 ແມັດຂື້ນໄປ, ໃສ່ຜ້າປິດປາກ-ປິດດັງ ແລະ ຕ້ອງມີນໍ້າຢາລ້າງມືໄວ້ບໍລິການຢູ່ໜ້າຮ້ານ.

ນອກນັ້ນ ທ່ານ ທອງດໍາ ຂຸນອຸດົມ ພ້ອມດ້ວຍຄະນະ ຍັງໄດ້ສອບຖາມກ່ຽວກັບລາຄາສິນຄ້າ ສະບຽງອາຫານ ໂດຍສະເພາະແມ່ນ ປະເພດເຂົ້າສານ, ຊີ້ນ, ປາ, ໄກ່ ແລະ ພຶດຜັກຕ່າງໆ ລວມທັງສິນຄ້າອຸປະໂພກ-ບໍລິໂພກ ແລະ ສິນຄ້າທົ່ວໄປ ເພື່ອຄຸ້ມຄອງໃຫ້ຢູ່ໃນສະພາບປົກກະຕິ ຕາມກົນໄກການຕະຫຼາດ ທີ່ມີການຄຸ້ມຄອງດັດສົມຂອງລັດໃນແຕ່ລະໄລຍະ ໃຫ້ຖືກຕ້ອງ ແລະ ສອດຄ່ອງຕາມລະບຽບການ. ທັງນີ້ ກໍ່ເພື່ອບໍ່ໃຫ້ມີຜູ້ປະກອບການ ສວຍໂອກາດກັກຕຸນ ແລະ ຂື້ນລາຄາສິນຄ້າ, ຂື້ນຄ່າບໍລິການ ຕາມລໍາພັງໃຈ ຊຶ່ງເປັນການເອົາປຽບຜູ້ບໍລິໂພກໂດຍບໍ່ຊອບທໍາ, ຮັບປະຫກັນໃຫ້ມີສິນຄ້າພຽງພໍ, ມີຄຸນນະພາບ ແລະ ຂາຍໃນລາຄາທີ່ເໝາະສົມ ໃນຊ່ວງໄລຍະ ທີ່ແຂວງໄຊສົມບູນ ກຳລັງປະເຊີນໜ້າກັບການແຜ່ລະບາດ ຂອງພະຍາດໂຄວິດ 19 ນີ້.

ຂ່າວ: ພາພອນ ນະວົງໄຊ