ໂດຍ: ກິນດາວັນ ອ້ວນນາຄູ ໃນວັນທີ 30 ກັນຍາ 2021ຜ່ານມານີ້, ປະທານຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ຄະນະສະເພາະກິດ ປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງ, ຈັດກອງປະຊຸມທາງໄກ ສໍາລັບຢູ່ຂັ້ນແຂວງແມ່ນໄດ້ຈັດຂື້ນທີ່ສະໂມສອນແຂວງ,ໃຫ້ກຽດເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງ ປະທານຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ທັງແມ່ນຫົວໜ້າຄະນະສະເພາະກິດ ປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 , ພະແນກການອອ້ມຂ້າງແຂວງ, ທ່ານເຈົ້າເມືອງ, ຮອງເຈົ້າເມືອງ 8 ຕົວເມືອງເຂົ້າຮ່ວມ.

ກອງປະຊຸມແມ່ນໄດ້ຮັບຟັງການລາຍງານສະພາບໂດຍລວມ ກ່ຽວກັບການຈັດຕັ້ງປະຕິບັດວຽກງານຄຸ້ມຄອງໄພພິບັດຢູ່ຂັ້ນເມືອງ ແລະ ສະພາບການປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ -19 ຢູ່ຂັ້ນເມືອງ, ຈາກນັ້ນກອງປະຊຸມໄດ້ເຫັນດີ, ໃຫ້ສືບຕໍ່ປະຕິບັດ ຄໍາສັ່ງແນະນໍາຂອງຄະນະເລຂາທິການສູນກາງພັກ ເລກທີ 87/ ຄລສພ, ຄໍາສັ່ງຂອງນາຍົກລັດຖະມົນຕີ, ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ສືບຕໍ່ກໍານົດບ້ານເທດສະບານເມືອງສາລະວັນ ເປັນບ້ານເຂດເເດງ

ເນື່ອງຈາກມີການລະບາດຢູ່ໃນຊຸມຊົນເປັນວົງກວ້າງ ມອບໃຫ້ເຈົ້າເມືອງ ສືບຕໍ່ອອກຄໍາສັ່ງ LOCKDOWN ເເລະ ກໍານົດມາດຕະການຕ່າງໆ ຢ່າງເຂັ້ມງວດ, ຫ້າມພົນລະເມືອງຂອງແຂວງສາລະວັນ ເດີນທາງ ໄປເຂດທີ່ມີຄວາມສ່ຽງ ແລະ ມີການລະບາດຂອງພະຍາດ ໂຄວິດ19 ຢູ່ໃນຊຸມຊົນ ( ເຂດເເດງ) ແລະ ຫ້າມພົນລະເມືອງ ຕ່າງແຂວງ ທີ່ມີການລະບາດໂຄວິດ -19 ຢູ່ໃນຊຸມ ຊົນ (ເຂດເເດງ) ເດີນທາງ ເຂົ້າມາແຂວງສາລະວັນ ຍົກເວັ້ນ ກໍລະນີ ຜູ້ທີ່ມີຄວາມຈໍາເປັນ ເເລະ ໄດ້ຮັບອະນຸຍາດ ຈາກຄະນະສະເພາະກິດໂຄວິດ – 19, ຫ້າມຈັດງານລ້ຽງ, ງານສັງສັນ, ຊຸມເຊວທຸກຮູບເເບບ ຢູ່ທຸກສະຖານທີ່, ຫ້າມຈັດກອງປະຊຸມ, ໂຮມຊຸມນຸມ ຫຼື ຈັດກິດຈະກໍາຕ່າງໆ ທີ່ມີຜູ້ເຂົ້າຮ່ວມຫຼາຍກວ່າ 20 ຄົນ

ເປັນຕົ້ນ ກິດຈະກໍາທາງສາສະຫນາ, ງານບຸນປະເພນີ, ງານດອງ, ກໍລະນີຈໍາເປັນຕ້ອງຈັດກອງປະຊຸມ ແລະ ງານລ້ຽງທາງການ ແມ່ນໃຫ້ຂໍອະນຸຍາດຈາກຄະນະສະເພາະກິດ ໂຄວິດ-19, ສໍາລັບການຄົບງັນງານສົບ, ງານສົ່ງສະການ ແລະ ເຮັດບຸນແຈກທານ ແມ່ນໃຫ້ສືບຕໍ່ປະຕິບັດຕາມຄໍາແນະນໍາຂອງຄະນະສະເພາະກິດຂັ້ນສູນກາງ ສະບັບເລກທີ 4291/ສພກ, ລົງວັນທີ 15 ກັນຍາ 2021 ຢ່າງເຂັ້ມງວດ. ມອບໃຫ້ອົງການປົກຄອງເມືອງ ຈັດຕັ້ງຜັນຂະຫຍາຍເປັນຄໍາແນະນໍາຂອງເມືອງ ໃຫ້ລະອຽດ ແລະ ມາດຕະການອື່ນອີກ.